မဲခေါင်၊ စက်တင်ဘာ ၁၉
ရှမ်းပြည်နယ် တောင်ပိုင်း၊ ရပ်စောက်မြို့နယ်၊ ကောင်းဘို့ကျေးရွာ အတွင်း ဓနု ပြည်သူ့လွတ်မြောက်ရေး တပ်ဦး-DPLA က မနေ့ ညနေပိုင်းမှာ ဒေသခံတွေကို စည်းရုံးရေးဆင်းပြီး စစ်ရေး အတွက် လေ့လာခဲ့တယ်လို့ သိရပါတယ်။
“မနေ့ ညနေပိုင်း သိပ်မမှောင်ခင် ရောက်လာပြီး ညအထိပေါ့နော်။ ရွာထဲဝင်လာပြီး တော်လှန်ရေးမှာ ပါဝင်ကြဖို့ စည်းရုံး ဟောပြောတယ်။ ရွာထဲ လှည့်ကြည့်တယ်။ ခွေး (စစ်ကောင်စီ) တွေ ဘယ်သွားပုန်းလဲမသိ၊ အဲ့အချိန် တစ်ယောက်မှ မရှိတော့ဘူး” လို့ ကောင်းဘို့ကျေးရွာမှာ နေထိုင်သူ တစ်ဦးက မဲခေါင်သတင်းဌာနကို ပြောပါတယ်။
ဓနု ပြည်သူ့လွတ်မြောက်ရေး တပ်ဦး-DPLA ဖွဲ့စည်းကြောင်း ထုတ်ပြန်ပြီးနောက် ဗထူးတပ်နယ်ဖြစ်တဲ့ ရပ်စောက်မြို့နယ် အပါအဝင် ဓနုဒေသ ရွာငံနဲ့ ပင်းတယမြို့နယ်တွေက ကျေးရွာတွေထဲမှာ စစ်ကောင်စီတပ်တွေ လုံခြုံရေး အကြောင်းပြ စခန်းချ နေထိုင်နေတာ ဖြစ်ပါတယ်။
ကောင်းဘို့ကျေးရွာမှာလည်း စစ်ကောင်စီ အင်အား ၁၀၀ ခန့် ချထားပြီး ညောင်ပင်သာ ဘုန်းကြီးကျောင်းမှာ အများဆုံး စခန်းချနေထိုင်ကာ အနီးပတ်ဝန်းကျင်ရွာက ဘုန်းကြီးကျောင်းတွေမှာလည်း စခန်းချထားတယ်လို့ ဒေသခံတွေက ပြောပါတယ်။
ဒါပေမယ့် စခန်းချထားတဲ့ စစ်ကောင်စီတပ်မှာ သက်ကြီးပိုင်းနဲ့ စစ်သင်တန်း ဆင်းခါစ ရဲဘော် အများစု ပါ၀င်နေလို့ DPLA တပ်ဖွဲ့တွေ ၀င်ရောက်လာစဥ် တိမ်းရှောင်နေတာ ဖြစ်နိုင်တယ်လို့ ဒေသခံတွေက ဆိုပါတယ်။
“ဗထူးတပ်ကြီး အနားမှာထားပြီး လာစောင့်တဲ့ စစ်သားတွေက ကလော တပ်မ (၅၅) တို့၊ တောင်ကြီးတပ်တို့ တွေကနေ လာတာ။ နေရာတကာ ၁၀ ယောက် တစ်ကြောင်းနဲ့ ရွာပတ်ပြီး အင်အားပြနေတာ နေ့တိုင်းပဲ” လို့ နောက်ထပ် ကျေးရွာနေသူ တစ်ဦးက ပြောပါတယ်။
ကောင်းဘို့ရွာနဲ့ အနီးတဝိုက်ကျေးရွာတွေမှာ လာရောက် စခန်းချထာ’တဲ့ စစ်ကောင်စီတပ်ဟာ ဒေသခံတွေရဲ့ ကားတွေကို အတင်းအဓမ္မယူပြီး အရပ်ဝတ်၊ အရပ်ကားနဲ့ သွားလာလေ့ ရှိတယ်လို့ သိရပါတယ်။
ဓနု ပြည်သူ့လွတ်မြောက်ရေး တပ်ဦး-DPLA ဖွဲ့စည်းပြီးနောက် ဓနုဒေသတွေဖြစ်တဲ့ ရွာငံ၊ ပင်းတယ၊ ရပ်စောက်နဲ့ ရှမ်းပြည်နယ် မြောက်ပိုင်း၊ နောင်ချိုမြို့နယ်တွေ အတွင်းက ကျေးရွာတွေကို အကြိမ် ၂၀ ထက်မနည်း စည်းရုံးရေး ဆင်းနိုင်ခဲ့တယ်လို့ သိရပါတယ်။
CJ-001
