မဲခေါင်၊ ဇန်နဝါရီ ၁၃
စစ်ကောင်စီ ကျင်းပမယ့် တရားမဝင် ရွေးကောက်ပွဲ ဖြစ်မြောက်ဖို့ အတွက် ပါဝင်လုပ်ဆောင်တဲ့ လူပုဂ္ဂိုလ်၊ အဖွဲ့အစည်းတွေ အားလုံး လုပ်ရပ်တွေ ရပ်တန့်ကြဖို့နဲ့ ဆက်လုပ်သူတွေကို အပြစ်ပေး အရေးယူမယ်လို့ ပခုက္ကူမြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်ပါတယ်။
စစ်ကောင်စီ လက်အောက်ခံတွေဟာ ပခုက္ကူမြို့ပေါ် ရပ်ကွက်နဲ့ ကျေးရွာတွေမှာ တရားမဝင် ရွေးကောက်ပွဲ အတွက် လူဦးရေ စာရင်း ကောက်ခံတာကို ဇန်နဝါရီ ၉ ရက်နေ့က စတင် လုပ်ဆောင်နေတာကြောင့် အဲ့ဒီ လုပ်ရပ်တွေ ရပ်တန့်ကြဖို့ မနေ့က ဇန်နဝါရီ ၁၂ ရက် ရက်စွဲနဲ့ ပခုက္ကူ ပ.အ.ဖ က သတိပေးလိုက် တာပါ။
ပြည်သူတွေ အနေနဲ့ တရားမဝင် ရွေးကောက်ပွဲ အတွက် လူဦးရေ စာရင်း ကောက်ခံတာတွေကို အသိဉာဏ်နဲ့ ချင့်ချိန်ပြီး တတ်စွမ်းရာ နည်းလမ်းနဲ့ ပူးပေါင်းတာ မလုပ်ကြဖို့ ပခုက္ကူ ပ.အ.ဖ က မေတ္တာရပ်ခံထားပါတယ်။
ဒါ့အပြင် တစ်အိမ်တက်ဆင်း စာရင်းကောက်ရာမှာ ပူးပေါင်း ဆောင်ရွက်နေတဲ့ ထွေအုပ်၊ ရွေးကောက်ပွဲ ကော်မရှင်၊ လ.ဝ.က ဝန်ထမ်းတွေ၊ အုပ်ချုပ်ရေးမှူးနဲ့ စစ်တပ်လက်ပါးစေ လုံခြုံရေး အမည်ခံ အဖွဲ့တွေကို လျှို့ဝှက်နည်းနဲ့ မှတ်တမ်းတင်ထားကြဖို့နဲ့ နီးစပ်ရာ တော်လှန်ရေး အင်အားစုတွေဆီ တိုင်ကြားဖို့လည်း ထုတ်ပြန်ချက်မှာ တိုက်တွန်းထားပါတယ်။
စစ်ကောင်စီက လူဦးရေစာရင်း ကောက်ခံတာကို ဇန်နဝါရီလ အတွင်း အပြီး လုပ်ဆောင်မယ်လို့ ကြေညာထားပါတယ်။
စစ်ကောင်စီရဲ့ ရွေးကောက်ပွဲ လုပ်ငန်းစဉ်ကို ဆန့်ကျင်ကြဖို့ ပြည်တွင်း၊ ပြည်ပ တော်လှန်ရေး အင်အားစုတွေက ဝိုင်းဝန်း တိုက်တွန်းနေပြီး NUG ယာယီ သမ္မတကလည်း စစ်ကောင်စီဟာ နိုင်ငံရေး လှည့်ကွက် အနေနဲ့ အတုအယောင် ရွေးကောက်ပွဲ ပြုလုပ်ပြီး ထွက်ပေါက်ရှာနေတယ်လို့ ပြောဆိုထားပါတယ်။
MK-009
