မဲခေါင်၊ မတ် ၂၀
ရှမ်းပြည်နယ် တောင်ပိုင်း၊ ကျောက်တလုံးကြီးဒေသ အခြေစိုက် ပြည်သူ့စစ် အသွင်ပြောင်း PNA/PNO ခေါင်းဆောင် ဦးအောင်ခမ်းထီ အနေနဲ့ ကိုယ်ကျိုး အတွက် ပြည်သူကို အသုံးချ အမြတ်ထုတ်နေတဲ့ ခေါင်းဆောင် အဖြစ် သမိုင်းမတွင်ဖို့ စစ်ကောင်စီနဲ့ ပူးပေါင်းနေတာကို ရပ်သင့်ပြီလို့ တောင်ကြီး တက္ကသိုလ် ကျောင်းသားများ သမဂ္ဂ- TGUSU က မနေ့က တိုက်တွန်းလိုက်ပါတယ်။
ပအိုဝ်း ပြည်သူ့စစ် ခေါင်းဆောင် ဦးအောင်ခမ်းထီနဲ့ PNO ထိပ်ပိုင်း ခေါင်းဆောင်တွေကို တောင်ကြီး တက္ကသိုလ် ကျောင်းသားများ သမဂ္ဂက အိတ်ဖွင့်စာ မနေ့က ပေးပို့ရာမှာ စစ်တပ်နဲ့ ပူးပေါင်းနေတာ ရပ်လိုက်ဖို့ တိုက်တွန်း လိုက်တာပါ။
၂၀၂၁ ခုနှစ်၊ ဖေဖော်ဝါရီ ၁ ရက် စစ်တပ် အာဏာသိမ်းပြီးနောက်ပိုင်း လက်ရှိ အချိန်ထိ ပြည်သူတွေက စစ်အာဏာရှင်ကို လက်မခံဘဲ တော်လှန်နေတာဖြစ်ပြီး ပြည်သူတွေကို စစ်ကောင်စီက ဖမ်းဆီး သတ်ဖြတ်တာ ပြည်သူတွေ မျက်မြင် ကြုံတွေ့ခဲ့ရသလို PNO-ပြည်သူ့စစ် ခေါင်းဆောင်တွေလည်း သိမှာ ဖြစ်တယ်လို့ ပေးစာက ဆိုပါတယ်။
ဒါ့အပြင် မတ်လ ၁၁ ရက်နေ့က ပင်လောင်းမြို့နယ်၊ နမ်းနိန်းကျေးရွာ၊ ဘုန်းကြီးကျောင်းထဲမှာ ပုန်းခိုနေတဲ့ သံဃာတော် ၃ ပါး အပါအဝင် အပြစ်မဲ့ ပြည်သူ ၂၂ ဦးကို စစ်တပ်က သတ်ဖြတ်ခဲ့တာကို သက်သေ အထားတွေနဲ့ အတည်ပြုချက်တွေ ရရှိခဲ့ပြီး ဖြစ်တယ်လို့ TGUSU ရဲ့ ပေးစာမှာ ဖော်ပြထားပါတယ်။
ပင်လောင်းမြို့နယ် စစ်ကောင်စီနဲ့ ပြည်သူ့ကာကွယ်ရေးတပ်ဖွဲ့တို့ တိုက်ပွဲတွေ အတွင်း ဒေသခံပြည်သူ ၄,၀၀၀ ကျော် နေရပ်စွန့်ခွာ ထွက်ပြေးနေရပြီး ပြည်သူပိုင် နေအိမ် ၅၀ ကျော် ပျက်စီးခဲ့ရတယ်လို့ ဆိုပါတယ်။
အပြစ်မဲ့ ပြည်သူတွေကို ဖမ်းဆီး သတ်ဖြတ်ခဲ့တဲ့ စစ်ကောင်စီက စစ်အာဏာရှင် အဆက်ဆက် သုံးခဲ့တဲ့ လူမျိုးရေး၊ ဘာသာရေး မှိုင်းတိုက်ဝါဒဖြန့်ပြီး လူမျိုးရေး ပြဿနာ ဖြစ်အောင် ပြုလုပ်နေတာကို ဦးအောင်ခမ်းထီနဲ့ PNO ခေါင်းဆောင်တွေ နားလည်မယ်လို့ ယူဆကြောင်း ပေးစာမှာ ဖော်ပြထားပါတယ်။
ဦးအောင်ခမ်းထီ အနေနဲ့ စစ်တပ်ကို မဆန့်ကျင်စေကာမူ ပြည်သူတွေကို သတ်ဖြတ်နေတဲ့ စစ်ကောင်စီနဲ့ သူတို့ ဝါဒဖြန့်တာကြောင့် ပအိုဝ်း လူမျိုးတွေ ဂုဏ်သိက္ခာ ကျဆင်းနေတာကို ရှောင်လွဲနိုင်ဖို့ လုပ်ဆောင်သင့်တယ်တယ်လို့ တောင်ကြီး တက္ကသိုလ် ကျောင်းသားများ သမဂ္ဂက အကြံပြု တိုက်တွန်းထားပါတယ်။
MK-007
#MeKongNews
#တောင်ကြီးတက္ကသိုလ်ကျောင်းသားများသမဂ္ဂ
#ဦးအောင်ခမ်းထီ
#PNO/PNA