မဲခေါင်၊ ဇွန် ၃၀

တာချီလိတ်မြို့နယ်၊ မဲခေါင်ရပ်ကွက် ခရိုင်ရဲတပ်ဖွဲ့ရုံးအနီးက တရုတ်ငွေလိမ်ဂိုဏ်းသား ၈၀ ကျော်ဖမ်းဆီးမိတဲ့ နေအိမ်ကို စစ်ကောင်စီဘက်က ဖြိုချဖျက်ဆီးလိုက်တယ်လို့ ဒေသခံတွေထံက သိရပါတယ်။

အဲဒီနေအိမ်ကို ချဲထီဒိုင်ချုပ် ဦးစိုင်းစိုင်းပိုင်ဆိုင်တာဖြစ်ပြီး ဇွန်လ တတိယပါတ်အတွင်း စစ်တိုင်းမှူးအမိန့်နဲ့ ဝင်ရောက်ရှာဖွေရာ တရုတ်ငွေလိမ်ဂိုဏ်းလုပ်ကိုင်နေသူ လူဦးရေ ၈၀ ကျော်ဖမ်းဆီးရမိခဲ့တာဖြစ်ပါတယ်။ အဲဒီနောက် ဇွန်လ ၂၅ရက်နေ့မှာ စစ်ကောင်စီဘက်က ဘက်ဟိုးယာဉ်တွေအသုံးပြုပြီး ဖြိုချခဲ့တာဖြစ်တယ်လို့ ဒေသခံသတင်းရင်းမြစ်တဦးက မဲခေါင်ကို ပြောပါတယ်။

“ဝင်ဖမ်းတဲ့နေ့က ဗျူဟာမှူးကိုယ်တိုင်ဖမ်းပြီး ပစ္စည်းတွေအကုန် ဗျူဟာကိုသယ်သွားတာ။ နောက်တော့ ဘက်ဟိုးနဲ့ကုတ်ချပြီး ဖြိုပလိုက်တာ။ အရင်ကဆို ကျားဖြဲန်ဖမ်းမိပေမယ့် အိမ်ကို ဖြိုတာမျိုးမလုပ်ဘူး။ ခုတော့ ဘာလို့လဲ မသိဘူး” လို့ သူက ပြောပါတယ်။

ငွေလိမ်ဂိုဏ်းတရုတ်နိုင်ငံသားတွေကို ဖမ်းဆီးအရေးယူထားပေမယ့် နိုင်ငံခြားသားကို နေအိမ်တရားမဝင်ငှါးရမ်းပေးသူ အိမ်ပိုင်ရှင် ချဲထီဒိုင်ချုပ် ဦးစိုင်းစိုင်းကိုတော့ ဖမ်းဆီးအရေးယူတာမရှိဘဲ နေအိမ်ကိုဘဲ ဖျက်ဆီးဖြိုဖျက်ခဲ့တာလို့ သိရပါတယ်။

အိမ်ပိုင်ရှင် ဦးစိုင်းစိုင်းဟာ တာချီလိတ်မြို့မှာ ချဲ၊ ထီ၊ ၃၆ ကောင် ဒိုင်ချုပ်အဖြစ် လူသိများသူဖြစ်ပြီး ချဲထီ စားစရာရှိရင် အကုန်စားပြီး လျော်စရာရှိရင် အချိုးကျနဲ့သာလျော်ပြီး အပြည့်မလျော်လို့ နာမည်ကြီးသူလည်းဖြစ်ပါတယ်။

တာချီလိတ်မှာ ကျားဖြဲန်ငွေလိမ်လုပ်ငန်းတွေနဲ့ပါတ်သတ်ပြီး နယ်မြေခံရဲနဲ့ စစ်တပ်ကို လိုင်းကြေးပေးပြီး တိတ်တဆိတ်လုပ်ကိုင်နေတာတွေရှိပေမယ့် အထက်အမိန့်နဲ့ တိုက်ရိုက်ဖမ်းဆီးတာတွေလည်း ရှိနေတာဖြစ်ပါတယ်။

တာချီလိတ်မြို့တွင်း တရုတ်ငွေလိမ်ဂိုဏ်းတွေကို ဖမ်းဆီးရမိရင် နေအိမ်တွေပါသိမ်းမယ်လို့ သတင်းထွက်နေပြီး ဖမ်းဆီးရမိတဲ့ တရုတ်နိုင်ငံသားတွေထဲက ခေါင်းဆောင်ပိုင်း ငွေကြေးချမ်းသာသူတွေကို စစ်ဘက်ဆိုင်ရာလုံခြုံရေး(စရဖ)အဖွဲ့နဲ့ နယ်မြေခံရဲတပ်ဖွဲ့ပေါင်းပြီး ပြန်လည်ရောင်းစားပြီး လွတ်ပေးတာတွေရှိနေပါတယ်။

MK-002

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)