မဲခေါင်၊ ဇန်နဝါရီ ၃၀
နေပြည်တော်မှာ ကျင်းပဖို့ ရှိနေတဲ့ စစ်ကောင်စီရဲ့ တပ်မတော်နေ့ အခမ်းအနား ချီတက် စစ်ရေးပြပွဲ အတွက် ကြိုတင် လေ့ကျင့်ဖို့ စစ်တပ်တွင်း အမည်စာရင်း ကောက်ယူနေရာ စစ်ရေးပြ အခမ်းအနားမှာ မပါဝင်လိုတဲ့ စစ်သားတွေ အနေနဲ့ လူစားထိုး ထည့်သွင်းဖို့ ကျပ် ၁၀ သိန်းအထိ ပေးနေရတယ်လို့ တပ်တွင်း သတင်းရင်းမြစ်ထံက သိရပါတယ်။
လာမယ့် မတ်လ ၂၇ ရက်နေ့မှာ ခမ်းခမ်းနားနား ကျင်းပဖို့ ရှိနေတဲ့ (၇၈) နှစ်မြောက် တပ်မတော်နေ့ အခမ်းအနား ပါဝင် ချီတက်မယ့် တပ်အသီးသီးဟာ ဖေဖော်ဝါရီလလယ်က စပြီး နေပြည်တော်မှာ စုဖွဲ့ကာ တစ်လ ကြိုတင် လေ့ကျင့်မှာ ဖြစ်တယ်လို့ သတင်းရင်းမြစ်က ဆိုပါတယ်။
“အရင်ကတော့ ကြည်း၊ ရေ၊ လေ က တိုက်ခိုက်ရေး အုပ်စုတွေ အများဆုံး ပါတာပေါ့။ အခုက တပ်အကုန် ရှေ့တန်းထွက်နေရသလို ဖြစ်နေတော့ ပညာသည် အုပ်စုနဲ့ အရန် အင်အားထဲကနေ စစ်ရေးပြအတွက် ထုတ်နှုတ်ရတဲ့ အခြေအနေ ဖြစ်နေတယ်။ တလလုံး ဘာဂွင်မှ မရှိဘဲ နေပူထဲ ပင်ပင်ပန်းပန်း လျှောက်ရမှာ ဆိုတော့ မလိုက်ချင်ကြဘူး။ တချို့ အသက်ကြီးပိုင်းတွေလဲ စာရင်းထဲ ပါနေတာရှိတယ်။ အဲတော့ သူ့တပ် ကိုယ်တပ်ထဲက လုံခြုံရေး နောက်ချန် ထားတဲ့ထဲက လိုက်ချင်သူရှိရင် အရာရှိက လူစားထိုး စီမံပေးရတာပေါ့။ အဲမှာ ဘယ်လောက်ဆိုပြီး ဈေးတွေ ဖြစ်လာတာ” လို့ တပ်တွင်း သတင်းရင်းမြစ်က ရှင်းပြပါတယ်။
နေပြည်တော် တစ်လ လမ်းလျှောက် ခရီးစဉ်ကို ရှောင်လွှဲလိုသူ အများစုဟာ အကြောင်းအမျိုးမျိုးနဲ့ ဝင်ငွေ ကောင်းနေသူတွေ ဖြစ်လို့ တပ်တွင်း နောက်ချန်အဖြစ် နေရမယ့် ဘဝတူ စစ်သားတွေကို အခကြေးငွေပေးကာ ပြန်လည်ငှားရမ်း လူစားထိုးနိုင်တာ ဖြစ်တယ်လို့ သူကဆိုပါတယ်။
လက်ရှိ နိုင်ငံတဝှမ်း စစ်မျက်နှာ အများအပြား ဖွင့်ထားရတဲ့ စစ်ကောင်စီတပ် အတွင်းမှာ အရင်က သက်သောင့်သက်သာရှိတဲ့ ပညာသည် အုပ်စုဝင် အင်ဂျင်နီယာတပ်ကဲ့သို့ တပ်တွေပင် နီးစပ်ရာ ဒေသတွေမှာ လုံခြုံရေး ယူနေရပြီး ရေတပ်နဲ့ လေတပ်က စစ်သားများလည်း တပ်အထိုင်ချရာ ဒေသတွေရဲ့ လုံခြုံရေး တာဝန်ယူနေရလို့ နာမကျန်းခွင့် ပိတ်ပင်ထားရတဲ့ အထိ ဖြစ်နေတယ်လို့ ဆိုပါတယ်။
“လမ်းမကြီးတွေမှာ ဂိတ်ထိုင်ရတဲ့တပ် ဆိုရင် ပိုပေးတယ်ပေါ့ဗျာ။ သူတို့ ဂွင်တည့်နေတာ နေရာပျောက်မှာ စိုးတာကိုး။ တစ်ယောက် ၁၀ သိန်း ၁၅ သိန်း ပေးတဲ့ တပ်တွေရှိတယ်။ ၃ သိန်း ၄ သိန်းပဲ ပေးနိုင်တဲ့ တပ်တွေရှိတယ်။ အမျိုးမျိုးပေါ့။ ထောက်ပို့က ဒီဇယ်ကိုင်တဲ့ အရာရှိ နေပြည်တော် တစ်လ ဘယ်သွားမလဲ။ ဂွင်ပျောက်သွားမှာပေါ့။ တချို့ အသက်ကြီးပြီး ကျန်းမာရေး သိပ်မကောင်းတဲ့ သူတွေကျတော့ မရှိရှိရာ ရှာပေးပေါ့ဗျာ။ ခုကတော့ ဈေးကွက်လို ဖြစ်လာတာပေါ့။ နေပြည်တော် သွားမယ့် ကောင်လေးတွေကလည်း သူ့ကင်းအလှည့် အတွက် လူပြန်ငှားရတာ အရာရှိကို ပေးရတာ ဒါမျိုးလေးတွေ ရှိတယ်” လို့ မိထ္ထီလာ လေတပ်မှ ပညာသည် အုပ်စုဝင် အရာရှိ တစ်ဦးက ရှင်းပြပါတယ်။
လက်ရှိ တပ်မတော်နေ့ အတွက် ကြည်း၊ ရေ၊ လေ တပ်များမှ စစ်တိုင်း အလိုက် လူစာရင်း ကောက်ခံနေရာ စစ်ရုံးချုပ်က ကနဦး အနည်းဆုံး စစ်သည်အင်အား တစ်သောင်းမှ တောင်းခံထားတယ်လို့ သိရပါတယ်။
#MeKongNews
#တပ်မတော်နေ့
#နေပြည်တော်