မဲခေါင်၊ ဇန်နဝါရီလ ၂၂
ထိုင်းဘတ်ဈေး မြင့်တက်နေတာကြောင့် ထိုင်းကုန်ပစ္စည်းတင်သွင်းသူကုန်သည်တွေ ပြန်လည်ရောင်းချရာမှာ အခက်အခဲတွေရှိနေတယ်လို့ သိရပါတယ်။
၂၀၂၂ ခုနှစ် နှစ်ကုန်ပိုင်းက တစ်ဘတ် ကို မြန်မာကျပ်ငွေ ၈၁ ကျပ်သာရှိခဲ့ရာကနေ ၂၀၂၃ ခုနှစ် ဇန်နဝါရီလ အစမှာတော့ တစ်ဘတ် ကို ၈၃ ကျပ် ဖြစ်ပြီး ဒီနေ့မှာတော့ ၈၇ ကျပ် ထိ မြင့်တက်လာတယ်လို့ သိရပါတယ်။
“ ဘတ်စျေးအတက်အကျက ကာလတိုဖြစ်ပျက်တတ်တဲ့သဘော ရှိပေမယ့် အခုနှစ်စကတည်းက တဖြည်းဖြည်းတက်လာတော့ ကုန်မှာတဲ့ရက်မှာ တဈေး၊ ကုန်ပို့မယ့်နေ့မှာ ဈေးတက်လာတော့ ဒီကကုန်သည်တွေက အမြတ်ထဲကပါကုန်တယ်။ ဈေးတက်လို့ တက်ပြီးရောင်းလို့ မရဘူး။ ကုန်ပြတ်လပ်မှု မရှိအောင်သာမှာပြီးရောင်းနေရပေမယ့် အခက်အခဲတွေရှိနေတယ်လို့” အွန်လိုင်းက ထိုင်းအခြေခံစားသောက်ကုန် ရောင်းချနေသူတစ်ဦးက ဆိုပါတယ်။
ထိုင်းနိုင်ငံမှ တင်သွင်းဖြန့်ချိလာတဲ့ ကုန်စည်တွေ ဈေးနှုန်းမြင့်တက်မှုရှိနေတဲ့အပြင် လက်ရှိ ပြည်တွင်းလမ်းပန်ဆက်သွယ်ရေးအနေအထားကြောင့် တန်ဆာခတွေ ပိုဆောင်းပေးရကာ အမြတ်ကျန်မှုနည်းတယ်လို့လည်း သိရပါတယ်။
“ လမ်းကြေးပေးဆောင်ရတာတွေကလည်း အရင်ထက် များတယ်။ ဒီကြားထဲ စစ်ဆေးရေးဂိတ်တွေက သီးသန့်ငွေပေးရတာတွေလည်း ရှိတော့ တန်ဆာခက အရင်ထက်ပိုဆောင်းပြီး တောင်းနေရတယ်။ အရင် ၁ သောင်းလောက်ဆို အခုက ၁ သောင်းခွဲလောက် တောင်းနေရတာမျိုး ပြီးတော့ လမ်းမှာ နယ်မြေ မအေးချမ်းလို့ ဖြတ်မရရင် ညအိပ်စောင့်ကတာတွေ၊ ဆီဈေးတွေကတက်လာတော့ ကိုယ်အမြတ်ကျန်အောင်လည်း မနည်းလုပ်ဆောင်နေရတယ်” လို့ နယ်ကုန်စည်ပို့ဆောင်ရေး လုပ်ဆောင်နေသူတစ်ဦးက ဆိုပါတယ်။
စစ်ကောင်စီက ၂၀၂၂ ခုနှစ် စက်တင်ဘာ လဆန်းပိုင်းက နယ်စပ်ကုန်သွယ်ရေးနဲ့ ပတ်သတ်ပြီးကုန်သွယ်ရေးကို ဒေါ်လာ နဲ့သာ အရောင်းအဝယ်လုပ်ခိုင်းတာ၊ တင်ပို့မယ့်ကုန်ရဲ့ တန်ဖိုးငွေ ကြိုတင်သွင်းခိုင်းတာနဲ့ ပို့ကုန်သွင်းကုန်လိုင်စင်တွေ တင်းကျပ်မှုတွေကြောင့် အမေရိကန် ၁ ဒေါ်လာကို ၄၅၀၀ ဝန်းကျင်၊ ထိုင်းဘတ် ၁ ဘတ် ကို ၁၀၀ ကျော်အထိ မြင့်တက်ခဲ့ပြီး ယွမ်ဈေးမှာလည်း ၁ ယွမ်ကို ၅၀၀ နီးပါးခန့် မြင့်တက်ခဲ့ပါသေးတယ်။
MK-006
