မဲခေါင်၊ ဩဂုတ် ၁၈
နယ်ပယ်ပေါင်းစုံမှာ ကျရှုံးနေတဲ့ စစ်တပ်နဲ့ စစ်ကောင်စီကို အနည်းငယ်မျှ နားခွင့်မပေးဘဲ အမြစ်ပြတ်တဲ့အထိ ဝိုင်းပတ်ချေမှုန်းမယ့် တော်လှန်ရေးရဲ့ အဆုံးအဖြတ်ကာလ မကြာခင် ရောက်လာတော့မှာကို ယုံကြည်တယ်လို့ NUG ကာကွယ်ရေးဝန်ကြီးဌာနက ပြောပါတယ်။
မနေ့က ကျရောက်တဲ့ ကရင်နီပြည် တပ်မတော်-KA ရဲ့ (၇၅) နှစ်ပြည့်သို့ ပေးပို့တဲ့ သဝဏ်လွှာမှာ NUG ရဲ့ ကာကွယ်ရေးဝန်ကြီးဌာနက အဲ့ဒီလို ပြောဆိုထားတာ ဖြစ်ပါတယ်။
စစ်မြေပြင်မှာ အထိနာနေတဲ့ စစ်ကောင်စီတပ်ဟာ ၂၀၂၂ ခုနှစ်၊ ဒီဇင်ဘာလက စပြီး လေကြောင်း၊ သံချပ်ကာ၊ လက်နက်ကြီး အမြောက်၊ အတွဲလိုက်ပစ်ဒုံးတွေ အလွန်အကျွံ အသုံးပြုပြီး ကရင်နီပြည်နယ်ကို ယနေ့အထိ ထိုးစစ်ဆင်နေတယ်လို့ NUG ကာကွယ်ရေးဝန်ကြီးဌာနက ပြောပါတယ်။
ဒါ့ပေမယ့် စစ်ကောင်စီ အနေနဲ့ ရုပ်ပိုင်းဆိုင်ရာအင်အား ဘယ်လိုပဲ သာလွန်နေပါစေ ကရင်နီပြည် စစ်မြေပြင်မှာ စစ်ကောင်စီတပ်ဟာ အလူးအလဲ ရှုံးနိမ့်လျက် ရှိတယ်လို့ သဝဏ်လွှာမှာ ဖော်ပြထားပါတယ်။
တော်လှန်ရေး ၂ နှစ်တာ ကာလအတွင်း ကရင်နီ တပ်မတော်နဲ့တကွ ကရင်နီ အမျိုးသား တော်လှန်ရေးတပ်ဖွဲ့ တွေရဲ့ စုစည်းညီညွတ်မှု၊ ကြိုးစားအားထုတ်မှု၊ စွန့်လွှတ် အနစ်နာခံမှုတွေကို မျက်ဝါးထင်ထင် တွေ့မြင်ခဲ့ပြီး ဖြစ်တယ်လို့ သဝဏ်လွှာမှာ ဖော်ပြထားပါတယ်။
ကရင်နီပြည် တပ်မတော်၊ ကရင်နီ အမျိုးသားများ ကာကွယ်ရေးတပ်နဲ့ အခြားသော တော်လှန်ရေး တပ်ဖွဲ့များရဲ့ ထက်သန်ပြင်းပြတဲ့ တော်လှန်တိုက်ခိုက်လိုစိတ်၊ စစ်ရေးစွမ်းရည်နဲ့ ပူးပေါင်း အားထုတ်မှုတွေကို အလေးအနက် ဦးညွတ် အသိတ်အမှတ် ပြုတယ်လို့လည်း သဝဏ်လွှာမှာ ဖော်ပြထားပါတယ်။
မနေ့က ကျရောက်တဲ့ ကရင်နီပြည် တပ်မတော်-KA ရဲ့ (၇၅) နှစ်ပြည့် အခမ်းအနားကို ကရင်နီပြည်နယ် တစ်နေရာမှာ ကျင်းပခဲ့ရာ သက်ဆိုင်ရာ တပ်မှူး၊ တပ်ဗိုလ်များ၊ ရဲဘော်ရဲဘက်များနဲ့ ပြည်သူလူထုများ တက်ရောက်ခဲ့ပါတယ်။
CJ 002
#MeKongNews
#NUG
#ကရင်နီပြည်_တပ်မတော်နေ့
#တော်လှန်ရေး
