မဲခေါင်၊ သြဂုတ် ၁
ရှမ်းပြည်နယ် တောင်ပိုင်း၊ ဓနုကိုယ်ပိုင် အုပ်ချုပ်ခွင့်ရဒေသမှာ ဓနုပြည်သူ့လွတ်မြောက်ရေးတပ်ဦး – DPLA (ဓနုအာမီ) ဖွဲ့စည်းပြီးကြောင်း ကြေညာပြီးနောက် မနေ့က ရွာငံမြို့နယ်၊ လွှစင်ကျေးရွာနဲ့ ပဲရင်းတောင်ကျေးရွာ တွေက နေအိမ် တချို့ကို စစ်တပ်နဲ့ ပျူစောထီးတွေက မီးရှို့ခဲ့တယ်လို့ ဒေသခံတွေက ပြောပါတယ်။
စစ်တပ်နဲ့ ပျူစောထီး အင်အား ၃၀ ခန့်ဟာ ရွာငံမြို့နယ်၊ လွှစင်ကျေးရွာရှိ ဦးဘဝေ နဲ့ ကိုစိုးထွဋ် တို့ နေအိမ်တွေကို မီးရှို့ခဲ့ပြီး ဦးဘဝေ ရဲ့ သားအကြီးဖြစ်သူ ကိုဝင်းသိန်းကို ဖမ်းဆီးသွားတာလို့ သိရပါတယ်။
“ကား ၃ စီး၊ ဆိုင်ကယ်တစ်စီး၊ ခွေး (စစ်တပ်)ရောပါတယ်။ လူ ၃၀ ဝန်းကျင်၊ ပျူစောထီး ပိုများတယ်။ ဖမ်းသွားတာက လွှစင်က ကိုမြင့်ဦး နဲ့ ဦးဘဝေ သားအကြီး ကိုဝင်းသိန်း ကိုဖမ်းသွားတယ်။ သူ့အဖေကို ရှာမရလို့ ကိုဝင်းသိန်း ကို ခေါ်သွားတာ။ ပြီးတော့ ပဲရင်းတောင်က ကိုသန်းစိုး နဲ့ ဦးတင်ဦး။ ဦးတင်ဦး ဆိုရင် တော်လှန်ရေးနဲ့ ဘာမှမဆိုင် ဘာမှလည်း မလုပ်ဖူးဘူး။ ဘာလို့ ဖမ်းသွားလဲ မသိဘူး” လို့ ဒေသခံ အမျိုးသမီး တစ်ဦးက မဲခေါင်သတင်းဌာနကို ပြောပါတယ်။
လွှစင်ရွာကို ဝင်ပြီးတဲ့နောက် လမ်းမကြီး တစ်ဘက်ခြမ်းမှာရှိတဲ့ ပဲရင်းတောင်ရွာက အိမ် ၂ လုံးကိုလည်း မီးထပ်ရှို့ပြီး ဦးမြင့်ဦး၊ ကိုသန်းစိုး၊ ဦးတင်ဦး တို့ကို ဖမ်းဆီးသွားခဲ့တယ်လို့ ဆိုပါတယ်။
စစ်တပ်နဲ့ ပျူစောထီးတွေ လအတော်ကြာ တပ်စွဲ စိုးမိုးခံထားရတဲ့ လွှစင်ရွာက ဒေသခံ အမျိုးသမီး၊ ကလေးငယ်တွေ အပါအဝင် လူငယ်တွေဟာ မကြာခဏ ဖမ်းဆီး နှိပ်စက် ခံနေကြရပါတယ်။
ပဲရင်းတောင်ရွာဟာ ၂၀၂၂ ခုနှစ်၊ ဧပြီလ တိုက်ပွဲမှာ လေကြောင်း တိုက်ခိုက်ခံခဲ့ရ သလို ဒေသခံ ရွာသား ၉ ဦးကိုလည်း စစ်တပ်က PDF လို့ စွပ်စွဲကာ အစုအပြုံလိုက် သတ်ဖြတ်ခဲ့တဲ့ရွာ ဖြစ်ပါတယ်။
စစ်တပ် လက်အောက်ခံ ဓနုကိုယ်ပိုင်အုပ်ချုပ်ခွင့်ရ ဒေသအတွင်း ဓနုပြည်သူ့လွတ်မြောက်ရေးတပ်ဦး – DPLA ဖွဲ့စည်းပြီးကြောင်း ကြေညာပြီးနောက် စစ်တပ်နဲ့ ပျူစောထီးတွေဟာ ပင်းတယနဲ့ ရွာငံဒေသမှာ လုံခြုံရေး တင်းကြပ်ထားပြီး စစ်ဆေးရေးဂိတ်တွေမှာ စစ်ဆေးတာတွေ ကြမ်းလာတယ်လို့ ဒေသခံတွေက ပြောပါတယ်။
ဓာတ်ပုံ – ၂၀၂၂ ခုနှစ်က မီးရှို့ခံရတဲ့ ပဲရင်းတောင်ရွာမှ နေအိမ် တချို့ (ပုံဟောင်း)
CJ-001