မဲခေါင်၊ ဇန်နဝါရီ ၁၈
စစ်ကိုင်းတိုင်း၊ ဒီပဲယင်းမြို့နယ်၊ ချောင်းနားရွာသား တစ်ဦးဟာ စစ်တပ်ရဲ့ ဖမ်းဆီးနှိပ်စက်ခံရချိန်က ရရှိခဲ့တဲ့ ဒဏ်ရာတွေနဲ့ မနေ့က ကွယ်လွန်သွားတယ်လို့ ဒေသခံတွေထံက သိရပါတယ်။
ကွယ်လွန်သူဟာ အသက် ၄၅ နှစ်အရွယ် ဦးသိန်းထွန်း ဖြစ်ပြီး ဇန်နဝါရီ ၉ ရက်နေ့က ဒီပဲယင်းမြို့နယ်ထဲ စစ်ကြောင်းထိုးခဲ့တဲ့ စစ်တပ်ရဲ့ ဖမ်းဆီးမှုကို ခံခဲ့ရပြီး ဇန်နဝါရီ ၁၁ ရက်နေ့မှာ ရိုက်နှက်နှိပ်စက်ထားတဲ့ ဒဏ်ရာတွေနဲ့ ပြန်လည် လွတ်မြောက်ခဲ့တာ ဖြစ်ပါတယ်။
ဦးသိန်းထွန်းနဲ့အတူ ဖမ်းဆီးခံခဲ့ရတဲ့ ရွာသား တစ်ဦးကတော့ ပြန်လည် လွတ်မြောက်လာပြီးနောက် ကျန်းမာရေး ကောင်းမွန်လျက် ရှိတယ်လို့ သိရပါတယ်။
ဇန်နဝါရီ ၉ ရက်မှာ ချောင်းနားကျေးရွာထဲ ဝင်ရောက်လာတဲ့ မော်လိုက် အခြေစိုက် ခမရ (၃၆၄) နဲ့ မှော်ဘီ-ထူးကြီး အခြေစိုက် ခလရ (၇၀၁) တပ်ဟာ ဒေသခံတွေရဲ့ နေအိမ် ၁၄ လုံးကိုလည်း မီးရှို့ဖျက်ဆီး ခဲ့ပါတယ်။
အဲ့ဒီ စစ်ကြောင်းဟာ ဇန်နဝါရီ ၁၄ နဲ့ ၁၅ ရက်တွေမှာ ရေဦးမြို့နယ်ထဲ ဝင်ရောက်ပြီး ချမ်းသာကြီးကျေးရွာက နှစ်ပေါင်း ၁၂၉ နှစ်နီးပါး သက်တမ်းရှိ ရှေးဟောင်း သမိုင်းဝင် ရိုမန်ကတ်သလစ် ဘုရားကျောင်း အပါအဝင် ရွာလုံးကျွတ်နီးပါး မီးရှို့ဖျက်ဆီး ခဲ့ပါတယ်။
ဒီပဲယင်းမြို့နယ်မှာ ဒီဇင်ဘာနဲ့ ဇန်နဝါရီလ ၂ လအတွင်း နေအိမ်ပေါင်း ၃,၅၁၄ အိမ်၊ ဈေးဆိုင်ခန်း ၂၄ ခန်း၊ ဆန်စက် ၃ လုံးနဲ့ ဘုန်းကြီးကျောင်း ၅ ကျောင်း မီးရှို့ဖျက်ဆီး ခံခဲ့ရပါတယ်။
စစ်တပ် အာဏာသိမ်းပြီးနောက် ၂ နှစ်ကာလ အတွင်း ဒီပဲယင်းမြို့နယ်က နေအိမ် ၄,၁၈၉ လုံး မီးရှို့ဖျက်ဆီး ခံခဲ့ရတာဖြစ်ပြီး တစ်နိုင်ငံလုံးမှာ အများဆုံး မီးရှို့ဖျက်ဆီး ခံခဲ့ရတာ ဖြစ်ပါတယ်။
MK-009