မဲခေါင်၊ ဇန်နဝါရီ ၂၇
မကွေးတိုင်း၊ ပခုက္ကူမြို့ပေါ်ရှိ လဝက ရုံးကို လက်ပစ်ဗုံးနဲ့ တိုက်ခိုက်ခဲ့ရာ ရုံးစောင့် ရဲနဲ့ ပျူစောထီး ၇ ဦး ဒဏ်ရာ ရရှိခဲ့တယ်လို့ Pakokku Underground Force ထံမှ သိရပါတယ်။
ဇန်နဝါရီလ ၂၆ ရက် ညနေ ၄ နာရီ ၁၂ မိနစ်ခန့်က စစ်ကောင်စီရဲ့ တရားမဝင် ရွေးကောက်ပွဲကို လက်မခံတာကြောင့် “လက်တုံ့ပြန် စစ်ဆင်ရေး” အဖြစ် လက်ပစ်ဗုံးနဲ့ ပစ်သွင်း တိုက်ခိုက်ခဲ့တာလို့ ဆိုပါတယ်။
ဗုံးပေါက်ကွဲမှုကြောင့် စစ်ကောင်စီတပ်သား အပါအဝင် ရဲနဲ့ပျူစောထီး ၇ ဦးခန့် အပြင်းအထန် ဒဏ်ရာ ရရှိခဲ့တယ်လို့ ဆိုပါတယ်။
အဲဒီ တိုက်ခိုက်မှုကို Pakokku Underground Force တပ်ဖွဲ့က ပြုလုပ်ခဲ့တာ ဖြစ်ပြီး ပြည်သူ့ ကာကွယ်ရေးတပ်ဖွဲ့ဝင်တွေ အထိအခိုက်မရှိ ပြန်လည် ဆုတ်ခွာနိုင်ခဲ့တယ်လို့ သိရပါတယ်။
အလားတူ မန္တလေးတိုင်း၊ မြင်းခြံမြို့နယ်၊ ရသာကျေးရွာမှာ တရားမဝင် ရွေးကောက်ပွဲ အတွက် မဲစာရင်းကောက်ပြီး ပြန်လာတဲ့ စစ်ကောင်စီ ယာဉ်တန်းကို မိုင်းဆွဲ တိုက်ခိုက်ရာ စစ်သား ၃ ဦး သေဆုံးခဲ့တယ်လို့ ရွှေခြံသား ပြောက်ကျားတပ်ဖွဲ့ တာဝန်ရှိသူက ပြောပါတယ်။
မနေ့က ညနေ ၄ နာရီခွဲခန့်က နဘူးအိုင်ရွာမှ ဆိုင်ကယ် ၇ စီး ကားလေး ၂ စီးနဲ့ ရသာကျေးရွာမှာ မဲစာရင်း ကောက်ယူပြီး နဘူးအိုင်ရွာသို့ ပြန်လာတဲ့ စစ်သားတွေကို ဖက်ရင်းကျေးရွာနဲ့ လေးအိမ်တန်း ကျေးရွာကြားမှာ မိုင်းဆွဲ တိုက်ခိုက်ခဲ့ရာ စစ်သား ၃ ဦးသေဆုံးပြီး တစ်ဦး အပြင်းအထန် ဒဏ်ရာရ ရှိခဲ့တယ်လို့ သိရပါတယ်။
အဲဒီ တိုက်ခိုက်မှုကို ရွှေခြံသား ပြောက်ကျားတပ်ဖွဲ့က မိုင်း ၆ လုံး အသုံးပြု ဖောက်ခွဲ တိုက်ခိုက်ခဲ့တာဖြစ်ပြီး ပြည်သူ့ကာကွယ်ရေးတပ်ဖွဲ့ဝင်တွေ အထိအခိုက်မရှိ ပြန်လည် ဆုတ်ခွာနိုင်ခဲ့တယ်လို့ ဆိုပါတယ်။
လက်ရှိ စစ်ကောင်စီတပ်ဟာ နဘူးအိုင်ကျေးရွာမှာ တပ်စွဲထားပြီး အနီးတဝိုက်ရှိ ကျေးရွာတွေမှာ တရားမဝင် ရွေးကောက်ပွဲ အတွက် စာရင်းကောက်တာ၊ ဆက်ကြေး ကောက်တာတွေ လုပ်နေတယ်လို့ သိရပါတယ်။
MK-003