မဲခေါင်၊ ဖေဖော်ဝါရီ ၂၄
ပြည်ထောင်စု ကာကွယ်ရေးနဲ့ လွတ်မြောက်ရေး မဟာမိတ်တပ်ပေါင်းစု-UDLA က NUG နဲ့ KIA ထံ အိတ်ဖွင့်ပေးစာ တစ်စောင် ဒီကနေ့ ပေးပို့လိုက်ပါတယ်။
ဖေဖော်ဝါရီ ၁၈ ရက်၊ မနက် ၉ နာရီခွဲမှာ အမျိုးသား ညီညွတ်ရေး အစိုးရ-NUG နဲ့ ကချင် အမျိုးသား လွတ်မြောက်ရေး တပ်မတော်-KIA တို့ရဲ့ Joint-Chain of Command အောက်မှာ ရှိတဲ့ ပကဖ တာဝန်ခံ နေမျိုးအောင်နဲ့ ဒူဂျွန်ဆိုင်းသူ ဦးဆောင်တဲ့ ဝက်လက်မြို့နယ် PDF တပ်ရင်း (၂) ဟာ ဆားတောင်ကြီး ကျေးရွာမှာ ဖြစ်ပွားခဲ့တဲ့ အမှုနဲ့စပ်လျဉ်းပြီး GZ Special Task Force – Wetlet ဦးဆောင်သူ ကိုဂျီဇတ် ကို ဆက်သွယ်ပြီး ရဲဘော် ၁၀ ဦးကို မေးမြန်းစုံစမ်းလိုတယ် ဆိုပြီး ဆင့်ခေါ်စေခဲ့တယ်လို့ သိရပါတယ်။
GZ Special Task Force – Wetlet ဟာ Local Defense Force -LDF ဖြစ်ပြီး NUG/KIA တို့ရဲ့ Chain of Command အောက်မှာ မပါဝင် ကေမယ့် တော်လှန်ရေး အကျိုးကို ရှေးရှုပြီး စုံစမ်းစစ်ဆေးမှုကို အသာတကြည် ပူးပေါင်းပေးခဲ့တယ်လို့ သိရပါတယ်။
ဒါပေမယ့် ဝက်လက်မြို့နယ် PDF တပ်ရင်း (၂) ဟာ GZ Special Task Force – Wetlet မှ ရဲဘော် ၉ ဦးကို အတင်းအဓမ္မ ထပ်မံ ဖမ်းဆီးခဲ့ပြီး စုစုပေါင်း ရဲဘော် ၁၉ ဦးကို The United Nations Standard Minimum Rules for the Treatment of Prisoners – the Nelson Mandela Rules (1955, 2015) နဲ့ မညီဘဲ ဖြောင့်ချက်အတုအပ ထွက်ဆိုဖို့ နှိပ်စက်နေတယ်လို့ ဒေသတွင်း မျက်မြင်သက်သေတွေက UDLA ကို လာရောက်တိုင်တန်းခဲ့တယ်လို့ ပေစားမှာ ဖော်ပြပါတယ်။
ဒီကိစ္စနဲ့ ပတ်သက်ပြီး မဟာမိတ်တပ်ဖွဲ့ဝင် အားလုံး များစွာ စိတ်မကောင်း ဖြစ်ရပြီး ဝက်လက်ဒေသရှိ Gz Special Task Force – Wetlet ရဲ့ တော်လှန်ရေးသမိုင်းကို ပြန်လည် အသိပေးလိုတယ်လို့လည်း ဆိုပါတယ်။
GZ Special Task Force – Wetlet ဟာ တော်လှန်ရေး စကတည်းက အခုအချိန်အထိ တိုက်ပွဲပေါင်း ၂၅ ပွဲကျော် ဆင်နွှဲခဲ့ပြီး ရဲဘော် ၁၈ ဦး အသက်ပေးဆပ်ခဲ့ရတဲ့ ဝက်လက်မြို့နယ်မှာ အနစ်နာဆုံး ဒေသခံ တပ်ရင်း ဖြစ်တဲ့အညီ ဒေသခံ ပြည်သူလူထုရဲ့ ထောက်ခံမှုနဲ့စာနာမှုကို ရရှိလျက်ရှိတယ်လို့လည်း ဖော်ပြထားပါတယ်။
ဒါကြောင့် အသက်သွေး ပေးဆပ်ထားတဲ့ လူငယ်တွေကို ငဲ့ညှာတဲ့ အနေနဲ့ NUG/KIA ဟာ မတရား ဖမ်းဆီးခံထားရသူတွေကို အကြမ်းဖက် မနှိပ်စက်ဖို့နဲ့ အပြစ်ကင်းမဲ့သူတွေကို ပြန်လည်လွတ်မြောက်စေဖို့ အမြန်ဆုံး ဆောင်ရွက်ပေးသင့်တယ်လို့လည်း အိတ်ဖွင့်ပေးစာမှာ ဖော်ပြထားပါတယ်။
အမြန်အရေးယူ လုပ်ဆောင်ရမယ့်ကိစ္စကို နှောင့်နှေးနေပါက KIA ရဲ့ စေတနာကို အထင်မှားစေနိုင်သလို တက်ကြွနေတဲ့ တော်လှန်ရေး စိတ်ဓာတ်ကို ဦးကျိုးစေမှာဖြစ်တယ်လို့ ဖော်ပြထားပါတယ်။
ဝက်လက် ဒေသခံပြည်သူတွေ အနေနဲ့လည်း အရင် မတရားမှုတွေ (ဗိုလ်ကျားကြီးတပ်ဖွဲ့ဝင် ၂ ဦးကို သတ်ဖြတ်တာ၊ သေဆုံးသွားသူတွေရဲ့ အလောင်းကို ဖျောက်ဖျက်တာ၊ ပထမအကြိမ် GZ Special Task Force – Wetlet ရဲ့ ရဲဘော် ၁၀ ဦးကို အကြောင်းပြချက် ခိုင်မာမှု မရှိဘဲ ဖမ်းဆီးတာ) အပြင် အခု မတရားမှု (ဒုတိယအကြိမ် GZ Special Task Force – Wetlet ကို မတရား ဖမ်းဆီးတာနဲ့ နှိပ်စက်တာ) ထပ်မံ ဖြစ်ပွားလာတဲ့ အတွက် သက်ဆိုင်ရာ အဖွဲ့အစည်းတွေကို ယုံကြည်မှု ကျဆင်းလာနိုင်တယ်လို့လည်း အသိပေး ဖော်ပြထားပါတယ်။
ပြည်ထောင်စု ကာကွယ်ရေး နဲ့ လွတ်မြောက်ရေး မဟာမိတ် တပ်ပေါင်းစု-UDLAဟာ တိုင်းနဲ့ပြည်နယ် အသီးသီးမှ ကာကွယ်ရေး အဖွဲ့ ၉၀ ကျော်ပါဝင်တဲ့ အဖွဲ့ဖြစ်တယ်လို့ သိရပါတယ်။
MK-003
#MekongNews
#ဝက်လက်မြို့နယ်
#UDLA
#KIA
