မဲခေါင်၊ ဇူလိုင် ၂၈
စစ်ကိုင်းတိုင်း၊ ဆားလင်းကြီးမြို့နယ် ဘက်က တက်လာတဲ့ အင်အား ၈၀ ကျော်ပါ စစ်တပ် စစ်ကြောင်းဟာ ဇူလိုင်လ ၂၇ ရက်နေ့က ပုလဲမြို့ပေါ်မှာ ညအိပ် တပ်စွဲပြီးနောက် ဒီကနေ့ မနက်ပိုင်းမှာ ပုလဲမြို့နယ်၊ ကျွန်းဘိုကုန်းရွာကို ရောက်ရှိလာလို့ နီးစပ်ရာ ရွာတွေက ပြည်သူတွေ ထွက်ပြေးတိမ်းရှောင် နေရတယ်လို့ ဒေသခံတွေက ပြောပါတယ်။
ဒီကနေ့ မနက် ၅ နာရီခွဲခန့်က စတင် စစ်ကြောင်းထိုးလာရာ မနက် ၆ နာရီခွဲခန့်မှာ ကျွန်းဘိုကုန်းရွာကို ရောက်ရှိလာပြီး မနက် ၇ နာရီ ၄၅ မိနစ်ခန့်မှာ နွယ်ရှောက်ရွာ အနီးကို ရောက်ရှိကာ နေအိမ်တွေကို မီးရှို့ဖျက်ဆီးပြီး ပစ္စည်းတွေ ခိုးသွားတယ်လို့ သိရပါတယ်။
“ သူတို့ မနက်ထဲက ရောက်နေကြတာ၊ ခုချိန်ထိ လွတ်တဲ့ နေရာကို ပြေးနေရတာ။ သူတို့ လာတဲ့ လမ်းကြောင်းကို တော်လှန်ရေးတပ်တွေ မိုင်းဆွဲတာ အထိနာသွားလို့ ရွာတွေကို ဝင်မဲပြီး လုပ်နေတာ။ ပုလဲမြို့နယ်ထဲမှာ ရှိတဲ့ ပျူရွာတွေထဲ ပြန်ပြီး ခဏနားနေတယ်လို့ သိရတယ်။ လက်နက်ကြီးတွေနဲ့ ရမ်းပြီး ပစ်တာတွေလည်း လုပ်နေတယ်” လို့ ဒေသခံ တစ်ဦးက မဲခေါင်သတင်းဌာနကို ပြောပါတယ်။
လက်ရှိ ပုလဲမြို့နယ် အတွင်းရှိ ကျွန်းဘိုကုန်း၊ မန်ကျီးခွ၊ ရွာသာ၊ လိန်ကုန်း၊ ကံကြီး၊ မွေ့တုံ၊ ညောင်ကုန်း၊ ဖိုကုန်း၊ ကံပေါက်၊ နွယ်ရှောက်၊ လှော်ကားနဲ့ အင်ကြင်းစု စတဲ့ ကျေးရွာနေ ပြည်သူတွေ စစ်ဘေးရှောင် နေရတယ်လို့ ဆိုပါတယ်။
စစ်ကိုင်းတိုင်း၊ ဘုတလင်မြို့နယ်၊ စိုင်ပြင်ရွာရှိ ဗကသ ရုံးကိုလည်း စစ်တပ်က ဒီကနေ့ မနက် အစောပိုင်းက စီးနင်းခဲ့ပြီး သမဂ္ဂကျောင်းသားများကို အစုလိုက် အပြုံလိုက် ဖမ်းဆီး သတ်ဖြတ်ခဲ့သလို စာသင်ကျောင်းကိုလည်း မီးရှို့ဖျက်ဆီး ခဲ့ပါသေးတယ်။
MK-005
#Mekongnews
#ပုလဲမြို့နယ်
#စစ်ကြောင်းထိုး
#စစ်ဘေးရှောင်