မဲခေါင်၊ ဇွန် ၁၉
ကရင်နီပြည်နယ်နဲ့ ကရင်ပြည်နယ် နယ်စပ်၊ ဖားဆောင်းမြို့နယ်ထဲကို စစ်ကောင်စီတပ် အင်အား ၁၀၀ ကျော်နဲ့ စစ်ကြောင်းထိုး နေတာကြောင့် ဒေသခံတွေ စိုးရိမ်ထိတ်လန့်ပြီး ထွက်ပြေးနေကြတယ်လို့ ဖားဆောင်း သတင်း ရင်းမြစ်တွေက မနေ့က ပြောပါတယ်။
စစ်ကောင်စီတပ်တွေဟာ ဇွန်လ ၁၆ ရက်နေ့ ကတည်းက စစ်ကြောင်းထိုးလာတာ ဖြစ်ပြီး လက်ရှိ သံလွင်မြစ် အရှေ့ဖက်ခြမ်းမှာ တပ်စွဲထားတယ်လို့ ဆိုပါတယ်။
“ရွာဘက်က လူတွေက လက်နက်ကြီးကျလို့ ပြေးကုန်ပြီ။ မြို့ပေါ်ကတော့ ပြေးလို့ မရဘူး။ သူတို့ လမ်းတွေ ပိတ်ထားတယ်။ ဖားဆောင်း PDF ကလည်း သွားလာတာတွေ မလုပ်ဖို့ သတိပေးထားတော့ မရှောင်ရဲကြဘူး။ ဒါပေမယ့် အခုလည်း ရာနှုန်းပြည့် အန္တရာယ်ကင်းနေတာ မဟုတ်ဘူးလေ” လို့ ဖားဆောင်း မြို့ခံ တစ်ဦးက ပြောပါတယ်။
လက်ရှိ စစ်ကောင်စီတပ် ပစ်ခတ်တဲ့ လက်နက်ကြီးတွေ ကျေးရွာတွေထဲ ကျရောက်မှာ စိုးရိမ်နေရသလို ကရင်နီ မဟာမိတ် တော်လှန်ရေး အင်အားစုတွေ ပစ်ခတ်တဲ့ လက်နက်ကြီးတွေ ဖားဆောင်းမြို့ထဲကျမှာ စိုးရိမ်နေရတယ်လို့ သူကဆိုပါတယ်။
ဖားဆောင်းမြို့နယ်ထဲမှာ လူဦးရေ ၂၀,၀၀၀ ကျော် နေထိုင်ပြီး လက်ရှိ လူဦးရေ ၁၀,၀၀၀ ခန့် ဖယ်ခုံနဲ့ လွိုင်ကော်မြို့နယ်ဘက်ကို စစ်ဘေးရှောင်ဖို့ ထွက်သွားကြပြီလို့ ဆိုပါတယ်။
စစ်ကောင်စီတပ်တွေဟာ ဇွန်လ ၁၄ ရက်နေ့က ဖားဆောင်းမြို့နယ်ထဲကို လေကြာင်း တိုက်ခိုက်မှု ပြုလုပ်ခဲ့ပြီး ထိခိုက်သေဆုံးမှုကိုတော့ မသိရသေးပါဘူး။
ဖားဆောင်းမြို့နယ်မှာ တိုက်ပွဲမဖြစ်တာ တစ်နှစ်ခွဲကျော် ကြာပြီ ဖြစ်ပြီး အခုတစ်ကြိမ် စစ်ကောင်စီတပ်တွေ စစ်ကြောင်း ပြန်ထိုးလာတာကြောင့် ကုန်ဈေးနှုန်း ထပ်တက်မှာကို ဒေသခံတွေက စိုးရိမ်နေပါတယ်။
လက်ရှိ ဖားဆောင်းမြို့နယ်မှာ စစ်ကောင်စီတပ်တွေကို တိုက်ခိုက်နေတဲ့ အဖွဲ့တွေထဲမှာ ဖားဆောင်း PDF ၊ ဘောလခဲ PDF ၊ လွိုင်ကော် PDF နဲ့ တိုင်းရင်းသား လက်နက်ကိုင် -EROs တွေ ပါဝင်တယ်လို့ သိရပါတယ်။
CJ-007
#MeKongNews
#ဖားဆောင်းမြို့နယ်
#စစ်ကြောင်းထိုး
#သံလွင်မြစ်