မဲခေါင်၊ ဧပြီ ၂၈
ကရင်နီပြည်၊ ဒီးမော့ဆို အနောက်ဘက်ခြမ်းရှိ စစ်ဘေးရှောင် စခန်းတွေကို စစ်ကောင်စီက ဂျက်လေယာဉ်နဲ့ မနေ့ညက ပစ်ခတ် တိုက်ခိုက်သွားတယ်လို့ စစ်ဘေးရှောင် ကူညီနေတဲ့ အဖွဲ့အစည်းတွေထံက သိရပါတယ်။
ဧပြီ ၂၇ ရက်၊ ည ၁၁ နာရီခွဲ ဝန်းကျင်မှာ စစ်ကောင်စီ ဂျက်လေယာဉ် တစ်စီး ဒီးမော့ဆို အနောက်ဘက်ခြမ်းက စစ်ဘေးရှောင် စခန်းကို လာရောက် ပစ်ခတ်ရာ ပြည်သူတချို့ ထိခိုက်ဒဏ်ရာ ရခဲ့တယ်လို့ စစ်ဘေးရှောင် ကူညီစောင့်ရှောက်ရေးအဖွဲ့ တစ်ခုက ပြောပါတယ်။
“ကင်းထောက်ကတော့ အမြဲလာထောက်တာပေါ့။ ပြီးမှ ကြဲတာပေါ့။ တိုက်ပွဲဖြစ်တဲ့ နေရာကို ပစ်တာ မဟုတ်ဘူး။ သူတို့က အခုက ဆေးရုံ၊ ဈေး၊ ကျောင်း၊ စစ်ရှောင် အဲ့ဒါတွေကို ပစ်မှတ်ထားနေတယ်” လို့ စစ်ဘေးရှောင် ကူညီပေးနေသူ ဒေသခံ အမျိုးသား တစ်ဦးက မဲခေါင်သတင်းကို ပြောပါတယ်။
ဂျက်လေယာဉ်နဲ့ ပစ်ခတ်မှုကြောင့် စစ်ရှောင်စခန်းက တဲအိမ်တွေ ပျက်စီးပြီး စစ်ရှောင် ပြည်သူ တချို့ ထိခိုက် ဒဏ်ရာရပေမယ့် အချက်အလက် အတိအကျကိုတော့ မဲခေါင်သတင်းက ဆက်လက် စုံစမ်းနေဆဲ ဖြစ်ပါတယ်။
စစ်ကောင်စီတပ်တွေဟာ တိုက်ပွဲ ဖြစ်ပွားမှု မရှိတဲ့ ဒီးမော့ဆို အနောက်ခြမ်းက စစ်ရှောင် စခန်းတွေကို လေကြောင်းက ဗုံးကြဲ တိုက်ခိုက်တာအပြင် လက်နက်ကြီးနဲ့ ညစဉ် ပစ်ခတ်နေတယ်လို့ ဒေသခံတွေက ဆိုပါတယ်။
ပြီးခဲ့တဲ့ ဧပြီ ၂၅ ရက်နေ့ကလည်း ဖယ်ခုံမြို့ အနောက်ဘက်မှာရှိတဲ့ ဆောင်းဖွေးဆေးရုံကို လေကြောင်းကနေ ဗုံးကြဲ တိုက်ခိုက်ခဲ့တာကြောင့် ဆေးရုံထဲက လူနာတွေ ထွက်ပြေးခဲ့ရပြီး ထိခိုက်မှုတွေ ရှိခဲ့ပါတယ်။
စစ်အာဏာသိမ်းပြီးနောက် ကရင်နီပြည် အတွင်း လေကြောင်း တိုက်ခိုက်မှု ၃၁၀ ကြိမ်၊ လက်နက်ကြီးနဲ့ လေကြောင်း တိုက်ခိုက်မှုကြောင့် သေဆုံးရတဲ့ စစ်ဘေးရှောင် ၁၃၄ ဦးအထိ ရှိလာတယ်လို့ တိုးတက်သော ကရင်နီ ပြည်သူ့အင်အားစု PKPF က ဧပြီလ ၁ ရက်နေ့မှာ ထုတ်ပြန်ထားပါတယ်။
MK-009
#MeKongNews
#ဒီးမော့ဆို
#စစ်ေးရှောင်စခန်း
#ဂျက်လေယာဉ်