ပြီးခဲ့တဲ့ ဒီဇင်ဘာ၂၈ ရက် ညပိုင်းမှာ ကိုဝင်းလွင်နဲ့ NLD ပါတီ တိုင်းပြန်ကြားရေး တာဝန်ခံ မမြရတနာထက်တို့ နေအိမ်မှာ ရှိနေစဉ် စစ်ကောင်စီတပ်တွေ ဝင်ရောက် ဖမ်းဆီးသွားပြီး ၂ ရက်အကြာမှာ အမျိုးသား ဖြစ်သူကို ရဲစခန်းမှ ပြန်လွှတ်ပေးခဲ့တယ်လို့ မြို့ခံတစ်ဦးက ဆိုပါတယ်။
စစ်အာဏာသိမ်းပြီး နောက်ပိုင်း ဖမ်းဝရမ်းထုတ် ခံရဖူးတဲ့ထဲမှာ သူပါတယ်။ အခု ဘာအမှုနဲ့ ဖမ်းဆီးခံရလည်း ဆိုတာ သေချာ မသိရသေးပါဘူး။ လက်ရှိ ရဲစခန်းမှာ ချုပ်ထားပြီး စစ်ဆေးနေဆဲလို့သာ သိရပါတယ်
လို့ သူကပြောပါတယ်။
ဒါ့အပြင် ကြက်စားပြင်ရပ်ကွက်၊ ကမ်းနားလမ်းရှိ အရက်ဆိုင်ပိုင်ရှင် ကိုမောင်လေးရဲ့ ဇနီးနဲ့ သားအပါဝင် အရက်ဝယ်သူတွေကိုလည်း မနေ့က မနက် ၁၀ နာရီခွဲခန့်မှာ စစ်ကောင်စီတပ်သားတွေ ဝင်ရောက် ဖမ်းဆီးသွားတယ်လို့ သူက ဆက်လက်ပြောပါတယ်။
အဲဒီ အမျိုးသမီးနဲ့ အမျိုးသား စုစုပေါင်း ၇ ဦးကိုဖမ်းဆီးပြီး ညနေပိုင်းမှာ ကိုမောင်လေးရဲ့ နေအိမ်ကို စစ်ကောင်စီတပ်တွေ ထပ်မံ ရှာဖွေစစ်ဆေးမှုပြုလုပ်ခဲ့ပြီး သူတို့ကို ဘာကြောင့် ဖမ်းဆီးသွားတယ်ဆိုတာ မသိရသေးဘူးလို့လည်း သိရပါတယ်။
ကြက်စားပြင်ရပ်ကွက်မှာ ပြီးခဲ့တဲ့ ဒီဇင်ဘာလ ၂၇ ရက် ညပိုင်းကလည်း ထားဝယ်နာရေးကူညီမှုအသင်း အတွင်းရေးမှူး လင်မယားကို စစ်ကောင်စီတပ်သားတွေ ဖမ်းဆီးပြီး ၂ ရက်အကြာမှာ ပြန်လွှတ်ပေးခဲ့တယ်လို့Dawei Information Center က ဆိုပါတယ်။