မဲခေါင်၊ မေ ၁၆
ကရင်နီပြည်၊ ဒီးမော့ဆို အရှေ့ခြမ်းကို မေလ ၁၅ ရက်က စစ်ကောင်စီ တပ်ရင်း ၃ ရင်းပေါင်းပြီး အင်အား အမြောက်အများနဲ့ ထိုးစစ်ဆင်နေလို့ တိုက်ပွဲတွေ ပြင်းထန်နေတယ်လို့ ကရင်နီ စစ်ဘက်ဆိုင်ရာ ပြန်ကြားရေး ပြောရေးဆိုခွင့်ရှိသူက မဲခေါင်သတင်းဌာနကို ဒီကနေ့ မေလ ၁၆ ရက်မှာ ပြောပါတယ်။
မေလ ၁၅ ရက်၊ နေ့လယ်ပိုင်းမှာ တပ်မ (၆၆) တပ်မမှူး ဦးစီးပြီး ထိုးစစ်ဆင်လာရာ တိုက်ပွဲမှာ စစ်ကောင်စီ တပ်သားတွေ ထိခိုက်သေဆုံးမှု ရှိပေမဲ့ အတိအကျ မသိရသေးဘူးလို့ သူက ပြောပါတယ်။
“ဖြစ်တာတော့ မနေ့က နေ့လယ်လောက်ပေါ့။ ဒေါ့ကလော်ဒူ ဘက်မှာ ထိုးစစ်ဆင်လာတာပေါ့။ တပ်ရင်း ၃ ရင်း ပေါင်းတိုက်တာ။ တစ်ရင်းကို အင်အား ၇၀၊ ၈၀ လောက်ရှိမယ်။ ပြီးတော့ အဲ့မှာက တပ်မ (၆၆) တပ်မမှူး ထိုင်တာ ဆိုတော့ စကခ (၂) တို့ ဘာတို့လည်း ပါလာနိုင်တယ်။ တိုက်ပွဲတွေမှာ သူတို့ဘက်က ထိခိုက် သေဆုံးမှုတော့ ရှိနိုင်တယ်။ အတိအကျတော့ မသိသေးဘူး။ ကိုယ့်ဘက်ကတော့ KA က ရဲဘော်တစ်ဦး ကျတယ်” လို့ ပြန်ကြားရေး တာဝန်ရှိသူက ပြောပါတယ်။
တိုက်ပွဲအတွင်း စစ်ကောင်စီက လက်နက်ကြီး အလွန်အကျွံ ပစ်ခတ်ပြီး လူအင်အား အများအပြားနဲ့ ထိုးစစ်ဆင်ပေမဲ့ ကရင်နီ တော်လှန်ရေး အင်အားစုတွေကို မကျော်နိုင်သေးဘူးလို့ သူကဆိုပါတယ်။
ဒီးမော့ဆို အရှေ့ခြမ်းမှာ ဖြစ်ပွားနေတဲ့ တိုက်ပွဲတွေကြောင့် ဒေသခံ ပြည်သူ သောင်းနဲ့ချီကာ ဆီဆိုင်မြို့နယ်နဲ့ ဒီးမော့ဆို အနောက်ခြမ်းက စစ်ရှောင်စခန်းတွေမှာ တိမ်းရှောင်နေရပြီး စားနပ်ရိက္ခာ၊ ဆေးဝါးနဲ့ အမိုးအကာတွေ လိုအပ်နေတယ်လို့ စစ်ရှောင် ကူညီနေသူ တစ်ဦးက ပြောပါတယ်။
MK-007
#MeKongNews
#ဒီးမော့ဆို
#တပ်မ(၆၆)
#KNDF