ဒီဇင်ဘာ ၂၇ရက်နေ့ ညနေ ၅ နာရီခန့်က အင်းတိန်ရွာ၊ ညောင်အုတ်ဘုန်းကြီးကျောင်း ဆရာတော်နဲ့အတူ ကိုသန့်ဇင်၊ ကိုတိုးရစ်အောင်နဲ့ အမျိုးသမီးတစ်ဦးတို့ကို PDFတွေနဲ့ ဆက်စပ်နေတယ်လို့ဆိုပြီး ဖမ်းဆီးသွားတာလို့ ဒေသခံတစ်ဦးက ပြောပါတယ်။
PNO နဲ့ ပျူစောထီး တွေကိုခေါ်ပြီး ရွာထဲပေးဝင်ဖို့ ဆရာတော်ဆီ သွားပြောတာ ဆရာတော်က အခြေအနေတွေ ရှုပ်အောင်မလုပ်ဖို့ တောင်းပန်တာကို လက်မခံဘဲ ဖမ်းခေါ်သွားတယ်။ ကိုဗစ်တုန်းက ဆေးကုပေးတဲ့ ပရဟိတကျန်းမာရေးမှူးနဲ့ နောက်လူတစ်ယောက်ရယ် မိန်းမတစ်ယောက် လည်းပါသွားတယ်
လို့ ဒေသခံတစ်ဦးက ပြောပါတယ်။
စစ်ကောင်စီ တပ်သားတွေက ညောင်အုတ်ဆရာတော်ကို ဖမ်းဆီးရာမှာ လက်နှစ်ဖက်ကို အတင်းဆွဲပြီး ခေါ်ဆောင် သွားခဲ့တာလို့ မျက်မြင်တွေက ပြောပါတယ်။
ဆရာတော်ဟု စစ်ဘေးရှောင်ပြည်သူတွေအတွက် ကျောင်းတွင်း စစ်ရှောင်စခန်းဖွင့်ကာ စောင့်ရှောက်ထားသူဖြစ်ပြီး ကျန်းမာရေးမကောင်းတာကြောင့် လွန်ခဲ့တဲ့ လပိုင်းက ဆေးရုံတက်ထားရသူလည်းဖြစ်တယ်လို့ ဒေသခံတွေထံကနေသိရပါတယ်။
ဆရာတော်နဲ့အတူ ဖမ်းဆီးခံရတဲ့ ကိုသန့်ဇင်အောင်ဟာ အရင်က ကျန်းမာရေးမှူးအဖြစ် လုပ်ကိုင်ဖူးပြီး အင်းတိန်စျေးမှာ ဆေးဆိုင်ဖွင့်တာပါ။
ပျူစောထီး နဲ့ PNO တွေက လမ်းပြပြီးခေါ်လာတာ။ ပျူစောထီးတွေက နန်းပန်၊ အင်းပေါခုံ ၊ မင်းချောင်းရွာက လူတွေလေ။ စစ်တပ်က စစ်သင်တန်းတက်ပြီး အဖွဲ့ထဲဝင်ရင် တစ်လကို ဆန်တစ်အိတ်နဲ့ လစာတစ်သိန်းခွဲပေး မယ်ဆိုလို့ ဝင်ထားကြတာ တစ်လ နှစ်လ လောက်ပဲ ရှိကြသေးတယ်
လို့ အင်းလေးဒေသခံတစ်ဦးက ပြောပြသည်။
ဒီဇင်ဘာ ၂၈ ရက် မနက်ကနေ ယခုလက်ရှိအချိန်ထိ ညောင်ရွှေမြို့နယ်၊ အင်းလေးဒေသမှာ စစ်ကောင်စီတပ်သားတွေ၊ ရဲတွေ၊ ပျူစောထီးတွေနဲ့ PNO တွေက နေရာအနှံ့လုံခြုံရေးတင်းထားပြီး စစ်ဘေးရှောင်စခန်းတွေကိုသွားရောက်ကာ ဖုန်းရှာဖွေစစ်ဆေးတာ၊ လမ်းသွားလမ်းလာတွေကို စစ်ဆေးတာ၊ သေနတ်ပစ်ခတ်ပြီး ခြိမ်းခြောက်တာတွေ ပြုလုပ်နေတယ်လို့ ဒေသခံတွေထံကနေ သိရပါတယ်။
