မဲခေါင်၊ စက်တင်ဘာ ၁၆

ရှမ်းပြည်နယ်ရဲ့ မြို့တော်၊ တောင်ကြီးမြို့မှာ ဆီကုန်သည်များအသင်းက စားအုန်းဆီ လှည့်လည် ရောင်းချပေးတဲ့ နေရာတွေမှာ မကြာခဏ ရန်ဖြစ် ထိုးကြိတ်မှုတွေ ဖြစ်နေလို့ စိတ်ညစ်နေရတယ်လို့ ဒေသခံတွေက ပြောပါတယ်။

စစ်ကောင်စီရဲ့ ညွှန်ကြားချက်အရ စားအုန်းဆီ တစ်ပိဿာကို ၄,၅၀၀ ကျပ်နဲ့ ၅,၅၀၀ ကျပ်ကြား ဈေးနှုန်းနဲ့ ရောင်းချပေးလို့ ပြင်ပစျေးနှုန်းထက် သက်တာတာကြောင့် တန်းစီ ဝယ်ယူသူ များတာနဲ့အမျှ အခုလို ရန်ဖြစ် ထိုးကြိတ်မှုတွေ မကြာခဏ ဖြစ်လာတာလို့ ဆိုပါတယ်။

“တစ်အိမ်တစ်ယောက်ဆို တော်ပြီပေါ့။ အခုဟာက မိသားစု ၄ ယောက်ရှိရင် ၄ ယောက်လုံး လာတော့ ကျန်တဲ့ သူတွေအတွက် နစ်နာတယ်။ ကျမ ရှေ့မှာပဲ တိုကင်နေရာလုပြီး အရင်ဦးတဲ့ လူက စထိုးတာ။ နောက်မှ ဝင်လာတဲ့ သူလည်း ပြန်ထိုးတော့ ရန်ဖြစ်ကြတာ။ မိန်းကလေး အချင်းချင်းလည်း အော်ဟစ် ရန်ဖြစ်နေကြတာ” လို့ တန်းစီဝယ်ယူခဲ့တဲ့ အမျိုးသမီး တစ်ဦးက ပြောပါတယ်။

အခု စက်တင်ဘာလ အတွင်း စားအုန်းဆီ တန်းစီရင်း ရန်ဖြစ်မှု အနည်းဆုံး ၅ ကြိမ်အထိ ရှိခဲ့ပြီး တုတ်ဆွဲ ဓါးဆွဲ အခြေအနေအထိ ဖြစ်နေတာကြောင့် တန်းစီသူတွေနဲ့ ပတ်၀န်းကျင်းမှာ နေထိုင်သူတွေ အန္တရာယ်ဖြစ်မှာ စိုးရိမ်နေကြတယ်လို့ ဆီရောင်းချရာမှာ ပါ၀င်ကူညီနေတဲ့ စည်ပင် ၀န်ထမ်း တစ်ဦးက ပြောပါတယ်။

စီးပွားရေး ကျပ်တည်းလို့ မိသားစုဝင် အားလုံး လာရောက် တန်းစီကာ ရတဲ့ဆီကို မှောင်ခိုဈေးကွက်မှာ ပြန်ရောင်းတာတွေကြောင့် အမှန်တကယ် ဆီလိုအပ်သူတွေ မကျေနပ်လို့ ပြောဆိုရာက စကားများ ရန်ဖြစ်ကြတာလို့ သူကဆိုပါတယ်။

“မလိုအပ်ပဲ ဝယ်ကြတော့ တကယ် မရှိတဲ့သူတွေ အတွက် အများကြီး နစ်နာတယ်။ အခု ကြည့်ရသလောက်ဆိုရင် နာမည်ကြီး လက်ဖက်ရည်ဆိုင် ဝန်ထမ်းတွေကအစ ပါနေတယ်။ အောက်ခြေ လူတန်းစားကိုလည်း စာနာပေး စေချင်တယ်” လို့ ဆီ၀ယ်ယူဖို့ တန်းစီနေတဲ့ အမျိုးသား တစ်ဦးက ပြောပါတယ်။

လက်ရှိ မြို့မဈေး အနောက်ဘက်၊ ကျောင်းကြီးစုရပ်ကွက် ကျောက်တစ်လုံး လမ်းပေါ်က ဖြိုးကြွယ်စတိုး အရှေ့၊ မင်္လာဦးရပ်ကွက် မြင်းရုပ်အနီး၊ အနောက်မြို့ပတ်လမ်း ရတနာသီရိရပ်ကွက် စတဲ့ နေရာတွေမှာ ရက်အလိုက် အလှည့်ကျ ရောင်းပေးနေပေမယ့် ဝယ်ယူသူ များပြားတာကြောင့် လုံလောက်မှု မရှိဘူးလို့ မြို့ခံတွေက ပြောပါတယ်။

CJ-007

#MekongNews

#တောင်ကြီးမြို့

#စားအုန်းဆီ

#မှောင်ခိုစျေးကွက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)