မဲခေါင်၊ မေ ၁
ပင်လောင်း-ဖယ်ခုံ နယ်စပ်တိုက်ပွဲအတွင်း သတင်းပေးချက်အရ စစ်ကောင်စီအလောင်းလာသယ်တဲ့ကားတွေ တပ်စွဲတဲ့နေရာကို တိတိကျကျ ဒရုန်းနဲ့ ဗုံးကြဲနိုင်ခဲ့တယ်လို့ တော်လှန်ရေးတပ်ပေါင်းစုဘက်မှ စစ်မြေပြင်တပ်မှူးတစ်ဦးက ဧပြီ ၃၀ရက်က ပြောပါတယ်။
ဧပြီလ ၂၅ ရက်ညမှာ စစ်ကောင်စီတပ်သားတွေရဲ့အလောင်းကို လာသယ်တဲ့ ကား ၂စီး စခန်းချတဲ့နေရာကို ဗုံးကြဲနိုင်ခဲ့တာဖြစ်ပြီး ကားတစ်စီးပျက်စီးသွားသလို စစ်ကောင်စီတပ်သားတွေလည်း ထိခိုက်သေဆုံးတာတွေရှိတယ်လို့ အဲ့ဒီ စစ်မြေပြင်တပ်မှူးကပြောပါတယ်။
“အဲ့ဒီနေ့က စစ်ကောင်စီက ရွာထဲမှာ ဒေသခံတွေကို ဖမ်းဆီးတဲ့ကိစ္စနဲ့ပတ်သက်ပြီး သူတို့အချင်းချင်း ရန်ဖြစ်ကြတာလည်းရှိတယ်။ သေနတ်ပစ်ခတ်တာတွေလည်း ဖြစ်ကြတယ်။ အဲ့နေ့မှာပဲ သူတို့(စစ်ကောင်စီနဲ့ PNO ပူးပေါင်းတပ်)ဘက်က အရာရှိတစ်ယောက်က ဆက်သွယ်လာပြီးတော့ တည်နေရာပြောပြတာနဲ့ ကျွန်တော်တို့လည်း ဒရုန်းနဲ့ သွားကြဲတာ သူတို့ကားတစ်စီးပျက်သွားတယ်” လို့ သူကပြောပါတယ်။
ဗုံးနဲ့အကြဲခံရတဲ့ စစ်ကောင်စီတပ်ဟာ အဲဒီနေ့မှာပဲ အလျင်အမြန် မြောက်စလုံးကနေ တောင်မဲသင်းဘက်ကို ပြန်လည်ဆုတ်ခွာသွားခဲ့တယ်လို့ တော်လှန်ရေးတပ်ဖွဲ့တွေထံက သိရတယ်။
ဒရုန်းနဲ့ဗုံးကြဲခံလိုက်ရလို့ ကားတစ်စီးပျက်သွားတဲ့ စစ်ကောင်စီဟာ အလောင်းတွေကို အကုန်လုံး ပြန်မသယ်နိုင်တော့ပဲ အရာရှိတွေရဲ့ အလောင်းကိုသာ သယ်ပြန်သွားတယ်လို့ ဒေသခံတစ်ဦးကလည်း ပြောပါတယ်။
“နောက်ရက်နယ်မြေရှင်းလင်းရေးလုပ်တော့ သူတို့ရဲ့ လက်အောက်ငယ်သားတွေရဲ့ အလောင်းတွေပဲကျန်တော့တယ်။ နံဟောင်နေတဲ့အလောင်းတွေ လောက်ကောင်တက်နေတဲ့အလောင်းတွေလည်း အများကြီးပဲ။ အဲ့ဒီအလောင်းတွေကို တော်လှန်ရေးတပ်ပေါင်းစုကပဲ သင်္ဂြိုလ်ပေးလိုက်ရတယ်” လို့ သူကပြောပါတယ်။
စစ်ကောင်စီနဲ့ တော်လှန်ရေးတပ်ပေါင်းစုတွေ ပင်လောင်း-ဖယ်ခုံနယ်စပ်မှာ ဖြစ်ပွားခဲ့တဲ့ တိုက်ပွဲအတွင်း စစ်ကောင်စီဘက်က စစ်တပ်ဒုတပ်ရင်းမှူး အပါအ၀င် စစ်သား ၃၀ ကျော်သေဆုံးခဲ့တယ်လို့ KNDF က ထုတ်ပြန်ထားပါတယ်။
စစ်ကောင်စီဟာ ကရင်နီထဲကို ဝင်ရောက်နိုင်ဖို့ စစ်ကြောင်း ၁၂ ကြောင်းနဲ့ ထိုးစစ်ဆင်နေတာဖြစ်ပြီး အဲ့ဒီစစ်ကြောင်းတွေထဲမှာ ပင်လောင်း-ဖယ်ခုံ နယ်စပ်ကလည်း ပါဝင်တာဖြစ်ပါတယ်။
လက်ရှိဖြစ်ပွားနေတဲ့ တိုက်ပွဲတွေမှာ စစ်ကောင်စီလက်အောက်ခံ PNO ပြည်သူ့စစ်က စစ်ကောင်စီဘက် အင်အားဖြည့်ကာ တော်လှန်ရေးတပ်ဖွဲ့တွေကို တိုက်ခိုက်နေပါတယ်။ အဲ့ဒီလို ပါဝင်တာမှာ အစပိုင်းက ပြဿနာမဖြစ်ပေမယ့် အချိန်ကြာလာတာနဲ့ မတူညီတဲ့ စရိုက်တွေ၊ စစ်ကောင်စီက ဒေသခံတွေက သတ်ဖြတ်တာတွေကြောင့် ပြဿနာမကြာခဏ ဖြစ်ပွားနေတယ်လို့လည်း စုံစမ်းသိရှိရပါတယ်။
(စစ်ကောင်စီတပ်သားများ သေဆုံးနေပုံများမှာ Facebook Community Standard အရ ဖျက်ချခံရနိုင်သည့်အတွက် Telegram Channel – https://t.me/mekongnewsmm/15413 တွင်သာ ကြည့်ရှုနိုင်ပါသည်)
CJ – 002
#MeKongNews
#ပင်လောင်း
#ဖယ်ခုံ
#ဒရုန်းဗုံးကြဲ