မဲခေါင်၊ ဖေဖော်ဝါရီ ၂၂
ရန်ကုန်တိုင်း၊ ဒဂုံဆိပ်ကမ်းမြို့နယ် ၉၄ ရပ်ကွက် ၊ ယုဇနဥယျာဥ်မြို့တော်၊ ကံကော်လမ်း စျေးတန်းကို စစ်တပ်၊ရဲနဲ့ ပျူစောထီးလူမိုက်များ လက်နက်များကိုင်ဆောင်ပြီး ဒီကနေ့ နေ့လည် ၁၂ နာရီ အတွင်း အကုန်ဖျက်သိမ်းရမည်လို့ကြေငြာပြီး စျေးဆိုင်တွေကို ဖျက်ဆီးနေတယ်လို့ ဒေသခံတွေက မဲခေါင်သတင်းဌာန ကိုပြောပါတယ်။
ဒီကနေ့မနက် ဖေဖော်ဝါရီ ၂၂ ရက်နေ့ နေ့လည်ပိုင်းက ယုဇနဥယျဥ်မြို့တော် ၉လမ်းထိပ်တွင် စစ်ကောင်စီအဖွဲ့ဝင်တွေနဲ့ ပျူစောထီးလူမိုက်တွေ စုရုံးနေပြီးနောက် ကံကော်လမ်း စျေးတန်းကို အင်အားအများအပြားနဲ့ ဝင်ရောက်လာပြီးနောက် စျေးသည်တွေကို ဆိုင်တွေဖျက်ခိုင်းနေတာဖြစ်တယ်လို့ သူကပြောပါတယ်။
“ ငှက်ကြီးတောင်ဓားတွေနဲ့လူအိုက်ကောင်တွေအရွယ်စုံပါတယ်။ စစ်တပ်နဲ့ရဲတွေကတော့ကြည့်နေတာတွေရှိတယ်။ဘယ်သူမှလည်းဓာတ်ပုံမရိုက်ရဲကြဘူး။ သူတို့ကလည်းလူတွေဘယ်သူကင်မရာနဲ့ ရိုက်နေလဲဆိုတာအရပ်ဝတ်တွေနဲ့လိုက်ကြည့်နေတယ်။ စျေးသည်တွေကတော့ခွေးမောင်းသလိုမောင်းခံနေရတာ။ ခုချိန်ထိစျေးသည်တွေပြေးလွှားနေကြတုန်းဘဲ” လို့ရပ်ကွက်နေပြည်သူတစ်ဦးကပြောပါတယ်။
ဖေဖော်ဝါရီ ၁၉ ရက် နေ့လည် ၃ နာရီကျော်အချိန်က ၉၄ ရပ်ကွက်အုပ်ချုပ်ရေးမှူးရုံးကို သေနတ်နဲ့လာရောက်ပစ်ခတ်ခဲ့တဲ့အတွက် ရာအိမ်မှူး၂ဦး သေဆုံးခဲ့ပြီး အမျိုးသား ၃ ဦးနဲ့ အမျိုးသမီးတစ်ဦး ထိခိုက်ဒဏ်ရာရရှိခဲ့ပြီးနောက် စစ်ကောင်စီက ဒဂုံဆိပ်ကမ်းမြို့နယ်အတွင်းနေ့စဥ် လုံခြုံရေးတင်းကြပ်နေတယ်လို့ သူကပြောပါတယ်။
ယုဇနဥယျာဥ်မြို့တော်အိမ်ရာအတွင်း စစ်ကောင်စီက နေအိမ်အားလုံး ဧည့်စာရင်းအကြောင်းပြကာ ဝင်ရောက်စစ်ဆေးမှုတွေ ပြုလုပ်ခဲ့ပြီး အရပ်ဝတ်တွေနဲ့ ရပ်ကွက်အတွင်း လှည့်လည်စောင့်ကြည့်မှုတွေ ရှိနေတယ်လို့ ဒေသခံတွေက ပြောပါတယ်။
MK-005
