မဲခေါင်၊ စက်တင်ဘာ ၉
ရှမ်းပြည်နယ် တောင်ပိုင်း၊ တောင်ကြီးမြို့၊ ရတနာသီရီရပ်ကွက်မှာ “ရပ်ကွက်အတွင်း နေထိုင်သူတို့၏ ဝတ္တရားများ” စာအုပ်ကို ရပ်ကွက်ရုံးက တစ်အိမ်ထောင်စုလျှင် တစ်အုပ် မဝယ်မနေရ ဆိုကာ လိုက်လံ ရောင်းချနေတယ်လို့ ရပ်ကွက်နေ ပြည်သူတွေက ပြောပါတယ်။
ဒီစာအုပ်ကို ဩဂုတ်လ ကတည်းက ရတနာသီရိရပ်ကွက် ဥက္ကဌ ဖြစ်သူ ဦးသားအို က ရောင်းချခိုင်းလို့ နယ်မြေအလိုက် တအိမ်တက်ဆင်း လိုက်လံ ရောင်းချနေတာလို့ ရာအိမ်မှူးနဲ့ ဆယ်အိမ်မှူးတွေက ပြောဆိုတယ်လို့ ဒေသခံတွေက ဆိုပါတယ်။
“လုပ်စားနေကြတာပေါ့။ ကျနော်တို့ဘက်က တစ်အုပ် တစ်ထောင်တဲ့။ နယ်မြေချင်းတောင် မတူဘူး။ တချို့ နယ်မြေတွေကျ အလကား ပေးတယ်။ ရတနာသီရိ အုပ်ကြီးက ရောင်းခိုင်းတာတဲ့” လို့ ရတနာသီရိ ရပ်ကွက် အတွင်း နေထိုင်သူ တစ်ဦးက မဲခေါင်သတင်းဌာနကို ပြောပါတယ်။
အဆိုပါ “ရပ်ကွက်အတွင်း နေထိုင်သူတို့၏ ဝတ္တရားများ” စာအုပ်ပါ အကြောင်းအရာများဟာ ၂၀၁၆ ခုနှစ်က အတည်ပြု ပြဌာန်းထားတဲ့ ရပ်ကွက်အုပ်ချုပ်ရေး ဥပဒေကို ထည့်သွင်းရိုက်နှိပ်ထားတယ်လို့ စာအုပ်ထဲမှာ ဖော်ပြထားပါတယ်။
“စာအုပ်ထဲက အကြောင်းတွေက လူတိုင်းသိထားတဲ့ ဟာတွေပဲ။ သားအို က စစ်ဘောမ ဆိုတော့ သက်သက်မဲ့ ဖြဲခြောက်တာပေါ့။ သူကတော့ ကိုယ်တိုင်ပေါ်တင် ဘာမှ မလုပ်ဘူး။ ရာအိမ်မှူး၊ ဆယ်အိမ်မှူးတွေကိုပဲ ခိုင်းစားတာ။ အရမ်းလည်တဲ့လူပေါ့” လို့ နောက်ထပ် ဒေသခံ တစ်ဦးက ပြောပါတယ်။
ဒီစာအုပ်ကို သက်ဆိုင်ရာ နယ်မြေ အလိုက် ရာအိမ်မှူး၊ ဆယ်အိမ်မှူးတွေက ရောင်းချရာမှာ တချို့က တစ်အုပ် တစ်ထောင်၊ တစ်ချို့က ၅၀၀ ကျပ်ပေးရပြီး ရင်းနှီးသူတွေကိုတော့ အခမဲ့ ပေးသွားတယ်လို့ သိရပါတယ်။
တောင်ကြီးမြို့ပေါ်က တခြားရပ်ကွက်တွေမှာတော့ အခုလို စာအုပ် ရောင်းချတာ မရှိသေးဘူးလို့ မဲခေါင်သတင်းဌာနမှ စုံစမ်း သိရှိရပါတယ်။
CJ-001