မဲခေါင်၊ ဇန်နဝါရီ ၁၃

ရှမ်းပြည်နယ် တောင်ပိုင်း၊ တောင်ကြီးမြို့နယ်မှာ လျှပ်စစ်မီး ဆိုးရွားစွာ ပြတ်တောက်နေလို့ လျှပ်စစ်ဝန်ထမ်း အိမ်ယာမှာ နေထိုင်သူတွေပါ ထင်းမီး၊ မီးသွေးတွေ အသုံးပြု ချက်ပြုတ် နေရတယ်လို့ ဝန်ထမ်းအိမ်ယာမှာ နေထိုင်သူတွေဆီက သိရပါတယ်။

လက်ရှိ တောင်ကြီးမြို့နယ်အတွင်းက တောင်ကြီး၊ အေးသာယာ၊ ရွှေညောင်မြို့တွေမှာ တစ်ရက်ကို လျှပ်စစ်မီး ၈ နာရီခန့်သာ ရရှိတာကြောင့် ချက်ပြုတ်ဖို့ အတွက် ထင်းနဲ့ မီးသွေးကိုသာ အဓိက အားကိုးနေရတယ်လို့ ဆိုပါတယ်။

“ မနက် ၈ နာရီ လာရင် ၁၂ နာရီမှာ ပြတ်သွားတယ်။ ည ၈ နာရီမှာ ပြန်လာတာ။ ဘယ်အချိန် ထမင်းဟင်း သွားချက်စားမလဲ။ ကိုယ်တွေတောင် ထင်းမီး၊ မီးသွေးနဲ့ ထမင်းချက်စားနေရတယ်။ ရပ်ကွက်ထဲက အသိတွေ၊ ဆွေမျိုးတွေက မီးဘာလို့ အဲဒီလောက် ပြတ်နေတာလဲ လာမေးရင် ဖြေစရာ မရှိဘူး” လို့ လျှပ်စစ်ဝန်ထမ်း အိမ်ယာမှာ နေထိုင်သူ တစ်ဦးက ပြောပါတယ်။

တစ်ရက်ကို လျှပ်စစ်မီး ၈ နာရီခန့် ရရှိတယ်လို့ ဆိုပေမယ့် မီးလာချိန် နေရာအချို့မှာ မီးအားနည်းလို့ အသုံးပြုလို့မရဘဲ ထိုင်ကြည့်နေရတာတွေ ရှိနေတယ်လို့ ဒေသခံတွေက ပြောပါတယ်။

ဒါ့အပြင် လျှပ်စစ်မီး အသုံးပြုရတဲ့ လုပ်ငန်းတွေကို မှီခိုနေရတဲ့ ဒေသခံ အချို့ဟာ အလုပ် မလုပ်ရလို့ စားဝတ်နေရေး အတွက် အရင်ကထက် ပိုမိုခက်ခဲ လာတယ်လို့လည်း သိရသည်။

စစ်တပ် အာဏာမသိမ်းခင်က တောင်ကြီးမြို့နယ်မှာ လျှပ်စစ်ဓာတ်အား ပြတ်တောက်မှု မရှိသလောက် နည်းပါးခဲ့ပေမယ့် အာဏာသိမ်းပြီးနောက် ဓာတ်အား ပြတ်တောက်မှုတွေ တဖြည်းဖြည်း ဆိုးရွားလာရာ လက်ရှိ အဆိုးဆုံး အခြေအနေကို ရောက်လာတယ်လို့ ဒေသခံတွေက သုံးသပ်ပါတယ်။

MK-008

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)