မဲခေါင်၊ အောက်တိုဘာ ၄
ကချင်ပြည်နယ်၊ ဖားကန့် ရတနာမြေ၊ ဆိုင်းတောင်ရွာမှာ အောက်တိုဘာ ၃ ရက်နေ့၊ နေ့လယ်ပိုင်းက စစ်ကောင်စီနဲ့ KIA၊ K-PDF ပူးပေါင်းတပ်ဖွဲ့တို့ တိုက်ပွဲဖြစ်ရာ လက်နက်ကြီး ထိမှန်လို့ နေအိမ် ၂ အိမ် ပျက်စီးပြီး KIA ဘက်က ကား ၃ စီး သိမ်းဆည်းရရှိခဲ့တယ်လို့ KIA ရှေ့တန်း သတင်းရင်းမြစ်ထံက သိရပါတယ်။
တိုက်ပွဲ အတွင်း စစ်ကောင်စီတပ် အသုံးပြုတဲ့ Pajero ကားတစ်စီး၊ Vigo 4 Wheels ကားတစ်စီး၊ Kluger ကားတစ်စီး သိမ်းဆည်း ရရှိထားပြီး လက်နက် ခဲယမ်း ဘယ်လောက် သိမ်းဆည်း ရရှိတယ်ဆိုတာ အတိအကျ မသိရသေးဘူးလို့ KIA ရှေ့တန်း သတင်းရင်းမြစ်က ပြောပါတယ်။
“ မနက် ၁၀ နာရီ လောက်က စဖြစ်ပြီး။ နေ့လယ် ၁၂ နာရီကနေ ညနေ ၂ နာရီခွဲ ဝန်းကျင် အထိ ပြင်းထန်နေတာ။ လက်နက်ကြီးကျလို့ လက်ဖက်ရည်ဆိုင် မီးလောင်သွားတယ်” လို့ ဒေသခံ အမျိုးသား တစ်ဦးက ပြောပါတယ်။
ဆိုင်းတောင်၊ မှော်ရှန်ရပ်ကွက်နဲ့ ဘွမ်ရာရပ်ကွက် ဘက်တွေမှာ တိုက်ပွဲဖြစ်ရာ စာသင်ကျောင်း အနီးက နေအိမ် တစ်အိမ် လက်နက်ကြီး ထိမှန်သွားတယ်လို့ သူက ပြောပါတယ်။
“ တိုက်ပွဲ ဖြစ်လာလို့ ဆိုင်တွေ အကုန်ပိတ်တာ။ ကိုယ့်အိမ်မှာပဲ ပုန်းနေကြတာ။ ကတုပ်ကျင်းတွေတော့ တူးထားဖို့ ပြောထားတာရှိတယ်” လို့ ဒေသခံ အမျိုးသမီး တစ်ဦးက ပြောပါတယ်။
လက်နက်ကြီး ထိမှန်လို့ မီးလောင်စဥ် လူပိတ်မိခဲ့တယ်လို့ သိရပေမယ် ထိခိုက်ဒဏ်ရာရတာ မရှိဘူးလို့ သူက ပြောပါတယ်။
မနေ့ အောက်တိုဘာ ၃ ရက်နေ့မှာပဲ စစ်ကောင်စီနဲ့ KIA တို့ ဗန်မော်-မြစ်ကြီးနားလမ်း၊ ဆမားလမ်းဆုံမှာ မနက် ၆ နာရီခွဲခန့်က စတင် တိုက်ပွဲ ဖြစ်ပွားခဲ့တယ်လို့ ဒေသခံတွေက ပြောပါတယ်။
လိုင်လွမ်အောင်ဂျာ ဘက်မှာလည်း ခယာတောင်ဘက်က စစ်ကြောင်း ထိုးလာတဲ့ စစ်ကောင်စီနဲ့ KIA တို့ မနက် ၁၁ နာရီနဲ့ နေ့လယ် ၁ နာရီကြား အကြား တိုက်ပွဲ ဖြစ်ခဲ့တယ်လို့ ရှေ့တန်း အသိုင်းအဝိုင်းက သိရပါတယ်။
ဆိုင်းတောင်ရွာ တိုက်ပွဲ အပါအ၀င် မနေ့က ဖြစ်ပွားခဲ့တဲ့ တိုက်ပွဲတွေ အတွင်း ၂ ဖက် ထိခိုက် သေဆုံးမှု အြေခအနေကိုတော့ မသိရသေးပါဘူး။
အောက်တိုဘာ ၂ ရက်နေ့ ကလည်း ဗန်မော်-မြစ်ကြီးနားလမ်း၊ လိုင်လွမ်အောင်ဂျာဘက်ကို စစ်ကောင်စီ ဂျက်ဖိုက်တာ ၃ စီးနဲ့ ဗုံး ၃ ကြီမ် ကြဲချ တိုက်ခိုက်ခဲ့ပါတယ်။
ပြီးခဲ့တဲ့ အောက်တိုဘာ ၁ ရက်နေ့၊ ညနေကလည်း ဖားကန့် ဆိုင်းတောင်၊ ရပ်ကွက် (၁) ရှိ ရဲစခန်းကို K-PDF က Drone နဲ့ ဗုံးကြဲ တိုက်ခိုက်ရာ ရဲ ၄ ဦး သေဆုံးခဲ့တယ်လို့ KIA ရှေ့တန်း သတင်းရင်းမြစ်တွေထံက သိရပါတယ်။
CJ-008
#MekongNews
#ဖားကန့်
#KIA_PDF
#လက်နက်ကြီး
