မဲခေါင်၊ မတ် ၄
တာချီလိတ်နဲ့ ထိုင်းနိုင်ငံ၊ မယ်ဆိုင်မြို့နယ်စပ်မှာ ဒီနေ့ မတ်လ ၄ရက်မှာ လေထုညစ်ညမ်းမှုပိုမို ဆိုးရွားလာတယ်လို့ဒေသခံတွေက ပြောပါတယ်။
မယ်ဆိုင်မြို့ရဲ့ လေထုအရည်အသွေးအညွှန်းကိန်းဟာ ဒီရက်ပိုင်းမှာ အန္တရာယ်ရှိတဲ့ အနီရောင်အဆင့်ကနေ အလွန်အန္တရာယ်ရှိတဲ့ ခရမ်းရောင်အဆင့်ကို ရောက်နေတယ်လို့ လေထုအရည်အသွေး တိုင်းတာရေးစခန်းတွေရဲ့ ညွှန်းကိန်းတွေအရသိရပါတယ်။
ဒီနေ့ မတ်လ ၄ရက် မနက် ၈နာရီခွဲခန့် တိုင်းတာချက်တွေအရ မယ်ဆိုင်မြို့ရဲ့ လေထုအရည်အသွေးဆိုးရွားမှုအညွှန်းကိန်းဟာ ၂၁၄ ကို ရောက်ရှိနေတယ်လို့ AQICN ဝက်ဘ်ဆိုဒ်က ဖော်ပြပါတယ်။
မယ်ဆိုင်မြို့နဲ့ကပ်လျက် မြန်မာနိုင်ငံတာချီလိတ်မြို့ဘက်မှာလည်း လေထုညစ်ညမ်းမှုကို ခံစားနေရပြီး တာချီလိတ်ခရိုင်ပတ်ဝန်းကျင်ထိန်းသိမ်းရေးဦးစီးဌာနက မတ်လ ၃ရက် ထုတ်ပြန်ချက်မှာ လေထုထဲ PM 2.5 ပါဝင်မှုဟာ အညွှန်းကိန်း ၂၀၀ အထိရှိနေပါတယ်။
ဒါဟာ ကျန်းမာရေးအတွက် အလွန်မသင့်တော်တဲ့ အခြေအနေဖြစ်ပြီး မြင်ကွင်းကောင်းကောင်းမမြင်ရတာ၊ အသက်ရှုကြပ်တာတွေခံစားရတယ်လို့ တာချီလိတ်ဒေသခံတစ်ဦးက ပြောပါတယ်။
ဒါပေမယ့် ဒေသအာဏာပိုင်တွေက ဒီကိစ္စအပေါ် ကိုင်တွယ်ဖြေရှင်းခြင်းမရှိဘဲ လျစ်လျှူရှူထားတယ်လို့ သူက ပြောပါတယ်။
ထိုင်းနိုင်ငံမြောက်ပိုင်းနဲ့ မြန်မာနိုင်ငံ၊ ရှမ်းပြည်နယ်အရှေ့ပိုင်း ထိစပ်ရာဒေသမှာ ဒီလို နွေဦးပေါက်ကာလရောက်တိုင်း လေထုညစ်ညမ်းမှုကို ကြုံတွေ့ရလေ့ရှိပါတယ်။
NLD အစိုးရလက်ထက် တာချီလိတ်မြို့မှာ လေထုညစ်ညမ်းမှုဒဏ်လျော့ပါရေးနဲ့ ဒေသခံတွေကျန်းမာရေး ထိခိုက်မှုလျော့နည်းစေဖို့ လေထုထဲကို ရေမှုန်ရေမွှားပက်ဖြန်းတာ၊ နှာခေါင်းစည်းဝေတာတွေပြုလုပ်ခဲ့ပါတယ်။
#MeKongNews
#လေထုညစ်ညမ်းမှု #တာချီလိတ် #မယ်ဆိုင်