မဲခေါင်၊ မတ် ၉
ညောင်ရွှေမြို့နယ်ထဲက နှစ်ခြင်းဘာသာဝင် အင်းလူမျိုးတွေနေထိုင်တဲ့ ရေဗြုံရွာမှာ စစ်တပ်က တပ်ဝင်စွဲဖို့ ပြင်ဆင်နေတယ်လို့ ဒေသခံတွေထံကနေ ဒီနေ့သိရပါတယ်။
အင်းလေးအနောက်ဘက် ညောင်ရွှေ – ခေါင်တိုင်လမ်းမပေါ်မှာရှိတဲ့ စစ်ကောင်စီတပ်တွေဟာ အင်အားတိုးမြှင့်ပြီး ရေဗြုံရွာမှာ စခန်းချဖို့ ပြင်ဆင်နေရာဖြစ်ပြီး သူတို့စခန်းချမယ့်နေရာနဲ့ မလွတ်တဲ့ အိမ်တစ်အိမ်ကို အတင်းအကြပ် ဖယ်ခိုင်းခဲ့တာကြောင့် မနေ့ မတ်လ ၈ရက်နေ့က ဖယ်ပေးခဲ့ရတယ်လို့ ဒေသခံတစ်ဦးက မဲခေါင်ကို ပြောပါတယ်။
“ အိမ်ရှင်က သူနေနေတာ ၁၁ နှစ်ရှိပြီဆိုပြီး တောင်းပန်တာ လက်မခံလို့ မနေ့ကပဲဖျက်ပေးလိုက်ရပြီ။ နဂိုလမ်းမပေါ်နေရာကနေပြီး ရွာထဲကိုရွှေ့ဆောက်ပေးလိုက်ရတာပေါ့” လို့ သူက ပြောပါတယ်။
အဲ့ဒီဖျက်ဆီးခံလိုက်ရတဲ့ အိမ်ဟာ နှစ်ထပ်ပျဉ်ထောင်အိမ် ဖြစ်ပြီး လွန်ခဲ့တဲ့ ၃ရက်ခန့်ကတည်းက စစ်တပ်ကဖယ်ရှားပေးဖို့ လာရောက်ပြောနေတာလို့ သိရပါတယ်။
ပြီးခဲ့တဲ့ ဇန်နဝါရီလကဖြစ်ခဲ့တဲ့ သန်းထောင်တိုက်ပွဲကာလကတည်းက အဲ့ဒီလမ်းတလျှောက်မှာ ညောင်ရွှေမြို့ ခေါင်တိုင်လမ်းအဝင်၊ အင်းတိန်ရွာအဝင်နဲ့ ခေါင်တိုင်ရွာတို့မှာ စစ်ဆေးရေးဂိတ် ၃ နေရာဖွင့်ပြီး စစ်ဆေးနေတာဖြစ်တယ်လို့ ဒေသခံတွေထံကနေ သိရပါတယ်။
အင်းတိန်ရွာအဝင်မှာ စစ်ကောင်စီအင်အား ၁၀ ယောက်ခန့်က စခန်းချတပ်စွဲထားတာ ၃လခန့်ရှိနေပြီလို့ဆိုပါတယ်။
ပြီးခဲ့တဲ့ မတ်လ ၅ရက်နေ့ ည ၇ နာရီကျော်လောက်မှာ သန်းထောင်ရွာဘက်ကနေ ထွက်လာတဲ့ သေနတ်ပစ်ဖောက်သံကြားရပြီးနောက်ပိုင်း အခုလို စခန်းချဖို့ ပြင်ဆင်လာတာ ဖြစ်ပါတယ်။
ရေဗြုံရွာမှာ နေထိုင်သူတွေဟာ နှစ်ခြင်းခရစ်ယာန်ဘာသာဝင်တွေဖြစ်ပြီး အေးအေးဆေးဆေးနေကြတာကြောင့် အခုလို စစ်တပ်က လာရောက်အနိုင်ကျင့်တယ်လို့ ခံစားရကြောင်း ရေဗြုံဒေသခံ အမျိုးသမီးတစ်ဦးက ပြောပါတယ်။
“ သန်းထောင်၊ ဘုရားနီနားကျတော့ သူတို့မနေရဲဘူးလေ။ ရေဗြုံကလူတွေက သူတို့ဟာသူတို့ အေးအေးဆေးဆေး နေကြတာဆိုတော့ အတင်းအဓ္ဓမကြီးကို လာလုပ်နေကြတာလေ” လို့ သူကပြောပါတယ်။
ရေဗြုံရွာမှာ နှစ်ခြင်းခရစ်ယာန်ဘာသာကို ယုံကြည်ကိုးကွယ်ကြသူ အင်းသားလူမျိုးတွေသာ နေထိုင်ကြပြီး အိမ်ခြေအနည်းငယ်သာရှိတဲ့ အင်လေးအနောက်တောင်ဘက်ခြမ်းမှာရှိတဲ့ ရွာတစ်ရွာဖြစ်ပါတယ်။ အရင် NLDအစိုးရလက်ထက်က ကိုးရီးယားနိုင်ငံ နှစ်ခြင်းခရစ်ယာန် သာသနာပြုအသင်းတစ်ခုရဲ့ ထောက်ပံ့မှုကြောင့် ခရစ်ယာန်ကျောင်းတစ်ကျောင်းလည်းရှိပါတယ်။
ညောင်ရွှေမြို့နယ်အတွင်းမှာရှိတဲ့ စစ်ဆေးရေးဂိတ်တွေမှာ လမ်းသွားလမ်းလာအရပ်သားတွေကို စစ်ဆေးရာမှာ မျက်နှာစိမ်းသူတွေ၊ သူတို့မသင်္ကာတဲ့သူတွေကိုပိုစစ်ပြီး အကြောင်းပြချက်မရှိပဲ ငွေတောင်းခံတာ၊ ပါလာတဲ့စားစရာ၊ အရက်၊ ဘီယာတွေကို ယူဆောင်တာတွေလည်း စစ်ကောင်စီတပ်သားတွေက ပြုလုပ်နေတယ်လို့ ဒေသခံတွေထံက သိရပါတယ်။
ဒီကိစ္စနဲ့ပတ်သက်ပြီး စစ်ကောင်စီရဲ့ အရှေ့ပိုင်းတိုင်းစစ်ဌာနချုပ်ကို မဲခေါင်သတင်းဌာနက ဆက်သွယ်မေးမြန်းဖို့ကြိုးစားပေမယ့် ဖုန်းလက်ခံဖြေကြားခြင်းမရှိပါဘူး။
CJ – 001
#MeKongNews
#အင်းလူမျိုး
#နှစ်ခြင်းခရစ်ယာန်