မဲခေါင်၊ ဇန်နဝါရီလ ၂၇
စစ်ကောင်စီကနိုင်ငံကူးလက်မှတ်တွေကို ဇန်နဝါရီလကုန်ပိုင်းမှာ ပြန်လည်ပြုလုပ်ပေးမှာဖြစ်ပြီး MoU အလုပ်သမားတွေနဲ့ ဗုဒ္ဓဂါယာ ဘုရားဖူးအေဂျင်စီတွေကိုသာ ပတ်စ်ပို့ရုံးအတွင်းကို ဝင်ခွင့်ပြုမှာဖြစ်တယ်လို့ နီးစပ်ရာ အသိုင်းအဝန်းကသိရပါတယ်။
ပြီးခဲ့တဲ့ ၂၀၂၂ ခုနှစ် ဒီဇင်ဘာလကုန်ပိုင်းလောက်ကစပြီး နိုင်ငံကူးလက်မှတ်လျှောက်ထားမှုတွေကို စတင်ရပ်ဆိုင်း ခဲ့ရာကနေ ပြီးခဲ့တဲ့ ဇန်နဝါရီ ၁၇ ရက်မှာတော့ ကြိုတင်အကြောင်းကြားမှုမရှိဘဲအားလုံးကို ရပ်ဆိုင်းခဲ့တာ ဖြစ်ပါတယ်။
“ အခုပြန်ဖွင့်မှာက ပတ်စ်ပို့ရုံးက ပြန်ဖွင့်လိုက်တဲ့ပုံစံမျိုး မဟုတ်ဘဲ အရင်စနစ်တွေ လုံးဝမရှိတော့ဘူး။ QR ကုတ်နဲ့ ဘိုကင်တင်ရတာ မရှိတော့ဘူး။ အခုက ဗုဒ္ဓဂါယာသွားမယ့်သူတွေနဲ့ MOU စနစ်နဲ့သွားမယ့်သူတွေ ဒီ ၂ ခုထဲက အေဂျင်စီကလူတွေပဲ ရုံးထဲကိုပေးဝင်မယ်။ နေပြည်တော်ထိ တင်ပြရမယ်၊ သူတို့ခွင့်ပြုမှ အေဂျင်စီကခေါ်ပြီး လုပ်ရမှာ။ အရင်လို ပွဲစားဆိုတာ မရှိတော့ဘူး” လို့ ရုံးတွင်းနီးစပ်သူတစ်ဦးက ဆိုပါတယ်။
နိုင်ငံကူးလက်မှတ်ပြုလုပ်ရာမှာ ကုန်စရိတ်သတ်မှတ်ချက်ကတော့ ယခင်သတ်မှတ်ချက်အတိုင်းသာ ကုန်ကျမှာဖြစ်တယ်လို့လည်း သူကပြောပါတယ်။
လတ်တလော နိုင်ငံကူးလက်မှတ်ထုတ်ပေးမှု ရပ်ဆိုင်းထားတဲ့အတွက် MOU စနစ်နဲ့ စေလွှတ်မယ့် အလုပ်သမားတွေ၊ ကျန်းမာရေးနဲ့ ပညာရေးအတွက် ပြည်ပထွက်ခွာမယ့်သူ အများအပြား အခက်အခဲတွေ ကြုံနေရတာပါ။
နိုင်ငံကူးလက်မှတ်လုပ်ဖို့အတွက် Online booking စနစ်ကို ဒီဇင်ဘာ (၅) ရက်မှာ ရပ်ဆိုင်းခဲ့ပြီး QR ကုတ် ရထားပြီးသူတွေကို ဆက်လက်လုပ်ကိုင်ပေးခဲ့ရာက ဇန်နဝါရီလဆန်းပိုင်း မှာတော့ MoU အလုပ်သမားနဲ့ ဗုဒ္ဓဂါယာဘုရားဖူးတွေကလွဲလို့ တခြားလုပ်ငန်းစဉ်အားလုံးကိုပါ ယာယီရပ်ဆိုင်းထားခဲ့တာပါ။
“ ပညာတော်သင်သွားမယ့်သူတွေ၊ မကျန်းမာလို့ ဆေးကုသဖို့သွားမယ့်သူတွေ အဆင်မပြေမှု ပိုဖြစ်ကြပါတယ်။ ပြည်ပနိုင်ငံတွေကို ငွေကြိုသွင်းထားတာ၊ ရောဂါကုသဖို့ အချိန်နောက်ကျတာ တော်တော်ဆိုးရွားတဲ့ လုပ်ရပ်ပါ။ ရုံးတွင်းပိုင်းကကြားတာတော့ System Update လုပ်ဖို့ရယ်၊ ရွေးကောက်ပွဲနီးတာရယ်၊ နောက်ပြီး နိုင်ငံခြားထွက်တဲ့သူများလို့ လူစွမ်းအားအရင်းအမြစ် လျော့နည်းတယ်ဆိုပြီး ဖိအားပေးမှုတွေလည်း ရှိပါတယ်” လို့ ရုံးတွင်းနီးစပ်သူနောက်ထပ်တစ်ဦးက ဆိုပါတယ်။
အာဏာသိမ်းစစ်ခေါင်ဆောင်က နိုင်ငံအတွင်းရှိလူအများ ပြည်ပထွက်ခွာအလုပ်လုပ်သူ များပြားကာ လူ့စွမ်းအားအရင်းအမြစ် လျော့နည်းမှုရှိနေတယ်လို့ နေပြည်တော်ရှိ ဝန်ကြီးအဆင့်အစည်းဝေးတွေမှာ ဖိအားပေးသဖွယ်ပြောကြားမှုတွေကြောင့် အခုလိုတင်းကျပ်မှုတွေလုပ်ဆောင်လာတာလည်း ဖြစ်ပါတယ်။
“ MOU နဲ့သွားမယ့်သူတွေကို ပိုပြီးတင်းကျပ်မယ့်သဘော ရှိတယ်။ ဦးဆောင်တဲ့ ကုမ္မဏီတွေကိုလည်း Blacklist သွင်းပြီး လူအများအပြားမလွှတ်နိုင်အောင် တင်းကျပ်နေတာတွေလည်း တွေ့နေရတယ်” လို့ ပတ်စ်ပို့ရုံးနဲ့နီးစပ်သူက ပြောပါတယ်။
မြန်မာနိုင်ငံမှာ နိုင်ငံရေးနဲ့ စီးပွားရေး အဆင်မပြေမှုတွေကြောင့် တစ်လကို မြန်မာနိုင်ငံသား ၄၀၀၀၀ လောက်ဟာ ပြည်ပကို အကြောင်းအမျိုးမျိုးနဲ့ ထွက်ခွာနေကြရတယ်လို့ IOM အစီရင်ခံစာမှာ ဖော်ပြထားပါတယ်။
MK-006