မဲခေါင်၊ ဇွန် ၂၀
ထိုင်း-ကရင်နီ နယ်စပ်၊ မယ့်စဲမြို့နယ်မှာ စစ်ကောင်စီ စခန်းတွေကို တိုက်ခိုက် သိမ်းပိုက်နေတဲ့ ကရင်နီ လူမျိုးပေါင်းစုံ လွတ်မြောက်ရေးတပ်ဦး-KNPLF တပ်ရင်း (၂) ခုဟာ နယ်ခြားစောင့်တပ်ကနေ အသွင်ကူးပြောင်း လာတာ ဖြစ်တယ်လို့ တိုးတတ်သော ကရင်နီပြည်သူ့ အင်အားစု-PKPF က ဒီကနေ့ ထုတ်ပြန်လိုက်ပါတယ်။
စစ်တပ်က ၂၀၀၉ ခုနှစ်မှာ ဖိအားပေးလို့ KNPLF တပ်ရင်း ၂ ခု နယ်ခြားစောင့်တပ်-BGF အဖြစ် အသွင်ကူးပြောင်းခဲ့ပေမဲ့ လက်ရှိ စစ်ကောင်စီကို တွန်းလှန်တိုက်ခိုက်ဖို့ အသွင်ကူးပြောင်းခဲ့တာလို့ ဆိုပါတယ်။
မယ့်စဲမြို့နယ်၊ ပန်းထိမ် အခြေစိုက် BGF တပ်ရင်းအမှတ် (၁၀၀၄) ဟာ မူလအတိုင်း KNPLF (4878) တပ်ရင်း ဖြစ်လာသလို ရွာသစ်မြို့ အခြေစိုက် BGF တပ်ရင်း (၁၀၀၅) ကလည်း မူလအတိုင်း (7894) တပ်ရင်းအဖြစ် ပြည်သူ့ဘက်က ပြန်လည်ရပ်တည်ပြီး အလံ၊ ယူနီဖောင်းနဲ့ ဘက်တံဆိပ်တွေ ပြောင်းလဲကာ စစ်ကောင်စီကို ပြန်လည် တိုက်ခိုက်နေပြီလို့ PKPF ကပြောပါတယ်။
ဇွန်လ ၁၄ ရက်ကစပြီး စစ်ကောင်စီရဲ့ မယ်စဲမြို့မ ရဲစခန်း၊ ဗျူဟာကုန်နဲ့ ထိုင်း-ကရင်နီ နယ်ခြားစခန်းတွေဖြစ်တဲ့ BP-14၊ BP-15 မယ်တနွယ်စခန်း နဲ့ BP-16 တောင်လှ စခန်းတို့ကို တိုက်ခိုက်သိမ်းယူခဲ့ပြီး နယ်ခြားစောင့် တပ်စခန်းတွေဖြစ်တဲ့ (၁၀၀၄) နဲ့ (၁၀၀၅) စခန်းဌာနချုပ်တွေကိုပါ ထိန်းချုပ်နိုင်ခဲ့တယ်လို့ ဆိုပါတယ်။
စစ်ကောင်စီဘက်က တန်ပြန်တိုက်ခိုက်ရာ KNLPF ဌာနချုပ်စခန်းရှိတဲ့ ဟိုစဲ့မြို့သစ်၊ ဖားအောင်းမြို့ တစ်ဖက်ခြမ်းက KNPLF တပ်စခန်းတွေကို လေကြောင်းကနေ ဗုံးကြဲတိုက်ခိုက်တာ၊ လက်နက်ကြီးတွေနဲ့ ဆက်တိုက်ပစ်တာတွေကို လုပ်နေတယ်လို့ တိုးတက်သော ကရင်နီ ပြည်သူ့အင်အားစုက ပြောပါတယ်။
ဒီလို လေကြောင်း သုံးပြီး (၁၀၀၄) နယ်ခြားစခန်းကို ပြန်သိမ်းနိုင်ခဲ့ပေမဲ့ လက်ရှိ ပြည်သူ့ကာကွယ်ရေး တပ်ဖွဲ့တွေက ပြန်လည်သိမ်းယူခဲ့ပြီး စစ်တပ် တပ်စွဲထားနိုင်တာ B-13 စခန်းသာ ရှိတော့တာကြောင့် မကြာခင် မယ့်စဲမြို့နယ်ကို စစ်ကောင်စီ လက်လွှတ်ရတော့မယ်လို့ PKPF ကပြောပါတယ်။
ဒီအခြေအနေနဲ့ ပတ်သက်ပြီး တိုးတက်သော ကရင်နီပြည်သူ့အင်အားစုကို မဲခေါင်သတင်းဌာနက ဆက်သွယ် မေးမြန်းပေမဲ့ မအားလပ်တာကြောင့် ဖြေဆိုဖို့ ခေတ္တ ငြင်းဆိုထားပါတယ်။
လက်ရှိ မယ့်စဲမြို့နယ်ထဲမှာ မဟာမိတ်တပ်ဖွဲ့တွေဖြစ်တဲ့ KNU/KNLA၊ KNPP/KA ၊ KNDF နဲ့ KNPLF တပ်ဖွဲ့တို့ ပူးပေါင်းပြီး 4K တပ်ပေါင်းစုအဖြစ် စစ်ကောင်စီကို တိုက်ထုတ်နေရာ စစ်ကောင်စီဘက် ဒီးမော့ဆို အရှေ့ခြမ်းကို ထိုးစစ်ဆင်ဖို့ ရောက်ရှိနေတဲ့ တပ်တွေ၊ ဖရူဆို-ဖားဆောင်း အခြေစိုက်တပ်တွေ စတဲ့ ကရင်နီပြည် နေရာအနှံ့က တပ်တွေ စုပေါင်းပြီး မယ့်စဲမြို့နယ်ကို ထိုးစစ်ဆင်ဖို့ ကြိုးစားနေတယ်လို့ ဆိုပါတယ်။
မယ့်စဲမြို့နယ်ကို စစ်ရေးအရ လက်လွှတ်ပေးရမဲ့ အခြေအနေ ဖြစ်နေတာကြောင့် စစ်ကောင်စီက တပ်မ အသစ်တွေ၊ အတွဲလိုက်ဒုံးနဲ့ ဟောင်ဝစ်ဇာ အမြောက်တွေ၊ စစ်ရဟတ်ယာဉ်၊ တိုက်လေယာဉ်တွေအပြင် စစ်အင်အား အများအပြားနဲ့ ထိုးစစ်ဆင်ဖို့ ပြင်ဆင်နေတယ်လို့ ထုတ်ပြန်ချက်မှာ ဖော်ပြထားပါတယ်။
မယ့်စဲမြို့နယ်ထဲမှာ တိုက်ပွဲတွေ ပြင်းထန်လာနိုင်တာကြောင့် တိုက်ပွဲဖြစ်ပွားရာ ဒေသတစ်ဝိုက်က ပြည်သူတွေ အနေနဲ့ ဘေးလွတ်ရာ ကြိုတင်ရှောင်ရှားပေးကြဖို့ ကရင်နီ တော်လှန်ရေးတပ်ဖွဲ့တွေက မေတ္တာရပ်ခံ ထားပါတယ်။
#MeKongNews
#ကရင်နီပြည်
#မယ့်စဲမြို့နယ်
#နယ်ခြားစောင့်တပ်
