မဲခေါင်၊ မတ် ၂၆
တာဝန်ယူမှု တာဝန်ခံမှု မရှိတဲ့ ပြည်သူ့ ပညာရေး အမည်ခံ ကျောင်းဦးဆောင်သူတွေကို အရေးယူပေးဖို့ အချက် ၇ ချက် ပါဝင်တဲ့ အိတ်ဖွင့်ပေးစာကို မတ်လ ၂၄ ရက်နေ့က NUG ၊ NUCC ၊ CRPH တို့ကို ပေးပို့ခဲ့တယ်လို့ အခြေခံပညာ ပညာရေး ဝန်ထမ်းများ အထွေထွေ သပိတ် ကော်မတီ BEGSC က ထုတ်ပြန်လိုက်ပါတယ်။
ကျောင်းသား ၃၀,၀၀၀ ခန့် တက်ရောက်နေတဲ့ Kaung for You Federal Private School ဟာ ၂၀၂၂ ခုနှစ်၊ ဇွန်လ အတွင်းက ကျောင်းသား ကျောင်းသူတွေရဲ့ ကိုယ်ရေး အချက်အလက် ပေါက်ကြားမှုကြောင့် မိဘတွေ ခြိမ်းခြောက် ငွေတောင်းခံရမှုတွေ ကြုံတွေ့ခဲ့ရပြီး အခုနှစ် မတ်လဆန်းပိုင်းက FOEIM ကျောင်းက ကျောင်းသား၊ ကျောင်းသူ ၅၀၀ ခန့် စာရင်း ပေါက်ကြားကာ ကျောင်းသား မိဘတွေ ဖမ်းဆီး ခံရမှုတွေ ရှိခဲ့ပါတယ်။
အဲဒီလို ဖြစ်စဉ်တွေကြောင့် NUG ၊ NUCC ၊ CRPH တို့ အနေနဲ့ တော်လှန်ရေး ဦးဆောင်သူတွေရဲ့ တာဝန် ရှိတဲ့အတိုင်း တာဝန်ယူမှု တာဝန်ခံမှု ကင်းမဲ့နေတဲ့ ပြည်သူ့ပညာရေး အမည်ခံ ကျောင်းဦးဆောင်သူများကို ထိရောက်တဲ့ အရေးယူမှုတွေလုပ်ပြီး နောင်ထပ်မံ မဖြစ်ပွားဖို့ ခိုင်မာတဲ့ မူဝါဒ ချမှတ်ကာ ပြတ်ပြတ်သားသား ထိန်းကြောင်းပေးဖို့ BEGSC က အလေး အနက် တိုက်တွန်းထားပါတယ်။
“ပြည်သူ့ ပညာရေး ကျောင်းတွေနဲ့ ချိတ်ဆက် ဆောင်ရွက်မှုတွေ၊ ပူးပေါင်း ဆောင်ရွက်မှုတွေ ပြုလုပ်ခဲ့ကာ ဒုတိယ အကြိမ် ညီလာခံမှာ ကိုယ်ပိုင်နှင့်ကြားကာလ အွန်လိုင်းနဲ့ မြေပြင် ကျောင်းတွေနဲ့ ပတ်သက်ပြီး သဘောထား (၇) ချက် ချမှတ် အတည်ပြုလိုက်တာ ဖြစ်တယ်” လို့ BEGSC မှ တာဝန်ရှိသူက ပြောပါတယ်။
နွေဦးတော်လှန်ရေးမှာ CDM ကျောင်းသားတွေ ပညာသင်ယူခွင့် ရရှိရေးနဲ့ စဉ်ဆက်မပြတ် ပညာရေးကို ရည်ရွယ်ပြီး ကြားကာလ သင်ကြားရေးကျောင်း ၄၀၀၀ ကျော်နဲ့ NUG နဲ့ ချိတ်ဆက်ထားတဲ့ ကျောင်း ၇၀ ကျော် ဖွင့်လှစ်ထားတယ်လို့ သိရပါတယ်။
“အခု အိတ်ဖွင့်ပေးစာကို ကြိုဆိုတယ်။ ခုကာလ အရေးယူလို့ မရဘူး ဆိုတဲ့ အထှာနဲ့ လစာ ကောက်ယူပြီး တော့ တည်ထောင်သူက လုပ်ချင်သလို လုပ်နေတယ်။ အခုကာလမှာ ကျောင်းတက်နေတဲ့ ကလေးတွေ ကိုမှ မငဲ့ လုပ်ချင်တာတွေ လုပ်ချင်တိုင်း လုပ်နေကြတာကို ထိရောက်တဲ့ အရေးယူမှုတွေ လုပ်စေချင်တယ်” လို့ CDM ကျောင်းဆရာမ တစ်ဦးက ပြောပါတယ်။
လက်ရှိ CDM ဆရာ၊ ဆရာမတွေ ဦးဆောင်မှုနဲ့ အမျိုးသား ညီညွတ်ရေး အစိုးရ၊ ပညာရေးဝန်ကြီးဌာနတို့ ပူးပေါင်းပြီး ပြည်သူ့ပညာရေးကျောင်းတွေကို အွန်လိုင်းနဲ့ မြေပြင်မှာ အားကောင်း ခိုင်မာစွာ ဆောင်ရွက်နေတယ်လို့ သိရပါတယ်။
MK-010
#MeKongNews
#နွေဦးတော်လှန်ရေး #BEGSC #ပြည်သူ့ပညာရေး