မဲခေါင်၊ မေ ၁၀
နွေဦးတော်လှန်ရေး အတွက် ရှေ့တန်းကနေ တိုက်ပွဲဝင်နေကြတဲ့ ပြည်သူ့တပ်သားတွေကို ကြိုဆိုဖို့ ရှေ့ပြေး နိမိတ်ဖြစ်တဲ့ “ပြည်တော်ဝင်” ဆိုတဲ့ ခေါင်းစဉ်နဲ့ အနုပညာပြိုင်ပွဲ Art Challenge ပြုလုပ်နေတယ်လို့ CRPH – OFP Fundraising Program ရဲ့ လူမှုကွန်ရက် စာမျက်နှာက ကြေညာထားပါတယ်။
ပြိုင်ပွဲခေါင်းစဉ်ကို “ပြည်တော်ဝင်” လို့ သတ်မှတ်ထားကာ ပြိုင်ပွဲဝင်တွေ နှစ်သက်သလို ရေးဆွဲ ပုံဖော်နိုင်မှာ ဖြစ်ပြီး သတ်မှတ်ချက် တခု အနေနဲ့ နွေဦးတော်လှန်ရေး အငွေ့အသက်တွေ ထည့်ပေးဖို့နဲ့ အနုပညာ လက်ရာတွေကို ပေးပို့ရာမှာ ရှင်းလင်းချက် အနည်းငယ် ရေးသားပေးရမယ်လို့ သိရပါတယ်။
“ပြည်တော်ဝင်” Art Challenge မှာ ခေါင်းစဉ် ၂ မျိုး ပါဝင်မှာဖြစ်ပြီး Digital Artwork ခေါင်းစဉ်အောက်က ပန်းချီ၊ ကာတွန်း၊ ပိုစတာ နဲ့ Physical Artwork ခေါင်းစဉ်အောက်ကနေ ကဗျာ၊ ကာတွန်း၊ ဓာတ်ပုံနဲ့ ပါဝင်ယှဉ်ပြိုင်လို့ ရမှာ ဖြစ်ပါတယ်။
အဆိုပါ Challenge အတွက် အနုပညာ လက်ရာတွေကို မေလ ၉ ရက်နေ့ကနေ ၁၈ ရက်နေ့ထိ https://t.me/pyitawwinn ကနေ တဆင့် ပေးပို့ရမှာဖြစ်ပြီး ကြည့်ရှုသူတွေ အနေနဲ့ မေလ ၂၀ ရက်နေ့ထိ Vote ပေးနိုင်မှာဖြစ်ကာ ဆုရသူတွေကိုတော့ မေလ ၂၂ ရက်မှာ ကြေညာမယ်လို့ သိရပါတယ်။
ပြိုင်ပွဲဝင်တွေ ပေးပို့ထားတဲ့ လက်ရာတွေကို ပိတောက်ဖူး ဖေ့ဘုတ်စာမျက်နှာမှာ ဖန်တီးသူရဲ့ နာမည်နဲ့ တကွ တင်ထားပြီး အနိုင်ရရှိသူတွေကို လူထုအမှတ်ပေး စနစ်နဲ့ ရွေးချယ်သွားမယ်လို့ သိရပါတယ်။
ပြိုင်ပွဲဝင်တွေ အတွက် ဆုငွေအဖြစ် ပထမဆု ၅ သိန်းကျပ်၊ ဒုတိယဆု ၃ သိန်းကျပ်၊ တတိယဆု တစ်သိန်းကျပ်၊ နှစ်သိမ့်ဆု ၅ သောင်းကျပ်နဲ့ ပါဝင်ယှဉ်ပြိုင်မှုဆု ၃ သောင်းကျပ် ချီးမြှင့်ပေးမယ်လို့ သိရပါတယ်။
ပြိုင်ပွဲအတွက် လက်ခံရရှိတဲ့ အနုပညာ လက်ရာတွေကို နွေဦးတော်လှန်ရေး အထိမ်းအမှတ်အဖြစ် အလျဉ်းသင့်သလို ရန်ပုံငွေ ရှာနိုင်ဖို့ ပြခန်းတွေမှာ ပြသတာ၊ merchandise product တွေ ထုတ်လုပ်တာအပြင် တချို့ လက်ရာတွေကို ပြည်တော်ဝင် စတင်ချိန်မှာ ပံ့ပိုးဖို့ ပြန်လည် အသုံးပြုမှာဖြစ်ပြီး အနုပညာရှင်တွေကို ဉာဏ်ပူဇော်ကြေးတွေ အလျဉ်းသင့်သလို ပေးအပ်မယ်လို့ သိရပါတယ်။
MK-009
#MeKongNews
#ပြည်တော်ဝင်
#ပြည်သူ့ကာကွယ်ရေးတပ်ဖွဲ့
#Art-Challenge