အမျိုးသား ညီညွတ်ရေး အစိုးရ၊ ကာကွယ်ရေးဝန်ကြီးဌာန တာဝန်ရှိသူတွေနဲ့ ပြည်သူ့ကာကွယ်ရေး တပ်မတော် -မန္တလေး ရဲ့ တပ်ရင်းအမှတ် (၁၂၀၁)၊ (၁၂၀၂)၊ (၁၂၀၃)၊ (၁၂၀၄)၊ (၁၂၀၅) တို့ တွေ့ဆုံ ဆွေးနွေးခဲ့တာလို့ သိရပါတယ်။
အဓိကက MDY-PDF ရဲ့ ၂၀၂၂ မှာ လုပ်ခဲ့တဲ့ အကြောင်းအရာ ဆွေးနွေးခဲ့ကြတာ။ နှစ်ပတ်လည် စာရင်းရှင်းတမ်းပေါ့။ နောက် ၂၀၂၃ မှာ MDY- PDF အနေနဲ့ က စစ်ရေးအဆင့် မြှင့်တင် ဆောင်ရွက်သွားမယ် ဆိုတဲ့ အကြောင်း အဲဒါတွေ ဆွေးနွေးခဲ့တာပါ
လို့ MDY-PDF ရဲ့ ပြန်ကြားရေးနဲ့ ပြောရေးဆိုခွင့်ရှိသူ ဗိုလ်မိုးကြိုးက ပြောပါတယ်။
ဆွေးနွေးပွဲမှာ ၂၀၂၃ ခုနှစ် အတွင်း ပြုလုပ်မယ့် စီမံချက်တွေနဲ့ စစ်ရေးဆိုင်ရာ ကိစ္စရပ်တွေကို ဆုံးဖြတ် အတည်ပြုခဲ့ကြပြီး ပြည်သူ့ကာကွယ်ရေး တပ်မတော်-မန္တလေး တာဝန်ရှိသူတွေက လိုအပ်တာတွေ ပြန်လည်တင်ပြ ဆွေးနွေးခဲ့တယ်လို့ သိရပါတယ်။
ပြည်သူ့ကာကွယ်ရေး တပ်မတော်-မန္တလေး ဟာ အမျိုးသား ညီညွတ်ရေး အစိုးရ၊ ကာကွယ်ရေး ဝန်ကြီးဌာနရဲ့ ကွပ်ကဲမှုအောက်မှာ စုဖွဲ့ထားတဲ့ တော်လှန်ရေးတပ်ဖွဲ့ ဖြစ်ပြီး လက်ရှိ တပ်ရင်း ၅ ရင်းနဲ့ စုဖွဲ့ထားတယ်လို့ သိရပါတယ်။
ပြည်သူ့ကာကွယ်ရေး တပ်မတော်-မန္တလေး အနေနဲ့ တပ်ရင်း အသစ်တွေ တိုးချဲ့ စုဖွဲ့ဖို့ အတွက်လည်း ပြင်ဆင် နေတယ်လို့ သိရပါတယ်။
