မဲခေါင်၊ ဧပြီ ၁၁
ရှမ်းပြည်မြောက်ပိုင်း၊ နောင်ချိုမြို့မှာ ဧပြီလ ၅ ရက်ကနေ ဒီနေ့ ဧပြီလ ၁၁ ရက်အထိ စစ်ကောင်စီနဲ့ ပြည်သူ့ကာကွယ်ရေးတပ်မတော် (မန္တလေး) – MDY PDF တို့တိုက်ပွဲတွေ ဆက်တိုက်ဖြစ်ပွားနေပြီး ဒေသခံပြည်သူတွေသောင်းနဲ့ချီကာ စစ်ဘေးတိမ်းရှောင်နေရတယ်လို့ MDY PDF ထံကနေ သိရပါတယ်။
နောင်ချိုမှာ ပြီးခဲ့တဲ့ ဧပြီလ ၅ ရက်တည်းကစစ်တပ်စခန်းကုန်းကို ၀င်စီးရာက စစ်ကောင်စီ နဲ့ တိုက်ပွဲတွေစတင်ဖြစ်ပွားခဲ့တာလို့ ပြောရေးဆိုခွင့်ရှိသူ အော်စမွန်က မဲခေါင်ပြောပါတယ်။
“တိုက်ပွဲကတော့ ဧပြီလ ၅ ရက်နေ့က စဖြစ်တာပေါ့နော်။ ဘယ်လို့စတင်ဖြစ်ပွားခဲ့လဲဆိုတော့ နောင်ချိုမြို့နယ် သံဘိုကျေးရွာမှာရှိတဲ့ စကစ စခန်းကုန်းကို ကျွန်တော်တို့ဘက်ကစပြီး ထိုးစစ်ပြုလုပ်ခဲ့တာပါ။ ဒါ့ကြောင့် ကျည်စပေါက်တာ” လို့သူက ပြောပါတယ်။
တိုက်ပွဲအတွင်း စစ်ကောင်စီက လေကြောင်းကနေ ဗုံးကြဲတိုက်ခိုက်တာ၊ လက်နက်ကြီးတွေနဲ့ ရမ်းသမ်းပစ်ခတ်နေလို့ ဒေသခံပြည်သူတွေ ထိခိုက်သေဆုံးမှုတွေရှိတယ်လို့ သူကဆက်ပြောပါတယ်။
“စကစဘက်က ပစ်တဲ့ လက်နက်ကြီးကြောင့် သံဘိုရွာက ကလေးငယ် ၂ဦး သေဆုံးပြီး ရွာသူရွာသား ၃ ဦး ဒဏ်ရာရခဲ့တာရှိပါတယ်။ ၁၀ ရက်နေ့ တစ်ရက်တည်း ၅ကြိမ် လာကြဲပါတယ်။ ည ၁၂ ထိုးခါနီးထိကို ကြဲတုန်း ၁၁ ရက် နေ့မှာလဲ တစ်ကြိမ် လေကြောင်းတိုက်ခိုက်မှု ရှိခဲ့ပါတယ်။ ၁၀ ရက်နေ့ လုပ်ခဲ့တဲ့ လေကြောင်းတိုက်ခိုက်မှုမှာလည်း ဟိုခဲကျေးရွာ ဘုန်းကြီးကျောင်းနား ကျရောက်ခဲ့တဲ့အတွက် ပြည်သူတွေ ထိခိုက်မှုရှိခဲ့တယ်လို့တော့ သိထားရပါတယ်။ အိုးအိမ်ပျက်စီးမှုကတော့ တော်တော်များတယ်”လို့ ကိုအော်စမွန် ကဆိုပါတယ်။
ဒါ့အပြင်လက်ရှိမှာ တိုက်ပွဲတွေ ဆက်လက်ပြင်းထန်လာနိုင်သလို နောင်ချိုမြို့နယ် အနှံ့မှာလည်း တိုက်ပွဲတွေဖြစ်ပွားနေတာကြောင့် ဒေသခံပြည်သူတွေဟာ ဘေးလွတ်ရာကို ထွက်ပြေးတိမ်းရှောင်နေကြရတယ်လို့ ကိုအော်စမွန် ကပြောပါတယ်။
MK-007
#MeKongNews
