မဲခေါင် ၊ မတ် ၃၁
ရှမ်းပြည်နယ်တောင်ပိုင်း၊ ဆီဆိုင်မြို့နယ်ရှိ ပအိုဝ်းကျေးရွာတွေမှာ စစ်ကောင်စီ လက်အောက်ခံ PNO ပြည်သူ့စစ်က ကျည်ဆံဖိုး တစ်အိမ် ၅သောင်း အဓမ္မကောက်ခံနေတယ်လို့ ဒေသခံတွေက မဲခေါင်ကို ပြောပါတယ်။
ပင်လောင်းမြို့နယ်မှာ တိုက်ပွဲဖြစ်ပွားပြီးနောက် PNO ပြည်သူ့စစ်က ကာကွယ်ရေးစရိတ်ဆိုပြီး ပင်လောင်းမြို့နယ်မှာ ငွေကောက်ပြီးနောက်မှာ ဆီဆိုင်မြို့နယ်ကိုပါ ကောက်လာတာဖြစ်တယ်လို့ ဆီဆိုင်မြို့နယ်ဒေသခံတစ်ဦးက ပြောပါတယ်။
“(နောက်ဆုံး) ရက်အတိအကျတော့ မပြောလာသေးဘူး။ တစ်လအတွင်း PNO မြို့နယ် အုပ်ချုပ်ရေးမှူးတွေဆီ အရောက်ပို့ပေးရမယ်လို့ပဲ ပြောသေးတယ်။ သူတို့ကောက်တာကတော့ သူတို့ PNO အုပ်ချုပ်ရေးမှူးတွေကနေတစ်ဆင့် ရွာသူကြီးတွေကို ကောက်ခိုင်းတာလေ” လို့ သူကပြောပါတယ်။
အဲ့ဒီလိုငွေကောက်တာကို ပင်လောင်းမြို့နယ်မှာတော့ မတ်လကုန်နောက်ဆုံးထားပြီး ပေးရမယ်လို့ ရက်ချိန်းပေးထားတာ ဖြစ်ပါတယ်။
PNO ပြည်သူ့စစ်အနေနဲ့ တစ်အိမ် ၃သောင်းကောက်တာ တစ်နှစ်တောင်မပြည့်သေးပဲ အခုလို ၅သောင်းထပ်ကောက်တာဟာ တောင်ယာပဲလုပ်ကိုင်နေရတဲ့ ကျေးလက်ပြည်သူအနေနဲ့ အဆင်မပြေတာကြောင့် ပြည်သူလူထုကို ငဲ့ညှားသနားသင့်တယ်လို့ ငွေကြေးဆင်းရဲတဲ့ ဒေသခံတစ်ဦးကပြောပါတယ်။
“ကျွန်တော်တို့မိသားစု တစ်နေ့လုပ်မှ တစ်နေ့စားရတာပါ။ ဒါတောင် သူများအလုပ်ရှိလို့ ခေါ်တဲ့ရက်မှ သွားရတာ။ အရင် ၃သောင်းကောက်တုန်းကလည်း ချေးငှားပြီးထည့်ရတယ်။ အခုက ၅သောင်းတဲ့ ထည့်ဖို့လည်းအဆင်မပြေဘူး။ မထည့်ရင်လည်း ကြောက်ရတယ်။ဘယ်လိုလုပ်ရမလဲ မသိတော့ဘူး” လို့ အဲ့ဒီဒေသခံကပြောပါတယ်။
PNO ပြည်သူ့စစ်ဟာ စစ်တပ်နဲ့ အစဉ်အဆက် ဆက်ဆံရေးကောင်းမွန်ပြီး နှစ် ၃၀ ကျော် ပအိုဝ်းအမျိုးသားပိုင်စီးပွားရေး လုပ်ငန်းအားလုံးကို လက်ဝါးကြီးအုပ်ပေမယ့် ယခုအချိန်ထိ ပြည်သူလူထုအပေါ် ငွေကြေးကောက်ခံနေသေးတာ နားမလည်နိုင်ဖြစ်ရတယ်လို့ ပအိုဝ်းလူငယ်တစ်ဦးဖြစ်တဲ့ ခွန်ကျော်ခေါင်ကပြောပါတယ်။
“PNO စီးပွားရေး တာဝန်ခံ နေဝင်းထွန်း တစ်ယောက်တည်းတောင် ကုမ္ပဏီ ၁၀ ကျော် ပိုင်ပြီး ဒေါ်လာ ဘီလျံနဲ့ချီ ချမ်းသာနေတာလေ။ အဲ့ဒါကို လူထုဆီ ဂုတ်သွေးစုပ်နေသေးတယ် အံ့ဩစရာကြီးပေါ့ဗျာ”လို့ သူကဆက်ပြောပါတယ်။
PNO အတွင်းရေးမှူးအဖွဲ့ဝင် စီးပွားရေးတာဝန်ခံ ဦးနေဝင်းထွန်းဟာ ပတ္တမြားနဂါး ကျောက်မျက်ရတနာ၊ ပတ္တမြားနဂါး တူးဖော်ရေး၊ ပတ္တမြားနဂါး ကုန်သွယ်ရေး၊ ပတ္တမြားနဂါး ဆောက်လုပ်ရေး ၊ နဂါးဘိလပ်မြေ စတဲ့ ကုမ္ပဏီ ၁၁ ခုကို ပိုင်ဆိုင်ထားပါတယ်။
အဲ့ဒီ ငွေကြေးကောက်ခံတဲ့ ကိစ္စနဲ့ ပတ်သက်ပြီး စစ်ကောင်စီ လက်အောက်ခံ PNO ပြည်သူ့စစ် ကွပ်ကဲရေးမှူး ဗိုလ်မှူးမြင့်အောင်ကို ဆက်သွယ်ပေမယ့် ဖုန်းလက်ခံခြေဆိုခြင်းမရှိပါဘူး။
PNOဟာ လက်ရှိအာဏာရှင်တော်လှန်ရေးမှာ စစ်ကောင်စီဘက်ကနေပါဝင်ပြီး တော်လှန်ရေးတပ်ဖွဲ့တွေကို တိုက်ခိုက်နေတဲ့ စစ်ကောင်စီရဲ့ ပြည်သူ့စစ်နဲ့နယ်ခြားစောင့်တပ် ညွှန်ကြားရေးဌာန လက်အောက်က ပြည်သူ့စစ်အဖွဲ့တစ်ခုဖြစ်ပါတယ်။
ပုံအညွှန်း – စစ်ကောင်စီခေါင်းဆောင်နဲ့ PNO ခေါင်းဆောင် တွေ့ဆုံစဉ်
CJ – 002
#MeKongNews
#ဆီဆိုင်
