တောင်ကြီးမြို့၊ အဝေရာမီးပုံးပျံကွင်းမှာ (၇၅) နှစ်မြောက် စိန်ရတုလွတ်လပ်ရေးနေ့အထိမ်းအမှတ် ဈေးရောင်းပွဲတော်ကို ဒီဇင်ဘာလ ၂၈ ရက်ကနေ ဇန်နဝါရီလ ၄ ရက်အထိ ကျင်းပပြုလုပ်နေတာဖြစ်ပြီး ဒီကနေ့၊ နေ့လယ် ၁၂ နာရီဝန်းကျင်အထိ လာရောက်လည်ပတ်သူ ဆယ်ဂဏန်း မပြည့်ဘူးလို့ သိရပါတယ်။
၁၀ ယောက်ကျော်ရင်တောင် ကံကောင်းပေါ့။ မနေ့က ဖွင့်ပွဲလုပ်တော့ လူနည်းနည်းရှိသေးတယ်။ အဲဒီနောက်ပိုင်း ဘယ်သူမှ မလာဘူး။ ဌာနဆိုင်ရာ ဝန်ထမ်းတွေနဲ့ ကုမ္ပဏီဝန်ထမ်းတွေပဲရှိတာ။ အဲဒါကိုတောင် အဝင်ပေါက် ၂ ပေါက်လုံးမှာ လုံခြုံရေး အများကြီး ချထားသေးတယ်
လို့ ဒေသခံတစ်ဦးက ပြောပါတယ်။
အဲဒီကုန်စည်ပြပွဲနဲ့ ဈေးရောင်းပွဲတော်ကို ဆိုင်ခန်း ၄၀ ကျော်နဲ့ ပြုလုပ်နေတာ ဖြစ်ပေမယ့် ဆိုင်ခန်းအများစုဟာ ဒီကနေ့အထိ ဈေးဦးတောင် မပေါက်သေးဘူးလို့ သူကဆက်ပြောပါတယ်။
ဒီကုန်စည်ပြပွဲမှာ စစ်ကောင်စီလက်အောက်ခံ အသေးစားစက်မှုလုပ်ငန်းဦးစီးဌာန၊ စားသုံးသူရေးရာဦးစီးဌာနတို့ရဲ့ ကုန်စည်ပြခန်းအပြင် စစ်ကောင်စီနဲ့ နီးစပ်တဲ့ စီးပွားရေးလုပ်ငန်းရှင် ၄၀ ခန့်ရဲ့ ဆိုင်ခန်းတွေ ဖွင့်လှစ်ပြသထားတယ်လို့ သိရပါတယ်။
ပြီးခဲ့တဲ့ နိုဝင်ဘာလ တတိယပါတ်အတွင်းကလည်း တောင်ကြီးမြို့၊ ရေအေးကွင်းရပ်ကွက်ရှိ ခရစ်ယာန် ဘာသာရေးဝန်းနဲ့ VX Bar မှာ စစ်ကောင်စီက ဦးစီးပြီး ဈေးရောင်းပွဲတော် ကျင်းပဖို့ စီစဉ်ခဲ့ပေမယ့် ဒေသခံတွေ ဝေဖန်ကန့်ကွက်မှုကြောင့် ဖျက်သိမ်းခဲ့တယ်လို့လည်း သိရပါတယ်။
