မဲခေါင် ၊ ဇူလိုင် ၈
ကရင်နီပြည်နယ်မှာ စစ်ဘေးရှောင်တွေအတွက် အကူအညီဖြစ်ဖို့ ရည်ရွယ်ပြီး HOPE- အဖွဲ့သားတွေက မိုဘိုင်း ရွေ့လျားတစ်ဝက်ဈေးဆိုင် ၄ ဆိုင်ကို ဇွန်လကုန်မှာ ပထမဆုံးအကြိမ် ဖွင့်လှစ်နိုင်ခဲ့တယ်လို့ အဲ့ဒီအဖွဲ့က သတင်းထုတ်ပြန်ပါတယ်။
မိုဘိုင်း ရွေ့လျားတစ်ဝက်ဈေးဆိုင်ဆိုတာ ကုန်ပစ္စည်းအားလုံးကို မူရင်းဈေးထက် ၅၀ ရာခိုင်နှုန်း တစ်ဝက်တိတိ လျှော့ဈေးနဲ့ စစ်ဘေးရှောင်မိသားစုတွေကို ရောင်းချပေးနေတဲ့ ဆိုင်တွေဖြစ်တယ်လို့ HOPE အဖွဲ့က ပြောပါတယ်။
“HOPE အဖွဲ့ရဲ့ အစီအစဉ်ဟာ လူဦးရေ ၄၀၀၀ ကျော်ရဲ့ ဝမ်းရေးကို အပတ်စဉ် အထိုက်အလျောက်တော့ ဖြေရှင်းပေးနိုင်ခဲ့တယ်။ လမ်းပန်းဆက်သွယ်ရေးအခက်အခဲကြောင့် ထပ်ပြီးတိုးချဲ့တဲ့ တစ်ဝက်ဈေးဆိုင်တွေကိုတော့ အထိုင်မချတော့ဘဲ မိုဘိုင်း ရွေ့လျားစနစ်နဲ့ ရောင်းချပေးဖို့ဆုံးဖြတ်ခဲ့တာပါ” HOPE အဖွဲ့ရဲ့ တာဝန်ရှိသူတစ်ဦးကပြောပါတယ်။
ထပ်မံတိုးချဲ့ဖွင့်လှစ်လိုက်တဲ့ တစ်ဝက်ဈေးလျှော့ရောင်းပေးတဲ့ မိုဘိုင်း ရွေ့လျားတစ်ဝက်ဈေးဆိုင်ကို တစ်လ ၄ ကြိမ်၊ တစ်ကြိမ်ကို စစ်ဘေးရှောင်စခန်းတစ်ခုနှုန်း နဲ့ တစ်လကို စစ်ဘေးရှောင်စခန်း ၄ ခုမှာ ဖွင့်လှစ်ရောင်းချပေးသွားမှာဖြစ်ပါတယ်။
HOPE အဖွဲ့အနေနဲ့ ပြီးခဲ့တဲ့ ၁၀ လကတည်းက အထိုင်ချပြီး ရောင်းတဲ့စနစ်နဲ့ တစ်ဝက်ဈေးဆိုင် ၄ ဆိုင်ကို စစ်ဘေးရှောင်မိသားစုတွေအတွက် ရောင်းချပေးခဲ့ရာမှ အခုအခါမှာတော့ တစ်ခြား စစ်ဘေးရှောင်စခန်းတွေကပါ တောင်းဆိုလာတာကြောင့် မိုဘိုင်းရွေ့လျား တစ်ဝက်ဈေးဆိုင် ၄ ဆိုင်ကိုပါ ထပ်မံတိုးချဲ့ရောင်းချပေးခဲ့တာ ဖြစ်ပါတယ်။
စစ်ဘေးရှောင်မိသားစုတွေအတွက် ရည်ရွယ်တဲ့ အဲ့ဒီ ရွေ့လျားတစ်ဝက်ဈေးဆိုင်မှာ အသက်ရှင်နေထိုင်ဖို့ နေ့စဉ်လိုအပ်တဲ့ အခြေခံစားသောက်ကုန်ပစ္စည်း နဲ့ အခြေခံအကျဆုံး တစ်ကိုယ်ရည် အသုံးအဆောင်ပစ္စည်းတွေကို အဓိကရောင်းချပေးနေတာလို့ HOPE အဖွဲ့ကပြောပါတယ်။
“ကျွန်တော်တို့ HOPE အနေနဲ့ ဒီမိုဘိုင်း တစ်ဝက်ဈေးဆိုင်လေးတွေ လုပ်ဖြစ်ဖို့ တော်တော် အချိန်ယူခဲ့ရပါတယ်။ ကောက်ရိုးမီး မဖြစ်စေပဲ စနစ်တကျနဲ့ ရေရှည်ဖြစ်စေဖို့ HOPE ရဲ့ထုံးစံအတိုင်း ဘာလုပ်လုပ် စနစ်တကျ ဖြစ်စေဖို့ အဖွဲ့သားအားလုံး ကြိုးစားခဲ့ရပါတယ်” လို့ HOPE အဖွဲ့ တာဝန်ရှိသူတစ်ဦးကပြောပါတယ်။
တစ်ဝက်ဈေးဆိုင်လို့ နာမည်ပေးထာပေမယ့် တစ်ချို့ ကုန်ပစ္စည်းတွေကိုတော့ တစ်ဝက်ကျော် သုံးပုံ နှစ်ပုံ အထိ ဈေးလျှော့ပြီး ရောင်းချပေးတာတွေလည်း ရှိတာကြောင့် စစ်ဘေးရှောင်မိသားစုတွေ ရေရှည်တောင့်ခံနိုင်ဖို့ တစ်ဝက်ဈေးဆိုင်လေးတွေမှာ ပါဝင်အားဖြည့် ကူညီကြဖို့ကိုလည်း အဲ့ဒီအဖွဲ့က ဖိတ်ခေါ်ထားပါတယ်။
တစ်ဝက်ဈေးဆိုင်ကို HOPE အဖွဲ့ကနေတဆင့် စစ်ဘေးရှောင်စခန်း တာဝန်ခံတွေနဲ့ လူငယ်တွေကိုယ်တိုင်က ရောင်းချပေးတာဖြစ်ပါတယ်။ အဲ့ဒီ ရောင်းချရတဲ့ ပစ္စည်းတွေကို HOPE အဖွဲ့က စစ်ဆေးပြီး ကုန်သွားတဲ့ ပစ္စည်းတွေကို ပြန်လည်ဖြည့်တင်းပေးတဲ့စနစ်ဖြစ်ပါတယ်။
CJ – 002
#MeKongNews
#ကရင်နီ
#မိုဘိုင်းဈေးဆိုင်
#စစ်ဘေးရှောင်