မဲခေါင်၊ မေ ၄
ကရင်နီပြည်၊ မယ်စဲ့မြို့နယ် ထိုင်း-ကရင်နီ နယ်စပ် ထွက်ပြေး တိမ်းရှောင်လာတဲ့ စစ်ရှောင်တွေဟာ ကုန်ဈေးနှုန်းကြီးမြင့်မှုနဲ့ စားသောက်ကုန် ရှားပါးမှုတွေ ကြုံတွေ့နေရတယ်လို့ စစ်ဘေးရှောင် ကူညီသူတွေထံက သိရပါတယ်။
မယ်စဲ့မြို့နယ်ကို ဖားဆောင်း၊ ဘော်လခဲ အပြင် ဖရူဆိုနဲ့ ဒီးမော့ဆိုဘက်က စစ်ရှောင် တချို့ ရောက်ရှိလာတဲ့ အတွက် စစ်ရှောင် ၃,၀၀၀ ဝန်းကျင်ရှိနေပြီး အခုလို စားဝတ်နေရေး အခက်အခဲနဲ့ ကြုံနေရတာ ဖြစ်ပါတယ်။
“အဲ့မှာ စားသောက်စရိတ် သိပ်ကြီးတာ၊ အကုန် ၂ ဆ။ အသီးအရွက်က အစနော်။ စိုက်မယ့်သူ မရှိတော့လေ။ အခု ကျွန်တော် နေနေတဲ့ နေရာထက် အများကြီး အစားသောက်ခက်ခဲတယ်။ တိုက်ပွဲ မရှိသေးတာ တစ်ခုကလွဲရင်။ နယ်စပ်ဆိုတော့ အကုန်ဒီဘက်ကသယ် မဟုတ်ရင် ထိုင်းက သယ်ကြတာ” လို့ ဒီးမော့ဆို ဒေသခံ စစ်ဘေးရှောင် ကူညီသူ တစ်ဦးက ပြောပါတယ်။
အခုရက်ပိုင်း ကရင်နီပြည်မှာ စစ်ကောင်စီနဲ့ KNDF ပူးပေါင်းတပ်တွေ တိုက်ပွဲ ပြင်းထန်နေတာကြောင့် ဖားဆောင်း၊ ဘော်လခဲ ကနေ မယ်စဲ့ မြို့နယ်တွင်း သွားရောက်နိုင်တဲ့ လမ်းကြောတွေ ပိတ်နေတဲ့အပြင် ထိုင်းဘက်က ကုန်ပစ္စည်းနဲ့ စားသောက်စရာ ဝင်ရောက်တာ မရှိဘူးလို့ ဒေသခံတွေက ဆိုပါတယ်။
“ဆန်ဈေးကတော့ ခေါင်ခိုက်ပေါ့။ ၂ ဆကျော် ၃ ဆနီးပါး။ တချို့ဆို ၃ ဆကျော် ၄ ဆနီးပါးပဲ။ ဒီကြားထဲ အဲ့ဘက်ကို သွားဖို့ရှိပါတယ်။ ငွေနည်းနည်း လိုနေသေးလို့ စောင့်နေတာ။ မိုးမကျခင် ရအောင်သွားမယ်” လို့ စစ်ရှောင် ကူညီသူက ပြောပါတယ်။
လက်ရှိ မယ်စဲ့မြို့နယ်အတွင်း တိုက်ပွဲ ဖြစ်ပွားတာ မရှိပေမယ့် ကရင်နီပြည်တွင်းက စစ်ရှောင်တွေ ရောက်လာလို့ ကုန်ဈေးနှုန်းတွေ ထပ်တက်လာတယ်လို့ ဆိုပါတယ်။
စစ်ကောင်စီတပ်ဟာ ဒီးမော့ဆို၊ ရှားတော၊ လွိုင်ကော်၊ ဘော်လခဲ မြို့နယ်တွေအပြင် ရှမ်းတောင် ဖယ်ခုံ၊ ပင်လောင်း ဘက်ကပါ စစ်ကြောင်းထိုးနေတာကြောင့် ကရင်နီ တော်လှန်ရေး ပူးပေါင်းတပ်ဖွဲ့တွေနဲ့ တိုက်ပွဲ နေ့စဉ် ဖြစ်ပွားနေတယ်လို့ KNDF က မေလ ၃ ရက်မှာ ထုတ်ပြန်ထားပါတယ်။
ကုလသမဂ္ဂ လူသားချင်း စာနာမှုဆိုင်ရာ ညှိနှိုင်းရေးရုံး-UNOCHA ရဲ့ မေလ ၃ ရက်မှာ ထုတ်ပြန်ထားတဲ့ စာရင်းအရ အာဏာသိမ်း ၂ နှစ်ကျော်ကာလ အတွင်း လက်နက်ကိုင် ပဋိပက္ခတွေကြောင့် အိုးအိမ်စွန့်ခွာ ထွက်ပြေးနေရတဲ့ စစ်ရှောင် ၁ ဒသမ ၈ သန်းခန့်ရှိနေပြီး ကရင်နီပြည်က လူဦးရေ ၂ သိန်းကျော် ပါဝင်ပါတယ်။
MK-009
#MeKongNews
#ကရင်နီပြည်
#စစ်ဘေးရှောင်
#မယ်စဲ့မြို့နယ်
