မဲခေါင်၊ ဖေဖော်ဝါရီ ၁
ရန်ကုန်တိုင်း၊ တာမွေမြို့နယ် ဇောတိကလမ်းမှာ လူငယ်တစ်ဦးကို ဓာတ်ပုံရိုက်တယ် ဆိုတဲ့ စွပ်စွဲချက်နဲ့ ဒီနေ့ ဖေဖော်ဝါရီ ၁ ရက် မနက် ၁၀ နာရီကျော် ဝန်းကျင်က စစ်တပ်က ဝိုင်းဝန်း ရိုက်နှက်သွားတယ်လို့ ဒေသခံတွေက မဲခေါင်သတင်းကို ပြောပါတယ်။
အဆိုပါ လူငယ်ကို အရပ်ဝတ် ဝတ်ဆင်ထားသူ ၄ ယောက်က အုပ်ကြီးရုံးခန်းဘေးသို့ ခေါ်ဆောင်ကာ ဝိုင်းဝန်း ရိုက်နှက်ခဲ့တာဖြစ်ပြီး မျက်နှာဖုံး တပ်ထားသူ တစ်ဦးက ညစ်ညမ်းစွာ ဆဲဆိုသွားတယ်လို့လည်း သူတို့ကပြောပါတယ်။
“ ဓာတ်ပုံရိုက်ရင် ပြဿနာ တက်သွားမယ် ဆိုပြီး အော်ဟစ်ဆဲဆိုပြီး ထွက်သွားတာ။ အုပ်ကြီးရုံးထဲကို ၂ ကောင် ပြန်ဝင်သွားတယ်။ ဆိုင်ကယ်နဲ့ ဒလန်စိုးမြတ် ရောက်လာပြီး တစ်ခုခု ပြောသွားတယ်။ နောက်တော့မှ အုပ်ကြီး ရုံးခန်းကို သေ့ာနှစ်လုံးခတ်ပြီး ထွက်သွားကြတာ” လို့ မျက်မြင်တွေ့သူတစ်ဦးက မဲခေါင်သတင်းကို ပြောပါတယ်။
ဒီကနေ့ တောင်ဒဂုံ၊ တာမွေမြို့နယ်နဲ့ မြို့နယ်အချို့မှာ ငါးထောင်စားတွေ စစ်တပ်ထောက်ခံဖို့အတွက် လူစုဝေးနေကြပြီး စစ်တပ်ကလည်း အရပ်ဝတ် ကင်းပုန်းများနဲ့ လုံခြုံရေးယူပေးနေတယ်လို့ ဒေသခံတွေက ပြောပါတယ်။
ရန်ကုန်တိုင်းရှိ မြို့နယ်အများစုမှာ ဒီကနေ့ မနက် ၉ နာရီ ၄၅ မိနစ်မှ စတင်ကာ အသံတိတ်သပိတ် စတင်ဆင်နွှဲနေပြီး ရပ်ကွက်အုပ်ကြီးနဲ့ ရာအိမ်မှူးအချို့ကတော့ ပိတ်သိမ်းထားတဲ့ ဈေးဆိုင်တွေကို ဓာတ်ပုံလိုက်လံရိုက်ကူးနေတယ်လို့ လှိုင်သာယာမြို့နယ်မှာ နေထိုင်သူတစ်ဦးက ပြောပါတယ်။
MK-005
#MeKongNews
#တာမွေ
#အသံတိတ်သပိတ်
ဓာတ်ပုံ – ယနေ့မနက် ရန်ကုန်မြို့ ယုဇနပလာဇာရှေ့ မြင်ကွင်း