မဲခေါင်၊ ဇွန် ၁၇
ရှမ်းပြည်နယ် တောင်ပိုင်း၊ မိုးဗြဲမြို့ပါ်မှာ မနေ့က ဖြစ်ပွားခဲ့တဲ့ တိုက်ပွဲ အတွင်း စစ်ကောင်တပ်သား ၁၀ ဦး ထက်မနည်း သေဆုံးသွားတယ်လို့ မိုးဗြဲ PDF၊ ရွှေလင်းယုန်တပ်ခွဲက ဒီကနေ့ ထုတ်ပြန်လိုက်ပါတယ်။
မနေ့ မနက်ပိုင်းက စပြီး စစ်ကောင်စီတပ်က မိုးဗြဲမြို့ပေါ်က လူနေရပ်ကွက်တွေကို လက်နက်ကြီးနဲ့ စပစ်လို့ တိုက်ပွဲတွေ ပြန်ဖြစ်လာတာ ဖြစ်တယ်လို့ မိုးဗြဲ PDF တပ်ဖွဲ့ဝင် တစ်ဦးက မဲခေါင်သတင်းဌာနကို ပြောပါတယ်။
“ မနေ့က သူတို့စပစ်လို့ပဲ တိုက်ပွဲတွေ ပြန်ဖြစ်လာတာပါ။ တိုက်ပွဲ အတွင်း ကျနော့် မျက်မြင်ပဲ လေးငါးယောက်လောက် သေသွားတာ တွေ့တယ်။ ၁၀ ဦးထက်တော့ မနည်းဘူး၊ သူတို့ဘက်က သေတာ” လို့ သူကပြောပါတယ်။
တိုက်ပွဲ အတွင်း ဖယ်ခုံ (၄၂၂) တပ်၊ လွိုင်ကော် အမြာက်တပ်တို့က လက်နက်ကြီးတွေနဲ့ ပစ်ခတ်တာကြောင့် ပြည်သူ့ကာကွယ်ရေးတပ်သား ၃ ဦး ထိခိုက်ဒဏ်ရာရပြီး ဘာသာရေး အဆောက်အအုံတွေနဲ့ လူနေအိမ် တစ်ချို့ ပျက်စီးခဲ့ရတယ်လို့ ဆိုပါတယ်။
ဒီကနေ့မှာတော့ စစ်ရေး အခြေအနေ တင်းမာနေပြီး ပြည်သူ့ကာကွယ်ရေးတပ်ဘက်က စစ်ရေးအရှိန်မြှင့် တိုက်ခိုက်တော့မှာ ဖြစ်တာကြောင့် ပြည်သူတွေ အနေနဲ့ မိုးဗြဲမြို့ အနီးတစ်ဝိုက်နဲ့ တိုက်ပွဲ ဖြစ်ပွားရာ နေရာတွေကို ရှောင်ရှားသွားလာကြဖို့ ရွှေလင်းယုန်တပ်ခွဲက သတိပေး ထုတ်ပြန်ထားပါတယ်။
MK-007
#MekongNews
#မိုးဗြဲမြို့
#ရွှေလင်းယုန်တပ်ခွဲ
#(၄၂၂)တပ်