မဲခေါင်၊ ဖေဖော်ဝါရီ ၁၇
ရှမ်းပြည်တောင်ပိုင်း၊ ဆီဆိုင်မြို့နယ်နဲ့ ဟိုပုံးမြို့နယ်မှာ လုံခြုံရေးဆိုင်ရာ လှုပ်ရှားမှုပြုလုပ်နေတဲ့ပအိုဝ်းအမျိုး သားလွတ်မြောက်ရေးတပ်မတော် PNLA က ဖေဖော်ဝါရီ ၁၅ ရက်နေ့က စစ်ကောင်စီလက်အောက်ခံ တပ်ဖွဲ့ဝင်တစ်ဦးကို လက်နက်နဲ့အတူ ဖမ်းဆီးရမိခဲ့တယ်လို့ သတင်းထုတ်ပြန်ပါတယ်။
စစ်ကောင်စီနဲ့ လက်အောက်ခံပြည်သူ့စစ်တွေက ချောင်းမြောင်းပစ်ခတ်လို့ ထိတွေ့ပစ်ခတ်မှု ဖြစ်ပွားခဲ့ရပြီးနောက် PNLA က ရှင်းလင်းမှုပြုလုပ်ခဲ့ရာမှာ ဖမ်းဆီးရမိခဲ့တာဖြစ်တယ်လို့ ဆိုပါတယ်။
ဆီဆိုင်မြို့မြောက်ဘက် တနေရာမှာလည်း စစ်ကြောင်းထိုးဖို့ကြိုးစားတဲ့ စစ်ကောင်စီနဲ့ လက်အောက်ခံပြည်သူ့စစ်အဖွဲ့ကို တားဆီးရာက ထိတွေ့တိုက်ပွဲဖြစ်ပွားခဲ့ပြီး တိုက်ပွဲအတွင်း ၆၀ မမ ၁ လက်နဲ့ လက်နက်ခဲယမ်းတွေကို သိမ်းဆည်းရမိခဲ့တယ်လို့ပြောပါတယ်။
စစ်ကောင်စီနဲ့ လက်အောက်ခံပြည်သူ့စစ်အဖွဲ့တွေဟာ ဖေဖော်ဝါရီ ၁၆ ရက် ညကလည်း ဟိုပုံးမြို့နယ် မဲနယ်တောင်ဒေသရှိ ကျေးရွာတွေကို လက်နက်ကြီး အချက် ၄၀ ကျော် ပစ်ခတ်တိုက်ခိုက်ခဲ့ပါသေးတယ်။
MK-012
