မဲခေါင်၊ ဇွန် ၂၈
ကယား(ကရင်နီပြည်) ဖားဆောင်းမြို့ထဲမှာ စစ်ကောင်စီတပ်တွေနဲ့ ကရင်နီမဟာမိတ် တော်လှန်ရေးအင်အားစုတွေအကြားတိုက်ပွဲတွေကြောင့် ဒေသခံ ၂၀၀၀၀ နီးပါး စစ်ဘေးရှောင်နေရတယ်လို့ ကရင်နီ သတင်းအရင်းအမြစ်တွေဆီက သိရပါတယ်။
ဇွန်လ ၁၅ ရက်နေ့ နောက်ပိုင်းကတည်းက တဖြည်းဖြည်း စစ်ဘေးရှောင် ထွက်လာကြတာဖြစ်ပြီး အခု ဇွန်လကုန်ခါနီး မြို့ထဲမှာ လူကုန်သလောက် ဖြစ်နေပြီလို့ လက်ရှိ လွိုင်ကော်မြို့မှာ ခိုလှုံနေတဲ့ စစ်ဘေးရှောင် အမျိုးသမီးတစ်ဦးက ပြောပါတယ်။
“တစ်မိသားစုလုံးက လွိုင်ကော်ကို ပြေးလာကြတာ။ ဖားဆောင်းမှာက အဖေတစ်ယောက်ပဲ ကျန်ခဲ့တော့ စိတ်ပူရတယ်။ လွိုင်ကော် – ဖားဆောင်းလမ်းက ပိတ်ထားတာ တစ်နှစ်လောက် ကြာပြီဆိုတော့ တောလမ်းကပဲ စစ်ရှောင်ရတာပေါ့။ အဲဒီ တောလမ်းတောင်မှ စစ်ရှောင် ထွက်ကြမှန်းသိလို့ ဗုံးကျဲသေးတာ။ တချို့ကတော့ မော်ချီးဘက်ကို ရှောင်ကြတာပေါ့။ အဲဒီမှာက အခု ငြိမ်နေသေးတယ်လေ” လို့ တိုက်ပွဲအခြေအနေတွေကို သူက ပြောပြပါတယ်။
အခုလို စစ်ဘေးရှောင်ထွက်ကြသူတွေ များနေပေမယ့် အခြေခံ လက်လုပ်လက်စား လူတန်းစား အနည်းငယ်ဟာ ငွေရေးကြေးရေး အခက်အခဲတွေကြောင့် မြို့ထဲမှာပဲ ကျန်နေသေးတယ်လို့ သူက ဆက်ပြောပြပါတယ်။
လက်ရှိ စစ်ဘေးရှောင်လာသူတွေထဲမှာ သက်ကြီးရွယ်အို၊ လူမမာ၊ ကိုယ်ဝန်ဆောင်၊ နို့တိုက်မိခင်၊ သက်ကြီးရွယ်အို၊ ကလေးသူငယ်၊ နာတာရှည် ရောဂါသည်တွေ ပါဝင်ပြီး ကိုယ့်အစီအစဉ်နဲ့ကိုယ် ထွက်လာကြသူတွေ ဖြစ်တာကြောင့် အကူအညီတွေ လိုအပ်နေတယ်လို့ ဆိုပါတယ်။
တောင်ကြီးမြို့မှာ ခိုလှုံနေတဲ့ စစ်ဘေးရှောင်တစ်ဦးက “ကျမက အသက် ၈၀ ကျော်ပြီဆိုတော့ သားသမီးတွေက အတင်းရှောင်ခိုင်းတာနဲ့ ဒီတောင်ကြီး အမျိုးတွေနား လာနေတာ။ ဟိုမှာက သမီးနဲ့ မြေးတွေနဲ့ ကျန်ခဲ့တာ။ ဗုံးကျဲတယ်ဆိုတော့ စိတ်ပူတယ်။ ဖုန်းမရတာလည်း ၃ ရက်ရှိပြီ။ ဆုတောင်းပေးရုံပဲ တတ်နိုင်တော့တယ်” လို့ ပြောပါတယ်။
တိုက်ပွဲတွေ ပြင်းထန်နေတာကြောင့် ဖားဆောင်းမြို့နေ ပြည်သူတွေဟာ လွိုင်ကော်၊ ဖယ်ခုံ၊ မော်ချီး၊ အင်းလေး၊ တောင်ကြီး၊ ထိုင်းနိုင်ငံနယ်စပ်တွေဆီ စစ်ဘေးရှောင်နေကြရတာပါ။
ဇွန်လ ၂၅ ရက်နေ့က ဖားဆောင်းမြို့ထဲမှာ အရပ်သား ၄ ဦးကို စစ်ကောင်စီတပ်တွေက အကြောင်းမဲ့ သတ်ဖြတ်ခဲ့ပြီးနောက် စစ်ဘေးရှောင် ထွက်လာသူတွေ ပိုများတယ်လို့ သိရပါတယ်။
ဇွန်လ ၁၉ ရက်နေ့ကတည်းက စစ်ကောင်စီတပ်တွေဟာ ဖားဆောင်းမြို့ပေါ်မှာ သူတို့ စခန်းချဖို့ ရှိတာကြောင့် “မသေချင်ရင် ထွက်သွားကြ” ဆိုပြီး ခြိမ်းခြောက် မောင်းထုတ်ခဲ့တယ်လို့ မြို့နေပြည်သူတွေက ပြောပါတယ်။
CJ-007
#MeKongNews
#ဖားဆောင်း
#စစ်ရှောင်
#စစ်ကောင်စီ
#ကရင်နီ