မဲခေါင်၊ မတ် ၆
စစ်ကိုင်းတိုင်း၊ ရေဦးမြို့နယ်၊ ဖလံဂုဏ်ကျေးရွာကို စစ်ကောင်စီတပ်က မနေ့က စီးနင်း တိုက်ခိုက်ခဲ့လို့ ပြည်သူ့ကာကွယ်ရေး ရဲဘော် ၅ ဦး ကျဆုံးပြီး ပြည်သူ ၅ ဦး ဓားစာခံအဖြစ် ဖမ်းဆီးခေါ်သွား ခံရတယ်လို့ ရေးဦးမြို့နယ် ပကဖ မှ ကိုရှောလူ က မဲခေါင်သတင်းကို ပြောပါတယ်။
စစ်ကောင်စီတပ်တွေဟာ ဖလံဂုဏ်ကျေးရွာကို မနေ့ မနက်အစောပိုင်းမှာ ရုတ်တရက် စီးနင်း တိုက်ခိုက်ခဲ့တာ ဖြစ်ပြီး PDF ရဲဘော် ၅ ဦး ကျဆုံးကာ ၂ ဦး ဒဏ်ရာရခဲ့တယ်လို့ ဆိုပါတယ်။
“စစ်ခွေးတွေက မနက် ၃ နာရီလောက်ကတည်းက ဖလံဂုဏ်ကျေးရွာနားက တဲ ၂ လုံးကို ဝင်စီးပြီး နေနေတာ။ သူတို့ အေးအေးဆေးဆေး အနားယူပြီး မနက် ၅ နာရီလောက်မှ ရွာကို ဝင်စီးတာ။ ဒီလို ဝင်စီးလို့ ရဲဘော် ၅ ဦးကျပြီး ၂ ဦး ဒဏ်ရာရတယ်။ ပြည်သူ တစ်ဦးလည်း ဒဏ်ရာရတယ်’’ လို့ သူကပြောပါတယ်။
ဒါ့အပြင် ကျေးရွာနေ ပြည်သူ ၅ ဦးကို ဓားစာခံအဖြစ် ဖမ်းဆီး ခေါ်ဆောင်သွားရာ လက်ရှိ သူတို့ရဲ့ အခြေအနေနဲ့ နာမည် အတိအကျကိုတော့ မသိရသေးဘူးလို့ သူက ဆက်ပြောပါတယ်။
“ဒီလို ဝင်ပစ်ပြီးတော့ ရွာမှာ တစ်နေကုန် နေသွားတယ်။ အိမ်တစ်လုံးကို မီးရှို့သွားတယ်။ ပြည်သူ ၅ ဦးကိုလည်း ဓားစာခံ လုပ်ပြီး ခေါ်သွားတယ်။ အခုတော့ စစ်ခွေးတွေ ဖလံဂုဏ် အရှေ့မြောက်ဘက်က ကျေးရွာတွေဘက်ကို ဆက်သွားတယ်လို့ သိရပါတယ်” လို့ ကိုရှောလူက ပြောပါတယ်။
စစ်ကောင်စီတပ် စစ်ကြောင်းထိုး မီးရှို့ဖျက်ဆီးမှုကြောင့် ရေဦးမြို့နယ် အတွင်းရှိ ကျေးရွာ ၅၂ က ပြည်သူပိုင် နေအိမ် ၃,၂၉၁ လုံး ပျက်စီး ဆုံးရှုံးခဲ့တယ်လို့ ရေဦး-ပကဖ ရဲ့ စာရင်းတွေအရ သိရပါတယ်။
MK-007