မဲခေါင်၊ ဇန်နဝါရီ ၂၈
နွေဦးတော်လှန်ရေးကြီး ၂ နှစ်ပြည့်ချိန်မှာ “တစ်သံတည်းညီ တချီတည်းရုန်း” ခေါင်းစဉ်နဲ့ တိတ်ဆိတ် ငြိမ်သက်ခြင်း သပိတ်-Silent Strike ပြုလုပ်ဖို့ ကမ်ပိန်း ဦးဆောင်သူတွေက ဒီကနေ့ တိုက်တွန်းလိုက်ပါတယ်။
နွေဦးတော်လှန်ရေး ၂ နှစ်ပြည့် ဖေဖော်ဝါရီ ၁ ရက်မှာ ပြည်သူတွေ သွေးမအေးဘူး၊ သွေးမကြောင်ဘူး ဆိုတာကို ပြသတဲ့ အနေနဲ့ “တစ်သံတည်းညီ တချီတည်းရုန်း” ကမ်ပိန်း ပြုလုပ်ဖို့အတွက် ဦးဆောင်သူတွေက တိုက်တွန်းနှိုးဆော်နေတာပါ။
“လာမယ့် ဖေဖော်ဝါရီ ၁ ရက်နေ့ဆိုရင် ပြည်သူ့နွေဦး တော်လှန်ရေးကြီး ၂ နှစ်ပြည့်၊ တနည်းပြောရရင် စစ်အာဏာသိမ်းမှု ၂ နှစ်ပြည့်ချေပြီ။ ဒီလို တော်လှန်ရေး ၂ နှစ်ပြည့်တဲ့ အချိန်မှာ ကျနော်တို့ ပြည်သူတွေ သွေးအေးမနေဘူး၊ သွေးကြောင်မသွားဘူး၊ စစ်အုပ်ချုပ်ရေး ယန္တရားအောက်မှာ အသားကျ မသွား ဘူးဆိုတာကို ကမ္ဘာသိ၊ မြန်မာသိ ဆက်လက် ဖော်ထုတ်ပြသနေကြဖို့ လိုပါတယ်။ အထူးသဖြင့် အကြမ်းဖက် စစ်အုပ်စုရဲ့ အရေးပေါ် အခြေအနေ သက်တမ်း ကုန်ဆုံးမယ့်နေ့လည်း ဖြစ်တာမို့ ကမ္ဘာကြီးက အဲ့နေ့မှာ ကျနော်တို့ မြန်မာ့အရေးကို ပိုလို့ စိတ်ဝင်စားစွာ စောင့်ကြည့်နေကြပါလိမ့်မယ်။ ဒါ့ကြောင့် ကျနော်တို့ ပြည်သူ့ နွေဦး တော်လှန်ရေးကြီး ၂ နှစ်ပြည့်တဲ့ ဖေဖော်ဝါရီ ၁ ရက်မှာ တနိုင်ငံလုံး၊ လှည်းနေ လှေအောင်း မြင်းဇောင်း မကျန် ပြည်သူအားလုံး ပါဝင်ဆင်နွှဲနိုင်တဲ့ “အပြင်မထွက်၊ တိတ်ဆိတ်ငြိမ်သက်ခြင်းသပိတ်” -Silent Strike ကြီး ဖော်ဆောင်၊ ဆင်နွှဲကြဖို့ ဖြစ်ပါတယ်” လို့ ကမ်ပိန်း ဦးဆောင်သူ တစ်ဦးက တိုက်တွန်းထားပါတယ်။
ဖေဖော်ဝါရီ ၁ ရက်နေ့မှာ မနက် ၁၀ နာရီကနေ ညနေ ၃ အတွင်း အပြင်ကို လုံးဝမထွက်ကြဖို့နဲ့ ကိုယ့်အိမ်၊ ကိုယ့်အလုပ်ခွင်၊ ကိုယ့်ဆိုင်၊ ကိုယ့်ရုံး အစရှိတဲ့ နေရာတွေမှာပဲ ရှိကြဖို့ ကမ်ပိန်း ဦးဆောင်သူတွေက တိုက်တွန်းထားပါတယ်။
“ကျနော်တို့ အပြင်မထွက်ဘူး၊ တိတ်ဆိတ်ငြိမ်သက်တယ် ဆိုတာက ကြောက်တာ၊ သွေးအေးတာ လုံးဝ မဟုတ်ဘူး။ ငါတို့ မြို့၊ ငါတို့ရွာကို ငါတို့သာ ပိုင်တယ်၊ တော်လှန်ရေး အတွက် ငါတို့ ငြိမ်ရင် ငြိမ်မယ်၊ ငါတို့ လှုပ်ရင် လှုပ်မယ်ဆိုတာကို အကြမ်းဖက် စစ်မိစ္ဆာတွေ သိစေဖို့ဖြစ်တယ်။ နောက် ပြည်သူတွေက သိကြပြီး ဖြစ်မှာပါ။ ဒီဖေဖော်ဝါရီ ၁ ရက်နေ့မှာပဲ အကြမ်းဖက် စစ်အုပ်စုဘက်ကလည်း လူစုလူဝေးနဲ့ အင်အားပြပွဲတွေ၊ စစ်တပ် ထောက်ခံပွဲ ဆိုတာတွေကို အကြီးအကျယ် လုပ်ကြဖို့ ပြင်ဆင်နေပါတယ်။ ကျနော်တို့ ပြည်သူတွေ အနေနဲ့တော့ အဲ့ဒီ အကြမ်းဖက် လူအုပ်စုနဲ့ ဝေးဝေးရှောင်၊ မပတ်သက်ကြဖို့ပါပဲ။ ကိုယ့်နေရာမှာသာ ကိုယ်နေကြဖို့ ဖြစ်ပါတယ်” လို့ ကမ်ပိန်း ဦးဆောင်သူတွေက ပြောပါတယ်။
ဒါ့အပြင် အခု ၂၀၂၃ ခုနှစ်ကို “အဆုံးသတ်တိုက်ပွဲအတွက် အဆုံးအဖြတ်နှစ်” သတ်မှတ်ထားကြတဲ့ အတိုင်း အားကုန်ထုတ်၊ ရုန်းကန် တိုက်ပွဲဝင်သွားကြဖို့ ဖြစ်တယ်ဆိုတာနဲ့ လူထုတရပ်လုံး အနေနဲ့ “တသံတည်းညီ တချီတည်းရုန်း” ကြပြီး အဆုံးသတ်တိုက်ပွဲကို အတူလှမ်းချီကြဖို့ အတွက်လည်း တိုက်တွန်းနှိုးဆော် ထားပါတယ်။
MK-003