မဲခေါင်၊ ဩဂုတ် ၂
“ဒုတ်များဖြည့်တင်းဖို့ကူရင်း ကားယူစို့” ပေါက်ရင်ယူ မပေါက်ရင်လှူ ကမ်းပိန်း ပြီးဆုံးဖို့ ၅ ရက်သာ ကျန်တော့တဲ့ လက်ရှိအချိန်ထိ ၆၀ ရာခိုင်နှုန်းသာ ရသေးတာကြောင့် ဝိုင်းဝန်း ကူညီပေးကြဖို့ KNDF တပ်ရင်း အမှတ် (၁၂) တပ်ရင်းမှူးက တိုက်တွန်းပြောဆို လိုက်ပါတယ်။
ကရင်နီ အမျိုးသား ကာကွယ်ရေးတပ်-KNDF တပ်ရင်း အမှတ် (၁၂) အတွက် လက်နက်ဖြည့်တင်းဖို့ ပြုလုပ်တဲ့ ဒီကမ်ပိန်းဟာ ဩဂုတ်လ ၇ ရက်မှာ ပြီးဆုံးမှာ ဖြစ်ပေမယ့် လက်ရှိအချိန်ထိ ကမ်ပိန်း ၆၀ ရာခိုင်နှုန်းသာ ရရှိသေးတယ်လို့ တပ်ရင်းမှူးက ပြောပါတယ်။
“ကျွန်တော်တို့ တပ်ရင်းမှာ လက်နက်ခဲယမ်း မလုံလောက်မှုကြောင့် စိတ်ဆန္ဒရှိတိုင်း မတိုက်နိုင်ခဲ့ဘူး။ လက်နက်များ မဖြည့်ဆည်းပေးနိုင်တဲ့ အတွက်ကြောင့် ကျွန်တော်တို့ ရဲဘော်တွေလည်း မျက်နှာငယ်ခဲ့ရပါတယ်။ ဒါကြောင့် မိဘပြည်သူများလည်း ဒီကမ်ပိန်းကို ဆက်လက်ပြီးတော့ ပါဝင်ပေးကြဖို့ ကျွန်တော့် အနေနဲ့ မေတ္တာရပ်ခံပါတယ်” လို့ KNDF တပ်ရင်းအမှတ် (၁၂) တပ်ရင်းမှူးက ပြောပါတယ်။
လက်ရှိမှာ ” ဒုတ်များဖြည့်တင်းဖို့ကူရင်း ကားယူစို့” ကမ်ပိန်း ကံစမ်းမဲ လက်မှတ် တစ်စောင် ၁၅,၀၀၀ ကျပ်နဲ့ ဩဂုတ်လ ၇ ရက်နေ့အထိ ရောင်းချနေတာဖြစ်ပြီး ကမ်ပိန်း ကာလအတွင်း ကံစမ်းမဲ အစောင် ၄,၀၀၀ ရောင်းချသွားမှာ ဖြစ်ပါတယ်။
ကံစမ်းမဲ ဆုလက်ဆောင်တွေကတော့ ပထမဆု CRV RD-5 ကားတစ်စီး၊ ဒုတိယဆု ရွှေဆွဲကြိုး တစ်ကုံး၊ တတိယဆု laptop တစ်လုံး ၊ စတုထ္တဆု Redmi Note 12 pro ဖုန်းတစ်လုံးတို့ကို ဆုချီးမြှင့်မှာ ဖြစ်ပါတယ်။
“ကျွန်တော်တို့ တပ်ရင်းမှာ လက်နက်ခဲယမ်းတွေ မလုံလောက်တဲ့ အတွက်ကြောင့် ဒုတ်များဖြည့်တင်းဖို့ ကူရင်း ကားယူစို့ ကမ်ပိန်းကို ပြုလုပ်ရခြင်း ဖြစ်ပါတယ်။ အခုလည်း ၁၀၀ ရာခိုင်နှုန်းမှာ ၆၀ ရာခိုင်နှုန်းပဲ ရရှိသေးတယ်” လို့ KNDF တပ်ရင်း (၁၂) တပ်ရင်းမှူးက ပြောပါတယ်။
ဒီကမ်ပိန်းက ရတဲ့ ငွေတွေနဲ့ ရဲဘော်တွေအတွက် လက်နက်များ ဖြည့်တင်းသွားမှာဖြစ်ပြီး ကမ်းပိန်း မအောင်မြင်ရင် တပ်ရင်း အနေနဲ့ အခက်အခဲများစွာ ရင်ဆိုင်ရနိုင်လို့ အတတ်နိုင်ဆုံး ဝိုင်းဝန်း ကူညီပေးကြဖို့ KNDF တပ်ရင်း (၁၂) က တိုက်တွန်းထားပါတယ်။
CJ-002
#MekongNews
#ဒုတ်များဖြည့်တင်းဖို့ကူရင်းကားယူစို့
#KNDF
#လက်နက်ခဲယမ်း
