အကြမ်းဖက် စစ်ကောင်စီက စိုင်းပြင်းနေတဲ့ “အတုအယောင် ရွေးကောက်ပွဲ” အတွက် “နိုင်ငံအတွင်းရှိ လူဦးစာရင်း မှန်ကန်ရေးအတွက် မြေပြင်ကွင်းဆင်း တိုက်ဆိုင် စစ်ဆေးရန်” ဆိုတဲ့ ခေါင်းစဉ်တပ်ပြီး အကြို မဲစာရင်းတွေ ကောက်ယူဖို့ ခြေလှမ်း ပြင်နေတယ်လို့ သိရပါတယ်။
ဒါက အကြို မဲစာရင်းတွေ ကောက်ယူဖို့ ပြင်ဆင်လာတာဖြစ်တဲ့ အပြင် အမြို့မြို့အနယ်နယ်ရှိ တော်လှန်ရေး ရဲဘော်တွေနဲ့ မိသားစုဝင်တွေ၊ CDM လှုပ်ရှားမှုမှာ ပါဝင်တဲ့ သပိတ်မှောက် နိုင်ငံ့ဝန်ထမ်းတွေ၊ ပုဂ္ဂလိက ဝန်ထမ်းတွေ၊ ကျောင်းသားတွေနဲ့ သူတို့ရဲ့ မိသားစုတွေကို ပစ်မှတ်ထား ရှာဖွေဖော်ထုတ်ဖို့ ရည်ရွယ်လာတာ ဖြစ်တယ်လို့ ဖော်ပြထားပါတယ်။
ဒီလို ပစ်မှတ်ထား ရှာဖွေ ဖော်ထုတ်ပြီးပါက ပိုင်ဆိုင်မှုတွေ သိမ်းယူတာ၊ မတရား ဖမ်းဆီးတာ၊ စောင့်ကြည့်တာတွေ အပါအဝင် မျှော်မှန်းမထားနိုင်တဲ့ ဖိနှိပ်ရမ်းကားမှုတွေကိုပါ ကျူးလွန်လာနိုင်တယ်လို့ ဆိုပါတယ်။
လူဦးရေ စာရင်းဆိုပြီး အကြို မဲစာရင်း ကောက်ယူမယ့် သတ်မှတ်ကာလဟာ ဇန်နဝါရီလ ၉ ရက်နေ့မှ ၃၁ ရက်နေ့အထိ ၂၃ ရက်တာ ဖြစ်တယ်လို့ သိရပါတယ်။
အဲဒီ ကိစ္စရပ်နဲ့ စပ်လျဉ်းပြီး တော်လှန်ရေး အင်အားစုတွေက ပြည်သူလူထု တစ်ရပ်လုံးသို့ အကြမ်းဖက် စစ်ကောင်စီရဲ့ လုပ်ငန်းစဉ်တွေမှာ ပူးပေါင်း ဆောင်ရွက်တာ မပြုလုပ်ကြဖို့ မေတ္တာရပ်ခံတာ ဖြစ်ပါတယ်။
ဒါ့အပြင် ခြိမ်းခြောက်မှုတွေ ရှိပါက မှတ်တမ်းတင်ထားပြီး သတင်းပေးပို့ တိုင်ကြားဖို့နဲ့ မိမိတို့ ပတ်ဝန်းကျင်က လူဦးရေ စာရင်း ကောက်ယူမှု အခြေအနေတွေကို Telegram Scout channel တွေသို့ဖြစ်စေ၊ သတင်း မီဒီယာတွေနဲ့ သပိတ်အင်အားစုတွေရဲ့ လူမှုကွန်ရက် Facebook စာမျက်နှာတွေသို့ ဖြစ်စေ အချိန်နဲ့ တပြေးညီ သတင်းပေးပို့ကြဖို့လည်း တိုက်တွန်းထားပါတယ်။
အခြေအနေ အရပ်အရပ်ကြောင့် လူဦးရေစာရင်း ပေးရပါကလည်း သတင်းအချက်အလက် အမှားတွေသာ ပေးကြဖို့လည်း နှိုးဆော် တိုက်တွန်း ထားပါတယ်။
တအိမ်တက်ဆင်း မြေပြင် လူဦးရေ စာရင်း ကောက်ယူနိုင်ရေး ပူးပေါင်း ဆောင်ရွက်ကြမယ့် ရပ်ကွက် အုပ်ချုပ်ရေးမှူးတွေ၊ စစ်ကောင်စီ ဘက်တော်သား ဒလန်သတင်းပေး တွေကို သေချာမှတ်သားထားပြီး အမျိုးသား ညီညွတ်ရေး အစိုးရရဲ့ တရားရေးဝန်ကြီးဌာနနဲ့ ပြည်ထဲရေးဝန်ကြီးဌာနတွေကို အမြန်ဆုံး သတင်းပေးပို့ တိုင်ကြားဖို့လည်း တော်လှန်ရေး အင်အားစုတွေက တိုက်တွန်းထားပါတယ်။