မဲခေါင်၊ ဇန်နဝါရီ ၁၄
ဘန်ကောက်မှာ ထိုးသတ်ခဲ့တဲ့ One Championship ပွဲအပြီး အောင်လအင်န်ဆန်းဟာ ပျော်ရွှင်စွာအောင်ပွဲခံတဲ့ မျက်နှာအမူအယာလုံး၀မပြခဲ့ဘဲ မြန်မာပြည်ကြီး ငြိမ်းချမ်းဖို့ အားလုံး ဆုတောင်းပေးကြပါလို့ တောင်းဆိုပြောကြားသွားပါတယ်။
ဇန်နဝါရီ ၁၄ ရက် နံနက်ပိုင်းမှာ အောင်လအင်န်ဆန်းနဲ့ ပြိုင်ဘက် ဘရာဇီးနိုင်ငံသား ဂယ်လ်ဗာအိုတို့ ယှဥ်ပြိုင်ခဲ့တာဖြစ်ပြီး ပထမအချီ ၁ မိနစ် ၂၉ စက္ကန့်မှာပဲ တံတောင်နဲ့ အကွဲရိုက်၊ လဲကျစဉ် ဖိထိုးရင်းကပဲ ဒိုင်ပွဲရပ် နဲ့အနိုင်ရသွားခဲ့ပါတယ်။
ဒါဟာ အောင်လအင်န်ဆန်းရဲ့ ဖိုက်တာဘ၀ ပွဲ ၂၀ မှာ ပထမဆုံး ပထမအချီမှာပဲ ဒိုင်ပွဲရပ်နဲ့နိုင်တဲ့ပွဲအဖြစ်လည်း စံချိန်တင်သွားပါတယ်။
ပွဲအပြီး အောင်လအင်န်ဆန်းက “၂၀၂၂ ဟာ မြန်မာနိုင်ငံနဲ့ပြည်သူတွေအတွက် ခက်ခဲတဲ့နှစ်ပါ။ စိတ်လည်းအရမ်းကျတယ်။ အားလုံး ကိုပြောချင်တာ စိတ်ကိုတင်းတင်းထားပါ။ ဒါအရေးအကြီးဆုံးပဲ။ ကျွန်တော့်တစ်သက်တာမှာ အရေးအကြီးဆုံးကလည်း ငြိမ်းချမ်းရေးပါပဲ။ ဒါကြောင့် အားလုံးက မြန်မာနိုင်ငံငြိမ်းချမ်းပါစေကြောင်း ဆုတောင်းပေးကြပါ”လို့ ပြောခဲ့ပါတယ်။
နောက်လာမယ့်ပွဲအဖြစ် ချန်ပီယံခါးပတ်လုပွဲထိုးတဲ့အခါ ဘယ်သူနဲ့ရှောင်ချင်တာမျိုးရှိသလဲဆိုတဲ့မေးခွန်းကို ဖြေရရင်တော့ ကျွန်တော်က One Championship Hit Man ပါ။ ဒီပြိုင်ပွဲမှာ ၁၁ ပွဲထိုးထားပြီးဖြစ်လို့ ကြိုက်တဲ့သူ လူမရွေးပဲ ထိုးသတ်သွားပါမယ်လို့လည်း ပြောသွားခဲ့ပါတယ်။
ဒီပွဲအပြီး One Championship ထူထောင်သူ ချောက်ဒရီက အောင်လကို စာချုပ်ပါထိုးကြေးမဟုတ်တဲ့ သီးခြား ဆုကြေးအဖြစ် ဒေါ်လာ ၅၀၀၀၀ ချီးမြှင့်ခဲ့တယ်လို့ သိရပါတယ်။
MKF-001