မဲခေါင်၊ မတ် ၁၁

ပဲခူးတိုင်း၊ ပေါင်းတည်မြို့နယ်၊ သစ်ပုတ်‌ကျေးရွာက စစ်ကောင်စီ သတင်းပေး ပျူစောထီး‌ ခေါင်းဆောင် ဆိုသူ အောင်ဝင်းဌေး ကို နန်းထိုက်အောင် စစ်ဆင်ရေးအဖြစ် မနေ့က နေ့လယ်ပိုင်းမှာ ဒေသခံ ကာကွယ်ရေးတပ်က ပစ်ခတ်ရှင်းလင်း ခဲ့တယ်လို့ ထုတ်ပြန်ထားပါတယ်။

ပျူစောထီး ခေါင်းဆောင် ဆိုသူ အောင်ဝင်းဌေး ကို သူနေထိုင်တဲ့ သစ်ပုတ်ရွာ အနီးမှာ ပစ်ခတ်ခဲ့ရာ ပွဲချင်းပြီး သေဆုံးသွားတယ်လို့ ဆိုပါတယ်။

ပစ်သတ်ခံရတဲ့ အောင်ဝင်းဌေး ဟာ စစ်ကောင်စီတပ်တွေကို လမ်းပြ သတင်းပေး လုပ်နေတဲ့အပြင် ညောင်နီပင်အုပ်စု၊ ရှစ်လုံးတဲတိုက်မှာ ပျူစောထီး သင်တန်း တတ်ရောက်ခဲ့သူ ဖြစ်တယ်လို့ ဆိုပါတယ်။

ဒါ့အပြင် ရွာစဉ်လှည့် သစ်ဝယ်ဟန်ဆောင်ကာ ပြည်သူ့ကာကွယ်ရေးတပ် စခန်း နေရာကို စုံစမ်းနေပြီး သတင်းပေး တိုင်ကြားလို့ လူငယ်တွေ ဖမ်းဆီးနှိပ်စက် ခံနေရတာကြောင့် ရှင်းလင်းခဲ့တာလို့ သိရပါတယ်။

ပစ်ခတ်ရှင်းလင်းခံရသူ အောင်ဝင်းဌေး ဟာ စစ်ကောင်စီ လက်ပါးစေ ဟုတ် မဟုတ် ဆိုတာကိုတော့ မဲခေါင်သတင်း အနေနဲ့ သီးခြား အတည်မပြုနိုင်သေးပါဘူး။

ဒီပစ်ခတ်မှုကို ပေါင်းတည်မြို့နယ်နဲ့ ပုတီးကုန်းမြို့နယ် ပြည်သူ့ကာကွယ်ရေးတပ်ဖွဲ့တို့ ပူးပေါင်း လုပ်ဆောင်ခဲ့တာ ဖြစ်ပြီး ပြည်သူ့ကာကွယ်ရေးတပ်သားတွေ အထိအခိုက် မရှိခဲ့ဘူးလို့ ထုတ်ပြန်ချက်မှာ ဖော်ပြထားပါတယ်။

MK-007

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)