မဲခေါင်၊ ဧပြီ ၂၉
ရှမ်းပြည်နယ် တောင်ပိုင်း၊ တောင်ကြီးမြို့၊ အ.ထ.က (၁) မှာ လူရည်ချွန် စခန်းချမယ့် ရက်အတွင်း Night 38 ညဈေးတန်းကို ၆ ရက်ကြာ ပိတ်ထားဖို့ စစ်ကောင်စီက အမိန့်ပေးထားတယ်လို့ မြို့ခံတွေဆီက သိရပါတယ်။
လူရည်ချွန် စခန်းကို တောင်ကြီး အ.ထ.က (၁) ကျောင်းဝင်း တောင်ဘက်မှာ ထားရှိပြီး ဂိတ်ပေါက်မှာ ရဲ ၅ ယောက် လုံခြုံရေး အမြဲယူထားပေမယ့် ကျောင်းမြောက်ဘက် နောက်တစ်လမ်းက ညဈေးတန်းကို ဧပြီလ ၂၇ ကနေ မေလ ၂ ရက်နေ့အထိ ၆ ရက်ကြာ ပိတ်ခိုင်းထားတာလို့ သိရပါတယ်။
“အရင်ကတည်းက လူရည်ချွန်တွေကို အင်းလေးလည်ပတ် ညအိပ်ဖို့ ခေါင်တိုင်ရွာမှာ အစိုးရ ဟိုတယ် ဆောက်ထားတဲ့ နေရာမှာ ထားခဲ့တာ။ အခု အဲ့ဘက်က တိုက်ပွဲဖြစ်ထားဖူးတော့ ကြောက်လို့နေမှာ” လို့ တောင်ကြီးမြို့နေ အမျိုးသမီး တစ်ဦးက မဲခေါင်ကို ပြောပါတယ်။
၂၀၂၂ – ၂၃ ပညာနှစ်၊ တနိုင်ငံလုံး အတိုင်းအတာနဲ့ လူရည်ချွန် ၄၇၈ ဦး ရွေးချယ်ထားပြီး တောင်ကြီး၊ ငွေဆောင်နဲ့ ပုဂံ လေ့လာရေး စေလွှတ်ရမယ်လို့ စစ်ကောင်စီ ဥက္ကဋ္ဌ မင်းအောင်လှိုင်က ဧပြီလ ၂၇ ရက်နေ့ နေပြည်တော်မှာ တွေ့ဆုံစဉ် ပြောကြားခဲ့တာပါ။
လက်ရှိ တောင်ကြီး လူရည်ချွန်စခန်းကို ဒသမတန်း လူရည်ချွန် ကျောင်းသား၊ ကျောင်းသူ ၁၆၀ ခန့် လာရောက် တည်းခိုနေပြီး အပြင်ထွက်ခွင့် မပေးပေမယ့် ကျောင်းအပြင်ဘက်က ညဈေးတန်းကိုတော့ အကြောင်းပြချက်မရှိ ပိတ်ခိုင်းထားတာ ဖြစ်ပါတယ်။
Night 38 ညဈေးကို ပိတ်ခိုင်းထားပေမယ့် ညဈေး အနောက်ဘက်က အားကစားကွင်း တိုက်တန်းမှာ ဖွင့်လှစ်ထားတဲ့ ဆိုင်ခန်းတွေကိုတော့ ပိတ်ခိုင်းတာ မရှိဘူးလို့ သိရပါတယ်။
Night 38 ညဈေးမှာ အစားအသောက်မျိုးစုံ အဓိက ရောင်းချနေတဲ့ ဆိုင်ပေါင်း ၅၀ ကျော်အထိရှိပြီး တောင်ကြီးမြို့ရဲ့ လူအစည်ကားဆုံး နေရာ ဖြစ်သလို ပြည်တွင်း ခရီးသွားတွေ လာရောက်မှုများတဲ့ နေရာလည်း ဖြစ်ပါတယ်။
CJ-001
#MeKongNews
#တောင်ကြီးညဈေး
#Night38
#လူရည်ချွန်စခန်း