မဲခေါင်၊ မတ် ၂၃
ရန်ကုန်တိုင်း၊ ဗိုလ်တထောင်မြို့နယ်၊ ဆိပ်ကမ်းမိသားစု ရပ်ကွက်၊ ကမ်းနား ကွန်ကရစ်လမ်းပေါ်ရှိ ရေကြောင်းရဲတပ်ဖွဲ့ရုံးရှေ့မှာ စစ်တပ်က လက်လုပ်ဗုံး ရှာတွေ့လို့ ဖောက်ခွဲခဲ့တယ်လို့ ဒေသခံတွေက မဲခေါင်သတင်းကို ပြောပါတယ်။
မနေ့၊ မတ်လ ၂၂ ရက်၊ ည ၉ နာရီခွဲမှာ လက်လုပ်ဗုံး တွေ့လို့ ကမ်းနား ကွန်ကရစ်လမ်းပေါ်မှာ အတားအဆီးတွေ လုပ်ပြီး ဖောက်ခွဲရာ ထိခိုက်ဒဏ်ရာရသူ မရှိဘူးလို့ ဒေသခံ တစ်ဦးက ပြောပါတယ်။
“ ဗုံးဖောက်ပြီး ၉ နာရီ ၅၀ လောက်မှာ လမ်းထဲ ဝင်လာကြတာ။ အနော်ရထာ လမ်းပေါ် ၃၉ လမ်းနဲ့ ဆိပ်ကမ်းသာ လမ်းကြားမှာ စုကြတာ။ စစ်ကား တစ်စီး ရဲကား တစ်စီး၊ ဟိုင်လပ်ကား တစ်စီးနဲ့ လူစုံ အကုန်ပါတယ်။ ဆိပ်ကမ်းသာ အပေါ် ဘလောက် စင်ထရယ် တာဝါနားက တိုက်တစ်တိုက်ကို ဝင်စစ်ကြတယ်။ လူဖမ်းမိတာတော့ မရှိဘူး။ ပြီးတော့ ဗိုလ်အောင်ကျော်လမ်း ကနေ ကုန်သည်လမ်းထိပ်ဘက်ကို ထွက်သွားကြတယ်။ အချိန်ကတော့ ၁၀ နာရီခွဲလောက်ရှိပြီ” လို့ မျက်မြင်တွေ့သူ တစ်ဦးက ပြောပါတယ်။
ဒီကနေ့ မနက်ပိုင်းမှာတော့ ဗိုလ်ချုပ်လမ်းနဲ့ ၄၅ လမ်းထောင့် အများသုံး အိမ်သာရှေ့နဲ့ မဟာဗန္ဓုလလမ်း ၄၁ လမ်းနဲ့ ၄၁ လမ်းကြား ဝန်ကြီးများရုံး မျက်နှာချင်းဆိုင် ဘက်မှာ ကားများကို စစ်ဆေးပြီး ငွေညှစ်နေသလို စစ်ကောင်စီတပ်တွေ လှည့်ကင်းပတ်နေတယ်လို့ ဒေသခံတွေက ပြောပါတယ်။
ဗိုလ်တထောင်မြို့နယ်မှာ နေ့စဉ် ယာဉ်စစ်ဆေးရေးအဖွဲ့များ ရှိနေပြီး ကားသမားတွေကို ငွေညှစ် ခြိမ်းခြောက်မှုတွေ လုပ်နေတယ်လို့ ယာဉ်မောင်းတွေက ပြောပါတယ်။
MK-005