မဲခေါင်၊ ဇူလိုင် ၁၈
မကွေးတိုင်း၊ ဆိပ်ဖြူမြို့နယ်၊ ထမ္မကောက်စစ်ကောင်စီ အထိုင်စခန်းကို ပြည်သူ့ကာကွယ်ရေးတပ်မတော် (PDF) က ဒီနေ့ ဇူလိုင် ၁၈ ရက် မနက်ပိုင်းက လက်လုပ်ဒုံး ၃ လုံးနဲ့ စခန်းအတွင်းသို့ ပစ်ခတ်တိုက်ခိုက်ခဲ့တယ်လို့ NUG ကာကွယ်ရေးဝန်ကြီးဌာနက ထုတ်ပြန်ပါတယ်။
NUG လက်အောက်မှာရှိတဲ့ ပခုက္ကူခရိုင် အမှတ် ၄ တပ်ရင်း၊ တပ်ခွဲ ၃ နဲ့ ဆိပ်ဖြူမြောက်ပိုင်း ပြည်သူ့ကာကွယ်ရေးတပ်ဖွဲ့ (NSP) ပကဖ တို့က ပူးပေါင်းပြီး စစ်ကောင်စီရဲ့အထိုင်စခန်းထဲကို ဒုံး ၃ လုံး ပစ်သွင်းခဲ့ပြီး ပေါက်ကွဲခဲ့တယ်လို့ ဆိုပါတယ်။ ပေါက်ကွဲပြီးနောက် စစ်ကောင်စီဘက်က ပြန်လည်ပစ်ခတ်ခဲ့ပေမယ့် ပြည်သူ့ကာကွယ်ရေးတပ်မတော် ပူးပေါင်းအဖွဲ့တွေဘက်က ထိခိုက်တာမရှိဘူးလို့ ဆိုပါတယ်။
ဒီနေ့မနက်ပိုင်းမှာလည်း ဆိပ်ဖြူမြို့နယ်၊ သပြေကျေးရွာအနောက်ဖက်မှာ စစ်ကောင်စီ ၅ ယောက်ပါတဲ့ ဂျစ်ကားကို ပခုက္ကခရိုင် အမှတ် ၄ တပ်ရင်း၊ တပ်ခွဲ ၁ က ပဒေသာမိုင်းနဲ့ တိုက်ခိုက်ခဲ့တာကြောင့် ၄ ယောက်သေပြီး ၁ ယောက် ထိခိုက်ဒဏ်ရာတွေ ရခဲ့တယ်လို့ NUG က ထုတ်ပြန်ပါတယ်။
ဂျစ်ကားမှာတော့ သုံးမရအောင် ပျက်စီးသွားကာ ၄ ယောက်သေပြီး ၁ ယောက် ထိခိုက်ဒဏ်ရာရရှိခဲ့တာကိုတော့ မဲခေါင်သတင်းဌာန အနေနဲ့ သီးခြားအတည်ပြုချက် မရသေးပါဘူး။
မကွေးတိုင်း၊ ဆိပ်ဖြူမြို့နယ် ကုန်းရွာနဲ့ ကျောင်းရွာကြားမှာ ဇူလိုင် ၁၃ ရက်နေ့က PDF နဲ့ စစ်ကောင်စီ အမှတ် ၂၁၊ ကာကွယ်ရေးပစ္စည်းထုတ်လုပ်ရေးစက်ရုံမှ ထွက်လာတဲ့ စစ်ကောင်စီစစ်ကြောင်းတို့ ထိတွေ့တိုက်ပွဲဖြစ်ပွားခဲ့ပါသေးတယ်။
အဲ့ဒီတိုက်ပွဲမှာ စစ်ကောင်စီဘက်က ၃ ဦးသေပြီး ၁၀ ယောက်ဒဏ်ရာရခဲ့တယ်လို့ NUG ကာကွယ်ရေးဝန်ကြီးဌာနက သတင်းထုတ်ပြန်ခဲ့ပါသေးတယ်။
#MeKongNews
#မကွေး
#ဆိပ်ဖြူ
#စစ်ကောင်စီ