မဲခေါင်၊ နိုဝင်ဘာ ၁
ရှမ်းပြည်နယ် မြောက်ပိုင်း၊ မူဆယ်ခရိုင်၊ ပန်ဆိုင်းမြို့ကို ဒီကနေ့ နိုဝင်ဘာ ၁ ရက်နေ့၊ မနက် ၈ နာရီဝန်းကျင်က စစ်လေယာဉ်နဲ့ ဗုံးကြဲလို့ ပြည်သူ ၅ ဦး ထက်မနည်း ဒဏ်ရာရပြီး နေအိမ် အများအပြား ပျက်စီးသွားတယ်လို့ ဒေသခံတွေက ပြောပါတယ်။
“ လေယာဉ်ဗုံး လာကြဲတာ။ ဘယ်နှစ်လုံးလဲ မသိဘူး။ လူတွေလည်း ထိတယ်။ အိမ်တွေလည်း အများကြီး ထိတယ်။ ပြည်သူ့စစ်ရုံးဝင်းထဲလည်း ကျတယ်။ ဘယ်သူမှ သွားမကြည့်ရဲလို့ အတိအကျ မသိဘူး” လို့ ဒေသခံ တစ်ဦးက ပြောပါတယ်။
ဗုံးကြဲမှုကြောင့် ပန်ဆိုင်းမြို့ ရပ်ကွက် (၁)၊ ရပ်ကွက် (၄) နဲ့ ရပ်ကွက် (၈) တွေမှာ ထိခိုက် ပျက်စီးမှုတွေ ရှိတယ်လို့ သူက ပြောပါတယ်။
“ ဒီမနက် ၈ နာရီ ဝန်းကျင်မှာ။ သူတို့ လေယာဉ်နဲ့ ပန်ဆိုင်း (ကြူကုတ်) မြို့မှာ လာပစ်တာ။ ဒီမနက် လာပစ်တဲ့အချိန် ထိသွားတဲ့ ပြည်သူတွေ ဟုတ်တယ်” လို့ နောက်ထပ် ဒေသခံ တစ်ဦးက ပြောပါတယ်။
စစ်ကောင်စီ လေကြာင်းက ဗုံးကြဲပြီးနောက် MNDAA တပ်က ပန်ဆိုင်း ရဲစခန်းကို ဒရုန်းနဲ့ ဗုံးကြဲ တိုက်ခိုက်ရာ ရဲ တွေ နယ်စပ်ဘက် ရှောင်တိမ်းနေတာကြောင့် ထိခိုက်မှု မရှိပေမယ့် ရဲစခန်းကို MNDAA က မီးရှို့ ဖျက်ဆီးခဲ့တယ်လို့ ဒေသခံတွေက ပြောပါတယ်။
ယမန်နေ့၊ ညနေ ၆ နာရီခွဲ ဝန်းကျင်မှာလည်း စစ်ကောင်စီ လေကြောင်းက ဗုံးကြဲ ပေမယ့် မြို့ပြင်ဘက် ကျရောက် ပေါက်ကွဲတာကြောင့် လူထိခိုက်မှု မရှိဘူးလို့ ဆိုပါတယ်။
CJ-008
