မဲခေါင်၊ ဇူလိုင် ၂၁
KIO/KIA ဌာနချုပ်ရှိရာ အနီးက နမ်ဆန်ယန်ဘက် စစ်ကြောင်းထိုး ချဉ်းကပ်လာတဲ့ စစ်ကောင်စီတပ်တွေနဲ့ KIA တို့ လက်ရှိအထိ ထိပ်တိုက် တိုက်ပွဲဖြစ်ပွားနေဆဲဖြစ်တယ်လို့ ဒေသခံတွေနဲ့ KIA ရှေ့တန်း ရင်းမြစ်တွေ ဆီကသိရပါတယ်။
ဒီနေ့ ဇူလိုင် ၂၁ ရက်နေ့ မနက်ပိုင်းကလည်း နမ်ဆန်ယန်အနီးမှာ တိုက်ပွဲတွေ ဖြစ်ပွားနေပြီး မနေ့ကဇူလိုင်လ ၂၀ ရက် မနက်ပိုင်းမှာတော့ ဂျာပူ (မလန်းယန်) မှာရှိတဲ့ စစ်ကောင်စီ တပ်အဟောင်းမှာ ပြန်လည် စခန်းအထိုင်ချဖို့ ကြိုးစားနေတဲ့ စစ်ကောင်စီအဖွဲ့ကို KIA ဘက်က တိုက်ခိုက် မောင်းထုတ်လိုက်တယ်လို့ နောက်ထပ် KIA ရှေ့တန်းနဲ့ နီးစပ်သူ ၁ ဦးက ပြောပါတယ်။
“အခုလေးတင် ကျနော့် အနီးနားဘက်ပဲ လက်နက်ကြီးကျလာပြီ။ လန့်သွားတာပဲ။ တဒုန်းဒုန်းနဲ့ အသားကုန် ချလာပြီ၊ ဂျာပူရွာ အနီးနား မွှေနောက်နေတဲ့ စစ်ကောင်စီတွေ အားလုံးကို KIA ဘက်က မောင်းထုတ် လိုက်တာ။ ပြေးလမ်းတောင် မမြင်ကြဘူး” လို့ ဒီမနက်တိုက်ပွဲတွေအကြောင်း ရှေ့တန်းသတင်းရင်းမြစ် တစ်ဦးက မဲခေါင်သတင်းဌာနကို ပြောပြပါတယ်။
စစ်တပ်ဘက်က စခန်းအထိုင်ချဖို့ ရောက်လာတာကို KIA ဘက်က သိသွားလို့ လာရောက်ပစ်ခတ်ရာက တိုက်ပွဲ ဖြစ်လာတာလို့ ဒေသခံ ၁ ဦးက လည်း ပြောပါတယ်။
ဒါ့အပြင် ယမန်နေ့ ညနေ ၅ နာရီဝန်းကျင်က ဗန်းမော်ဘက်ကနေ နမ်ဆန်ယန်ဘက် စစ်ကူ အင်အားဖြည့် စစ်ကြောင်းထိုးလာတဲ့ စစ်ကောင်စီအဖွဲ့ကို လဂျားယန်မှာ KIA ဘက်က ကြားဖြတ် တိုက်ခိုက်ခဲ့တယ်လို့ KIA ရှေ့တန်းနဲ့ နီးစပ်သူ ၁ ဦးက ပြောပါတယ်။
လဂျားယန် တံတားထိပ်နားမှာလည်း စစ်ကောင်စီတပ်ကို KIA က တိုက်ခိုက်ခဲ့ပြီး စစ်ကောင်စီဘက်က ထိခိုက်တာများ ပေမယ့် အတိအကျတော့ မသိရဘူးလို့ သူက ပြောပါတယ်။
KIO/KIA ဌာနချုပ်ရှိရာ အနီးက နမ်ဆန်ယန်အနီးမှာ အခုလ ဇူလိုင် ၃ ရက်နေ့ကစ စစ်ကောင်စီနဲ့ KIA တို့အကြား ကျော့ပြန်တိုက်ပွဲ ပြန်လည်ပြင်းထန်လာပြီး စစ်ကောင်စီဘက်က ဗန်းမော်လမ်းကြောင်းနဲ မြစ်ကြီးနားလမ်ကြောင်း ဘက်တွေကနေ နေ့စဉ် စစ်ကူအင်အားဖြည့်နေပြီး နှစ်ဖက် တိုက်ပွဲတွေလည်း လက်ရှိထိ နေ့တိုင်းနီးပါ ဖြစ်ပွားနေတာဖြစ်ပါတယ်။
CJ-008
#MeKongNews
#KIA
#စစ်ကောင်စီ
#တိုက်ပွဲ
#နမ်ဆန်ယန်